Read South Giziga Sir 1 Bible Online

Sir 1 - South Giziga bible

Sir 1

¹Ɓi madiɗa madiɗa ngi raˀa Ɗerewol hana, i ɗerewol ngi mbur ada mazilaka Yesu(Yosuwe) i mangal ngi Sirak (ti mi Hebere Ben Sirak), a zilaka wurenna Sirasid, a zilaka ti zlezle: Ekleziyas, Mbur mutuhu naŋ, naŋ a Zeruzalem, dumbuŋ ar Makabehey misa slikiɗam ɓi. I mbur misina toho ɗerewol mipal ngi Yudeheye le kuykuy ti jiviɗ naŋ. A zuɓ mulak haɗi, naŋ a wuzla mizli misi sin mijileŋhey. I mbur muwuna hiri le. Tiɓi ngi Grekey maru nga mbuŋ na, ɓa a pura ti hiri na, a gi ta. I sirik nawaya ngisi gazlavay kuɗgulum, na mindiloko di i Grekey diga ti taŋ mutuɓaka ruwuy Alekzandir madiɗaŋ. Naŋ kine, keɗ keɗ nga mbuŋ na, sirik nah, a sa hiriya sipa jiviɗ ngi Yudeheye. Ɗerewol Siraside, naŋ hĩˀĩ ngi cika vu asi sirik waɗ sipa jiviɗ taŋ mulumoko di avi dideˀ taŋhay ti zlezle na. A toho ngi jina mizli migweneheye, ɓa a ndiram ar jiviɗ nga taŋ Yudehey, asi duniya a ra mbiɗi haɗa haɗa, a sipi jiviɗ ɓa Israyeley a sinaka, ar sirik taŋ, angi kpak taŋ ati sipa jiviɗ taŋ ngi wuna hiri da mizli nah na, gwat ngi (...)

²Muyuŋ misi a ˀaydidik ngi mubuliy, vuŋ magicawa, waɗ hin ngi siifa ngi set na, maslufa taŋ gu i waka?

³Kileŋ ngi muŋ avi ruwuy, sliprik ngi ruwuy, waɗ jileŋ ngi mubuliye, masa bula taŋ gu i waka?

⁴A gaka sin mijileŋ dumbuŋ ar gwat gar, i wuluk ngi lesle, naŋ diga zle ngi sete.

⁶Dimbasl ngi sin mijileŋ, a bugaka da waka? Ɓi naŋ mujuwa miyaŋ ngi gi na, misina i waka?

⁸Mbur misi sin mijileŋ, naŋ purla si, a gi zluwun da mbur, i Bumbulvuŋ mujoˀ ar janga naŋ ngi buyo.

⁹I Bumbulvuŋ vuna ti haŋ naŋ miga sin mijileŋ, a wunjula le, a sina puɗaw naŋ le, a pa sin mijileŋ le ar gwat naŋ miga gar.

¹⁰A vula le ko da mbur titira wanaka gar, a vula dum le da mizli mawuɗakaŋ. Sina Bumbulvuŋ, naŋ i mbur micawwa

¹¹Cika hirnga da Bumbulvuŋ na, a vula dudok da mburo, a ga mbur a jijih, a mumul, yo a jiɗ meceŋceleŋ.

¹²Cika hirnga da Bumbulvuŋ na, a ga mevel zuyyo da mburo, a vulaŋ mumul ati cira hiri waɗ a jaŋ hutuŋ subur.

¹³Mbur mazluwun ti Bumbulvuŋ na, gwat gar a cuh kuy kuy avaŋ hã tay mi naŋ, tapas muc naŋ na, Buymisemuŋ a sa ɗuwulaŋ mi.

¹⁴Ɗuva virzi ngi sin mijileŋ, i cika hirnga da Bumbulvuŋ. Avi mizli miteŋteŋhey na, sin mijileŋ naŋ zlaɓ ati taŋ zle a kwacay mumuŋ taŋhay.

¹⁵Sin mijileŋ a ɗiya hay naŋ le awuzla mizli ngi sete, a sa ndir n’ada teŋteŋ avi dideˀ taŋhay nga mbuŋ.

¹⁶Sin mijileŋ miwãˀ naŋ na, i cika hirnga da Bumbulvuŋ, sin mijileŋ a yi locok locok da mizli so.

¹⁷Sin mijileŋ, a naha hay taŋ gar ti gwat taŋ mawuɗam, yo dirgwaɗ taŋhaya sok sok ti gwat naŋ mavula.

¹⁸Tuwuɗa hirnga ti sin mijileŋ, i cika hirnga da Bumbulvuŋ, a ga ɓa mbur a cifi setette, ti vu naŋ zuy zuy.

¹⁹Sin mijileŋ, a vul sin haɗa ngi gi gwat, ati lesl ngi sli wala ngi gwata, a sika dudok ngi mizli misi ti naŋhaya.

²⁰Dimbasl ngi sin mijileŋ, i zluwun ti Bumbulvuŋ, mihaŋ naŋhaya, a jam hutuŋ subur da mburo. Ndi ɓi ati jigina vu

²²Ji mevel ti jiviɗ naŋ ta na, anta ŋhiyaka ta, asi gwat mbur maga ti ji mevel tuwa, a sa zizaŋ.

²³Mbur mandi ɓi na, a pura gwata kinihhe, hã a zik, a dirba nah, a sa mumul amuŋ.

²⁴A sa ndir ti wuluko teˀ a kwacay naŋ, hã a zik, mizli gar a sa ɓam: lesl avi naŋ haɗa. Gwat ngi gi ngi kirih ng’avi Buymisemuŋ

²⁵A wuzla zlili ngi sin mijileŋ na, sina ɓi ɓi ti kucuwulo n’ada a ra, amma sipa jiviɗe, i gwat mukuy ta wãˀ avi migi mungrahaya.

²⁶Ka mawuɗ sin mijileŋ na, ja ɓi muɗuvahay a hirnga, dar Bumbulvuŋ a sa vuluw jok joko.

²⁷Asi sin mijileŋ ati dubuno, i zluwun ti Bumbulvuŋ, maciraŋ hiri, i gi teŋteŋ waɗ cifi teˀ teˀe.

²⁸Ki sli himaˀ avi cika hirnga da Bumbulvuŋ ta, ki so ng’avaŋ ti kwacay cuw ta.

²⁹Ki gi kwacay cuw avi mizli ta, yo ji lejeŋ avi irne ɗike.

³⁰Ki ga vu ɗik ɗongor tahaŋ ɗike ta, vur ka madiɗi, yo ki so ti hiryi nga hirnga ɗike, asi Bumbulvuŋ a sa njiko ɓi miyaŋŋa ɗik na, yo a sa puw mesem awuzla mizli, asi ki so ng’ava manja hina hirnga, yo mevel ɗike, a ro ndus ti slir.