Read South Giziga Sin Ji 6 Bible Online

Sin Ji 6 - South Giziga bible

Sin Ji 6

¹Na kum boyoy cinam ɗi, slaka wala ngi ɓe! Mbak a dubunukum gwata, da kum miwi duniya kurzluˀoyo.

²Kum miwi zuguduw, kum majijaham asi mizli ngisi ruwuy kumoyo taŋ haɗi na, jikam slimiɗi.

³Gidaŋ ngi wi mizli, ki lumaka tivi Bumbulvuŋ gidaŋ ngi zuma buyo, ki lumaka tivi Buymisemuŋ Mimadiɗaŋ, masa wunjula gwat ngi gi kumoy ati gwat kum mujuwaka a mevel kum ngi gi, i naŋ.

⁴Na kum gawla naŋhay ar zuma buyo, ki gaka kiita ti jiviɗ naŋ ta, ki cinaka mi da ɓimujuwa ta, yo ko ki gaka gwata asi mevel ngi Buymisemuŋ ta mayse.

⁵Vurˀe, a sa cici lak lak a mbuŋ kumo, gurjik hã a gukum zluwun, asi mizli madiɗahaya, kiita nga taŋ naŋ jaw jaw ti vu avaŋ.

⁶Mbur mizliwe, a tiɗam kalaf ar naŋ gu, yo a ndila le ɓa a purakaŋ ircece ma, amma gwat ngi gi ngi mizli madiɗahaya, a sa puraka taŋ bleŋ bleŋ.

⁷Buy madiɗa ngi mizli gara, n’anta sa mi murdirba a mbuŋ mbur ko loŋ ta, yo anta sina madiɗa ngi mburo ta ma. Miga mbur madiɗa ati mbur mizliwe i naŋ, yo a ki slimiɗ ar mizli gar rak raka.

⁸Amma a saka virzi ngi mizli migidaŋhaya pislek pislek ɓula.

⁹Aw mizli madiɗa ɗuwoy, ya maɓa ɓi hana na vur kumo, ɓa ki dubunam sin mijileŋ, yo ɓa ki ram tiɗam tiɗam ta.

¹⁰Mizli macinaka mi kuy kuy da ɓimujuwa mipala , a sa puraka taŋ kaɓa mizli mipalay , yo mizli mudubunaka le na, tapas gi kiita, a sa lumam micika vu ar taŋ.

¹¹Da kine na, ndiram wirwir ngi cina mingiɓi ɗo, anja may naŋ a jukum koɗo koɗo, joˀ a sa surukukum.

¹²Sin mijileŋ a wucuɗ, n’anta muc hiri pam le ta, mizli mira wuɗam na, a purakakaɗaŋ kaɗaŋ, yo mizli masipaka na, a lumakaŋ.

¹³Milzi mira wuɗam na, a ki ɓaˀ a mbuŋ taŋ, i naŋ mabuga taŋ vu dumbuŋ jaka.

¹⁴Mbur mislikiɗ le tili ngi sipi naŋ na, n’anta sa mur ngi lum naŋ ta, a sa luma joˀ avi miviŋ naŋ si.

¹⁵Mbur sin mijileŋ magaŋ vekeɗ vekeɗ na, i lesl muwun le ngi sli wala ngi gwat gisiŋ gisiŋ. Yo mbur mihinje ta li daŋ daŋ vurˀe na, neˀ ngaka na, anta sa lik ta.

¹⁶Asi sin mijileŋ vuna kwana, a ra sipi mizli mindilaka le ngi lum naŋ ya, a buga taŋ vu ti mevel mezle a jiviɗe, yo ar wuluk taŋ gar na, a ra ci a ra ɓa a zliram.

¹⁷Ɗuva virzi ngi sin mijileŋ na, i may migisiŋ gisiŋ ngi dubuna gwat naŋ majuwa.

¹⁸Wuɗ dubuna gwat naŋ na, i wuɗa Buymisemuŋ, i ja ɓimujuwa naŋhay a hirnga, ja ɓimujuwa naŋhaya kwana, i ɗuva wuluk taˀ k’anta ki sa muc ta,

¹⁹yo da k’anta ki sa muc ta na, naɓa ka gweˀ avu Buymisemuŋ.

²⁰Naŋ kine, may ngi sin mijileŋ na, a ru ti mburo seŋseŋ ar zuma buy.

²¹Da kum madiɗa ngi mizli, ki ŋhiyaka cifi ar janga kumoyo le, yo ki wuɗam wi mizli na, ɗuvaka hirnga da sin mijileŋ, ɓa ki sa zumam buy ngi sete.

²²Na sin mijileŋ vuna i mike? A bo tudumaka? I wuɗ i tulukum di mi, ko y’anta ɗumo ɓi naŋ masli wala ta na ta. I sa zlo di zle avi zli virzi naŋ, sin ngi ra na, i sa njuko taŋ njak njak ar li babaraŋ, ko y’anta sa cuh kileŋ avi ɓi mikaslsla ta.

²³Ko y’anta sa pula vu ɗu da may gwat a hiryiy ta, asi may gwata, anta jumom ati sin mijilleŋ ta.

²⁴Da misi sin mijileŋhey taŋ haɗi ar duniya na, naɓa duniya a sa lih tisi taŋ jaka, yo buy misi lesle kwana, a sa ga ɓa mizli naŋhay a ndiram ar wuya.

²⁵Kumo kwana, pulaka vu kum mbak i dubunukum gwat ti mingiɓi ɗu, joˀ ki sa lumaka migir nah.