Read South Giziga Sir 11 Bible Online

Sir 11 - South Giziga bible

Sir 11

¹Mbur mihina hirnga misi sin mijileŋ, a gi ɗongoro gu, sin naŋ mijileŋ tuwa, a cifaŋ awuzla mizli madiɗahay. Ki ga kiita da mburo avi deŋ naŋ ta

²Ki ka hunum ɓaˀ ɓaˀ da mburo, asi kuy naŋ ta, ki pura mbur i malambaˀa, avi deŋ naŋ ta.

³A wuzla gwat maslikiɗamaya, mam i meciɗek taŋ, amma gwat mideɗek mindilaŋ anta.

⁴Ki jijih asi godo ɗike ta, tapas a ra gukuw dudok na, ki huhum ta, asi slra Bumbulvuŋ maga na, i ngi pur hiri ngal ngal, amma mbur mapura gu anta.

⁵Migi ngwat ti gidaŋhay haɗa, a pam sar le tutuɗuk tutuɗuk a ruwuy, amma mbur ma kam slimiɗ anga ta, a tuwuɗa hirnga le roŋ.

⁶Busukum ngivi dangwal ngi yarmahay haɗi, a diɗam le wãˀ, yo mizli muɗongoroyo, mizli a ra gam taŋ ka taŋ muwuɗam.

⁷Ki buca nburo daf ta, ɓaŋ daˀ le ɗagay, wuluk kpeˀ kwaɗay, a dirba nah, ki sa mbiɗaŋ hirngaŋ.

⁸Cina ɓe kuy kuy, a dirba nah, ki sa mbiɗa da mburo, mburo, a tika mingiɓi ta na, ki slaŋ di ta.

⁹Mizli matiram asi gwat mucuw ka ta na, ki ci a ra ta, ki ci ar tiri ngi mizli malambaˀhaya ta. Zlili ati murga

¹⁰Mangal ɗu, ki ru ti slra mbeˀ mbeˀ ar li purla ta, da slra a yi vu le avi ka na, naɓa k’anta sa ga gu ta. Ko da ki kil tika tika kwana, i ngataraŋ, k’anta sa pul vu avi slra, vur ka makil aka aka na ta.

¹¹Gi slra misi kanah na, a gir vu, sey ki wus vu, yo ma na, a guw murga ti gidaŋ jak ma.

¹²Mbur mekeleme, i mihĩyaŋ, mijini naŋ anta, gidaŋ naŋ anta, i misi murga muwãˀ naŋ, amma Bumbulvuŋ a ra puraŋ ti hiri mezleŋ, naŋ mahin hirnga na, a zuɓaŋ haŋ le paɗ a muŋ.

¹³A gaŋ ɗongor le yo a zuma hirnga le da mizli haɗi.

¹⁴Gwat mezle ati gwat malambaˀa, siifa ati mucu, murga ati zlili, taŋ cek asi haŋ Bumbulvuŋ.

¹⁷Gwat ngatara ngi Bumbulvuŋ, naŋ vur mizli miteŋteŋhey, a sa jigina taŋ ti mevel naŋ mezle na ngi sete.

¹⁸Mbur magi zlili na, asi naŋ maji lesl, yo a pus milef, amma migir naŋ, naŋ masa luma ani:

¹⁹Da naŋ mira ɓi: «I musuk vu gu muduba so, wurenna, i sa zum gwat ya muluma tahaŋ ɗu na,» a ndiraŋ hin kiteka na, a sina ta, dar a muc, a sa pula zlili naŋ tuwa da mizli. Bumbulvuŋ a mbiɗa kpak ngi mburo gu

²⁰Cici zlak ar slra ɗike, vula gidaŋ ɗike taˀ wãˀ, ndir a ra hã avi midigila ɗiki.

²¹Anja slra ngi mbur migi mungra, a zumuw hirnga ta, vula mevel ɗik da Bumbulvuŋ, yo hurdum ti slra ɗike hirdam, Gi zlili gurjik da mbur misi murga, a hahãŋ si na, i gwat mutuwaˀ avu Bumbulvuŋ ta.

²²Ɗuwula mi ngi Bumbulvuŋ, i migir ngi mizli miteŋteŋhey, ɗuwula mi naŋ, a dumo mbur a hahãŋ si.

²³«I ro ti may ngi mike? I zlili wana mikiciy aruŋ maka? na,» ki ɓi ta.

²⁴«Y’ada ti gwat ya mawuɗo gar si, I mendere ngi mi malumiy gu aruŋ maka? na,» ki ɓi ta.

²⁵Ar hin ngi mumulo, ki puyuk hirnga ti bonoyo, yo ar hin ngi bonoyo ya kwana, ki puyuk hirnga ti mumulo ya.

²⁶Wurka mbur weˀe avi gwat ngi gi naŋ, ar hin ngi muc naŋ na, naŋ tuwaˀ avi Bumbulvuŋ ta.

²⁷Pas ngi malambaˀ mubo le na, ki puyuko hirnga ngi hin mezleheye ceke, gwat mbur miga, a njiko tapas muc naŋ.

²⁸Da mbur a muc t’aruŋ na, ki ɓi: naŋ ar wuya na, ki ɓi ta, a sinaka mburo sey ar kiɗa mi naŋ. Sina wini ngama

²⁹Ki pula ko waka gar a ci a hay ɗike ta, muhuhumo vuhoyo, taŋ ti wer skat ngi tikina mburo.

³⁰Mbur muhuhumo vu, naŋ kaɓa tuuru mijaka le ar hay naŋ, a ra jiɗuw ka masa diɗe, kaɓa mbur mijiɗa li.

³¹A ngi diɓel, a mbiɗa gwat mezle a tiri di malambaˀa, Gwat mezle muwãˀ naŋ kwana, a lum mi ngi ɓi ava na si.

³²Vu mandisle, a nduvuɗ hã a tiɓi giw giw, diɓel ngi mbur malambaˀa, a kiɗ vu vagay.

³³Ji lesl avi mbur misi moˀore, a gijuw ɓi malambaˀa, a jupuw, hã slimiɗ ɗike a zil ti malambaˀ ngi set.

³⁴Da ki tiɓi mbur manja sin le a hay ɗike na, a cuw ar ɓi, yo a zlurukum dibiɗ ati mizli ngi hay ɗikey tehhe muŋ.