Read South Giziga Sir 10 Bible Online

Sir 10 - South Giziga bible

Sir 10

¹Buy misi sin mijileŋ, a dubuna gwat da mizli naŋhaya, da naŋ ti lesl na, a wa mizli.

²Gwat ngi gi ngi prezidaŋ ati ministir naŋhaya, i misi purlahay. buy miwi li ati mizli naŋhaya, i misi purlahay.

³Buy manja lesl na, a ziza mizli naŋhaya, majaka ruwuyo, i buy naŋhay misi lesley.

⁴Wi ruwuy kurzluˀo, naŋ asi haŋ ngi Bumbulvuŋ, a bo ti mbur mihĩˀĩ ngi zuma buyo ara, ar pas naŋ muwuɗ le.

⁵Ɓa mbur a ga gwata gu na, ɓi naŋ naŋ asi haŋ ngi Bumbulvuŋ, a pula ɓi ngi dudok naŋ asi haŋ ngi mbur misina ɓimuɗuva. Huhumo vu ati guzuvura vu

⁶Ko mbur a guw malambaˀ wanaka gar na, ki jaŋ a kwacay ta. ko ki gi gwat neˀ ngi guzuvura mburo ta.

⁷Bumbulvuŋ ati mizli, a hirsaka huhumo vu le, avi taŋ na, ki gi gwat mijeŋ ta le na, ki zluɓa le.

⁸Maga ɓa zuma buy a tuwuɗ aka aka na, i gi gwat mijeŋ ta, guzuvura vu waɗ may gwat.

⁹Mbur misi i murɓuk ati fucu ngatara ma na, a huhum mike? Na zle, kwacaya i miŋzaˀa le, diga naŋ misi ti siifa takwa?

¹⁰Jiji mutuwaˀa, ko mbur i doftor kwana, a caŋ ta, dana, mbur i buy, ti prike zivi timbirim.

¹¹Da mbur a muc le na, gwat mindiraŋ i muzurɗuɗu, gwat ngi ɓuhoy, waɗ mumuyuŋhoy tewle.

¹²Huhum vu, a zli ti pula Bumbulvuŋ, a slikiɗ ɓi avi mbur migi naŋ.

¹³Huhum vu, zli virzi naŋ i mungra, mbur macici zlak ar huhumo vu na, a gi mungra ti vendeke. Vurˀe Bumbulvuŋ a vula taŋ bonoy minjah wãˀ, a ngizla taŋ kuɗup.

¹⁴Bumbulvuŋ a putukuso misi gidaŋhaya le tir janga taŋhaya. a ci mizli miteˀteˀhey ar li taŋ.

¹⁵Bumbulvuŋ a muɗa muhuhumo vuhoyo le tir li taŋhaya, a ci mihina hirngahay ar li taŋ.

¹⁶Bumbulvuŋ a ngizla ruwuy ngi sukwi mekelemeye le, a ngizla taŋ fec fec hã avi dideˀ taŋhaya.

¹⁷A gwaha taŋ ti wuzla mizli, joˀ a ziza taŋ, Gwat ɓa a puraka hiri taŋ ava na, a susuyumo le leɗeɗ asi ruwuyo.

¹⁸Buymisemuŋ miga mizli na, ngi huhumo vu ta, yo a yaka taŋ na, ngi zuɓa huma fõh fõh ta ma.

¹⁹I sukwi wana mindila ɓa a ɗuvakaŋ hirnga naka? — I sukwi ngi mizli. I sukwi wana mindila ɓa a ɗuvakaŋ hirnga naka? — I mizli mazluwunam ti Bumbulvuŋ. I sukwi wana mindila ɓa a ɗuvakaŋ hirnga ta naka? — I sukwi ngi mizli. I sukwi wana mindila ɓa a ɗuvakaŋ hirnga ta naka? — I sukwi ngi mizli mangilaka ɓimuɗuvahay.

²⁰A hunumaka buyo, awuzla sukum naŋhay, amma naŋ kwana, a hunum muzluwun ti Bumbulvuŋhoy.

²²Majijaham asi a ra zluwunam ti Bumbulvuŋ na, i mizli micam wureˀ ar ɓi ngi Bumbulvuŋ, mulakay waɗ misi murgahaya.

²³Mbur misi murga, amma naŋ ti lesl na, a tuɓaŋ ki zaŋ ta, yo a zlir ngi ga dudok da mbur migi mungra ta.

²⁴Mbur madiɗaŋ, migi kiita waɗ yarma na, a gaka taŋ dudoko, amma ko pal asi taŋ mindila mbur mazluwun ti Bumbulvuŋ anta.

²⁵Mbur misi sin mijileŋ, ko da i gawla ngi mbur kwana, mizli dimuhoy a sa gam gawla naŋ jaka. mbur misi were kwana, anta sa lum mi ngi mbiɗaŋ di ta. Mbur mindila le ngi ɗuvaŋ hirngaŋ

²⁶Da ki ra gi slra na, ki gi kaɓa misi sin mijileŋ ta, Da ka ar bonoy madiɗa na, ki ga dudok da vu ɗike ta.

²⁷Mbur mahuhum vu, malum gwat ngi zum ta na, Zuwen mbur magi slra, naɓa a sa lum gwat didal hirnga naŋ.

²⁸Mangal ɗu, sina dudok ɗike, daˀ a kwacay ɗik tewle, ɗuva hirnga da vu ɗike, weˀe avi ka mindila le.

²⁹Mbur maga malambaˀ da vu naŋ na, masa pura naŋ jeŋ i waka? Mbur maɗuva hirnga da siifa nga naŋ ta na, masa gaŋ dudok i waka?

³⁰A hunumaka misi murga, asi sin naŋ ngi gi gwata gu, yo a hunumaka misi zlili asi zlili naŋ gu.

³¹Da a ra hunumaka mburo ar murga naŋ na, sokota naŋ ti zlili kwa? Amma da a ra hirsakaŋ ar zlili naŋ na, sokota naŋ misi ar murga kwa?