Read South Giziga Sin Ji 8 Bible Online

Sin Ji 8 - South Giziga bible

Sin Ji 8

¹Sin mijileŋ a ra ndaha li ti gidaŋ, a zla asi diˀis hã seŋseŋ asi diˀis vay mekelem, a ra jigina ruwuyo ti mezleŋ.

²Gwat ya mawuɗ na, i sin mijileŋ, i zla sipi naŋ diga ti zuŋ, kuy naŋ a ciri hiri haɗa, joˀ i ŋhiya ɓa a ndir da ya kaɓa i ngwas ɗu.

³Sin mijileŋ a ra buga zli virzi naŋ misi ti dudok na, asi taŋ zlaɓ ati Buymisemuŋ, yo buy miwa si gazlavay kurzluˀ gara, a ra wuɗaŋ.

⁴Buymisemuŋ a ra dubuna gwat da sin ngi gi gwat vuna, sin mijileŋ kwana, a juwa le, ɓa a ga slra naŋhaya.

⁵Zlili i gwat ngi hiyĩ ar siifa ɓula, amma sin mijileŋ na, maga gwatay gar i naŋ, zlili mifini n’ada kwa?

⁶Da lesl ndra naŋ kandaŋ wãˀ na, sokota sin mijileŋ miɗiya gwat misi titirihey na jak kwa?

⁷Ki wuɗam gi gwat micirre kwa? Maga taŋ ti sukwi wal wal i sin mijileŋ: asi a dubunuw gi gwat miweˀe, wi vu avi menderehey, gi gwat mijeŋŋe waɗ tumovu. Ar siifa ngi mburo, gwat mupuɗaw mindila sin mijileŋ anta ko neˀ ta.

⁸Ki ɓam ki wuɗam zik ar lidubuna gwata haɗa ruŋ kini kwa? Na sin mijileŋ vuna, a sina gwatay mucohomo le, yo a sina gwat masa so tumbuŋ le ma, a sina pulaˀavra ngi kiita ati ɓi mumbuza le, a wi vu avi gwat mabigi gwat mekelemey ati gwat migam daˀ tahay, yo a sina gwatay migam diga zlezle le, ti vi taŋhaya ti vi taŋhaya.

⁹I juwa le, ɓa ndra cuwa ar siifa ɗu, i sina le, masa vuliy kuti mezle i naŋ, masa vuliy gidaŋ ar lik ati ndurɓo hiri ɗu i naŋ.

¹⁰I ɓi ti kwacay ɗu na: «I sa lum dudok awuzla mizli mbele sin mijileŋ, yi zuŋ aruŋ ɓula, amma midigilahay asa cinikiy mi.

¹¹Ti ya masa ga kiita na, a sa sinaka, i gi di kiita mijileŋ naŋ wãˀ, joˀ yarmahay a sa ndiram a mbuŋ ɗu ngirkik ngirkik.

¹²Da i taˀa mi le na, a sa kutukikiy, da i ra ɓi na, a sa jikam slimiɗi, da i zik ti mi le kwiliŋ kwiliŋ na, a sa tiɗam haŋ avi mi avi mi.

¹³Mbele sin mijileŋ na, y’anta sa muc ta, i sa pul gwat ngi set, ɓa mizli masa yaka taŋ nga mbuŋ, a sa sinikiy avaŋ.

¹⁴I sa wi mizli, sukwi ngi mizli a sa hinam hirnga a mbuŋ ɗo.

¹⁵Buy madiɗahay misa cinam slimiɗ ɗu le cin sina, a sa zluwunam, i sa buga vu ɗu awuzla mizli, yi mbur mezleŋ, yo yi mbur miwirwir ar vurumo.

¹⁶Ya misa mi le nga hay ɗu na, i sa cifi gweˀ avi sin mijileŋ, asi mbur migweˀ ava na, anta sa lum gwat ngi ndurɓo hiri ta, ko bonoy anta, amma sey ɗiyi mezleŋ waɗ cira hiri tewle.

¹⁷I wuluka gwat tayna cek ti kwacay ɗo. Ya mupura avi mevel ɗo, da ka jom ati sin mijileŋ na, ki muc mata gisiŋ,

¹⁸wuɗa vu naŋ, a vul mumul mihaɗi, gwat ngi gi naŋ, i zlili makiɗ mi ta, da kum zlaɓ zlaɓ ati naŋ na, a vuluw lesle, yo kiɗa slir ati naŋ na, slimiɗ ɗike a zil haɗa muduba na, yi ndir ar li sipi naŋ tika tika gar, ɓa i zuɓa kaɓa mazuɓam ngwasa.

¹⁹A yikiy i ndila le gisiŋ, i lum musuɗuk mezle le,

²⁰malla ta na, ya mimezle tuwa na, a yoko ya cak ti dum vu manja dili.

²¹dambalaka, da Buymisemuŋ a vuliy sin mijileŋ ngata ra ta na, i sa luma ta na, i sina le ngbaŋ, yo sina mbur misi gwat mezle a bo ti vaŋ na, a bigi mbur misla wala ngi gwat le. Akẽh na, i mbiɗi hiri ng’avu Bumbulvuŋ, dar i dir dibiɗ, i ɓaŋ ti mevel purla: