Read South Giziga Sin Ji 7 Bible Online

Sin Ji 7 - South Giziga bible

Sin Ji 7

¹Ya Salomoŋ, yi mbur masa muc kaɓa mizli mekelemey gar, yi bo tuvu mbur mudumbuŋ mindiraka ti murɓuku. I vu ngi mbur mukucuwiy a kwacay maha.

²Vu ngi mbur ar wuɗa vu misi ti duvuɗu, a hindr’ik a kwacay maha, a lum gidaŋ ti pumbus ngi maha hã kiya ngoltir.

³Taŋ miyikiy cak si na, i musuwun di i himiɗ misi purla ati kumo, i sawa a ruwuy ndra masam bonoy a ra rak raka, a yikiy kaɓa mayam zuŋ gaza gar, i hiziga widi mudumbuŋ ti tuwuyo le kaɓa ziri gar.

⁴A mbizikiy le mbizeˀ mbizeˀ ti zana, a kam slimiɗ le ar ya.

⁵Ɓa mbur a cifi buy, a zla virzi ngi duniya naŋ kahana ta na anta.

⁶Ndra gar na, i lumaka siifakahana, yo i sa mucam kahana.

⁷Ya midir dibiɗ na vurˀe, joˀ i lum sli wala ngi gwat, i tumbulo Buymisemuŋ, joˀ i lum wuluk ngi sin mijileŋ.

⁸I pura na, a funa cifi ar janga ngi buy ati zuma buyo le. ko zlili a zliram neˀ le ati sin mijileŋ ta.

⁹Ko a wam weˀ le ati ɗugur mupuɗaw puɗawaya ta. Naŋ kine, avi sin mijileŋ na, ɓiri hirnga ngi duniya keɗeɗe, naŋ kaɓa muyuŋ hirac, yo ɓiri bara, naŋ a vakaɓa ndileɓe.

¹⁰I wuɗ sin mijileŋ fineˀ jam ngi vu ɗu ati kuy ngi vu ɗu, yo i ŋhiya fineˀ li minjahha, asi li minjahha nga naŋ, li mumbuˀ mbuˀ anta anga ta.

¹¹Na sin mijileŋ a siy ti gi mezlehey gar a haŋ, zlili masluf ta wãˀa, n’ada asi haŋ naŋ.

¹²Gi mezle tayna gar, i sina gi taŋ slra le ti jiviɗ naŋ asi sin mijileŋ vuna, ti nana, magiy gwat tayna i sin mijileŋ na, i sina zleˀe t’aruŋ.

¹³Gwat ya mudubuna avi sin mijileŋ ti mevel mezle na, i dubuna da mizli mekelemey, ko i pul neˀ ta. I ɗumo zlili naŋ ta.

¹⁴Sin mijileŋ, naŋ avi mizli, i zlili makiɗ mi ta. Mizli mulumaka le na, i ngama ngi Buymisemuŋhoy, gwat ngata ra taŋ malumaka ar dubun naŋ na, a tiri ti taŋ mezle da Buymisemuŋ.

¹⁵I Buymisemuŋ mabuga jiviɗ da sin mijileŋ waɗ da mizli misi sin mijileŋheye, anja a vuliy ɓi ɓi misi ti lesle, anja wuluk ɗu kwana, i wuluk mindila le weˀe avi gwat ngatara naŋ muvuliy di na so.

¹⁶Ndra vuna ati mingiɓi ndrahay, sin ndra gar ati sin ndra ngi gi gwat gar na, ndra turɓus asi haŋ ngi Buymisemuŋ.

¹⁷I Buymisemuŋ vuna muvuliy sin migisiŋ ngi pura gwatay macohomo. A ga duniya, yo gwat ngi raˀahaya, a gam slra mbri mbrike gar na, a dubuniy di le.

¹⁸Zli virzi ngi hin, wuzla naŋ ati kiɗa mi naŋ, pas maru waɗ li mambiɗi viya, a sa mbiɗi lendeɓ ma gar na, a dubuniy di le.

¹⁹Vi mamawa vur vi vur vi waɗ gwat ngi muŋhoy,

²⁰ɗuva virzi ngi gwat miŋsamihey, gwat ngi gi ngi gwat ɓuhoy, gidaŋ ngi gi moˀore ngi musuɗukoy waɗ wuluk ngi mizli, sukwi ngi kalafay wal wal waɗ dimbasl taŋhay ngi slalaka, a dubuniy taŋ le.

²¹Gwat miyaŋ ati gwat mapur gar na, i sina taŋ le, asi sin mijileŋ misina gwat ngi duniya kurzluˀo, a dubuniy taŋ le.

²²Asi sin mijileŋ, naŋ ti lesl, naŋ pal, naŋ kpesl purla, amma a gi gwat wal wal haɗi, naŋ kuɗ kuɗu, a wus hiri, a pur kaɗaŋ kaɗaŋ, manja maslef, fetek fetek, anta ngi ɗiyi avaŋ ta, a wuɗ gi mezleŋ, a wus vu.

²³A wi hirnga naŋ, a gi mezleŋ, i ngama ngi mburu, a cici zlak, a ga gwata gisiŋ gisiŋ, mevele zuyyo, a ga gwat gar gu, a jigina gwat gar gu, a ci ar wuluk ngi mizli misi lesl mezlehey gar, naŋ manja dili, a ci yik yik avi mburo.

²⁴Sin mijileŋ a wus vu fineˀ gwat muwusa vuhoy gar, naŋ mileɗeɗe tuwa na, a ci yik yik, yo a ci kwaŋ kwaŋ avi gwat gar.

²⁵Naŋ kine, sin mijileŋ i musuwun ngi gidaŋ ngi Buymisemuŋ, a bo cirre tir dudok ngi Buymisemuŋ Mimadiɗa, vurˀe, ko gwat misi dili maci ng’avaŋ anta.

²⁶A zuɓo di i wucuɗ miplingiɗ plingiɗ ngir li minjahha ngi sete, a zuɓo di slra manja meslef avaŋ ngi Buymisemuŋ, njazl ar darogal waɗ foto ngi mezle naŋ magaŋ.

²⁷Naŋ pal naŋ ngbaŋ, amma a ga gwat gar gu, n’ada nga naŋ nga naŋ ngbaŋ, amma a mbiɗa gwat ngisi gazlavaya gar nawayaŋ. Avi dideˀ dideˀ nga mbuŋ, a ci ar mizli misi musuɗuk mipalay , ɓa a tiri taŋ ngama ati mijiviɗ ngi Buymisemuŋ.

²⁸Buymisemuŋ a wuɗ di mizli magam slra ti sin mijileŋ tewle.

²⁹Sin mijileŋ a wucuɗ fineˀ pas ati wurzlaŋhay. Da a waka taŋ ati papas na, a funa piw.

³⁰Naŋ kine, papas a pula li da duvuɗu, na so na, malambaˀa, a pa hirnga da sin mijileŋ daˀ ta.