Read South Giziga Sin Ji 9 Bible Online

Sin Ji 9 - South Giziga bible

Sin Ji 9

¹I ɓaŋ na: «Aw Buymisemuŋ ngi dideˀ ɗuwoy, Bumbulvuŋ mapur ircece! Ki ga duniya le ti mingiɓi ɗiki.

²Ki ga mburo le ti sin ɗik mijileŋ, ɓa a cifi buy a hirnga gwatay ka miga taŋ,

³ɓa a wa duniya ti pura ircece ati gi gwat mijeŋŋe, yo ɓa a ga kiitakaslsla gisiŋ.

⁴Vuliy sin mijileŋ ka mujoˀ di ar zuma buy ɗik na, yo ki guhiy ti wuzla ziri ɗikey avra ta.

⁵Pura ɗi, yi gawla ɗiki, yo mangal ngi ngwas migi slra ɗiki, yi mbur mihĩyaŋ mazik ar duniya haɗi ta, lesl ɗu a ndila wãˀ ngi sli wala ngi ɓimujuwa mitaˀ gar ati ɓi mijuwahaya ta.

⁶Na zle, mbur manja hereweɗ anta asi mizli titirahaya ta, da sin mijileŋ mabo tivi ka anta avi mburo ta na, a slufaka i ngataraŋ.

⁷Mumuɗiy ceɗ awuzla mizli, ɓa i cifi buy ngi mizli ɗikey, ngi gi kiita da ziri ɗik mizile ati mongosohoy na, i ka.

⁸Ki puliy jiviɗ le ɓa i ndiruw hay a hirnga muwã ɗik mipal , waɗ i ɗiyuw li gi mikuli ar walahay ka mipa hay ɗik adiga na, i ndira a bam vu ati guɗuk mipal , ka miɗiya zle angi zli virzi naŋ na.

⁹Sin mijileŋ, n’ada gweˀ avi ka, a sina gwat ngi gi ɗikeye le, ti ka miga duniya na, naɓa n’ada. Gwat ka mapura kuy ati gwat micirre kaɓa ɓimuɗuva ɗikey mawuɗam na, a sina taŋ le.

¹⁰Po di sar ti muŋ, tir li ɗik mipala, po di sar tir janga ɗik ngi dudoko, inga slino di takwa, ɓa a sa jiniy ar slra ɗuwoyo, yo ɓa i sina gwat ka maŋhiya.

¹¹Sin mijileŋ a sina gwataya le, a sla wala taŋ le gar, a sa bigiy jiviɗ ar gwat ngi gi ɗu kasl kasla, joˀ a sa cik vu ar ya ti dudok naŋ.

¹²Vurˀe, gwat ngi gi ɗu a sa tiri mezleŋ, i sa ga kiita da mizli ɗikeye jeŋ jeŋ, yo i ndila le ngi cifi ar janga ngi baha.

¹³I wa misina gwat ngisi mevel ngi Buymisemuŋ ka? Mbur misina wuluk ngi Bumbulvuŋ ada kwa?

¹⁴Wuluk ngi ndra mizli mamucama, i wuluk macici deŋ ta, wuluk ndrahaya, i wuluk midaray ta.

¹⁵Dum vu ndra mazĩˀĩ na, a ja musuɗuko le ziniy, koslongorok ndra miga ti ruwuy na, i jijir avi wuluk ndra, a ra vulaŋ lik wal wal haɗi.

¹⁶Gwatay magam a ruwuy aka vuna, i bugaka taŋ tuwaˀ tuwaˀ, ko gwat mindrehhe ati ndra kwana, i slaka wala nah tuwaˀ tuwaˀa, sokota gwatay magam a muŋ kwa?

¹⁷Yo gwat ka mawuɗo, da ki vula sin mijileŋ da mburo ta, yo da ki slino ˀUf ɗik da mburo ta na, anja ani mbur misina i waka?

¹⁸Vurˀe, mizli ngi ruwuyoy a moko ng’ar jiviɗ mijeŋŋe muŋ, mizli mudubunaka gwat ka mawuɗ na aseˀe, joˀ sin mijileŋ a laha taŋ.