Read South Giziga Sir 12 Bible Online

Sir 12 - South Giziga bible

Sir 12

¹Ki jumom ati mizli mihirsa Buymisemuŋhoyo ta Da ki wuɗo gi gwat mezle da mbur na, sina buy naŋ sin le, joˀ a sa gukuw sise asi mezle ɗik ka miga na.

²Ga mezle da mbur miteŋteŋ, naɓa ki sa lum migir ɗike, Da mbur miteŋteŋ a vuluw ta kwana, naɓa Buymisemuŋ Mimadiɗa sa vuluw.

³Mbur macici zlak ar mungra, yo a ngum jina misi murgahaya ta na, n’anta mumul ta.

⁴Jina mbur miteŋteŋ, amma ko ki jina mbur migi mungra ta.

⁵Ga mezle da mbur mihina hirnga, amma ko ki vul gwat neˀ le da mizirɗa mi ɗike ta Buymisemuŋ, tuɓa gwat ngi zum naŋ, yo ki vulaŋ ta ma, vur naŋ malum di gidaŋ fineˀ ka, yo mezle ka migaŋ di le gar na, a sa wurukuw di ti malambaˀ makaw cuw.

⁶Buymisemuŋ Mimadiɗaa, anta wuɗ migi mungrahaya ta, yo a ga bonoy mindila le kaslsla da mizirɗa miheye.

⁷Vula gwat da mizli mezleheye, amma ko ki jina migi mungrahaya ta Jam lesl avi ngama malambaˀhaya

⁸A sinaka ngama, ti ka misi ar wuya ta, da ka ar bonoy na, i mesene ɗikey mabugukuw vu.

⁹Da mburo naŋ ar wuya na, mesene naŋhay a ndurɓom hiri, da naŋ ar bonoy na, ko ngama naŋ kwana a cuh kileŋ avaŋ.

¹⁰Ko ki vula mevel ɗik da mesene ɗike ta ndidaˀ wãˀ, asi moˀore naŋ na, aro sirit kaɓa ɓiri gaza mududuf le.

¹¹Ko da a hin hirnga le, a girdoˀo ti girdiˀ kwana, ka wi vu, yo ji lesl ava na si. Gi avaŋ kaɓa mbur mingirzla darogal, ko mbri, duduf naŋ na, a sa zuɓ na si.

¹²Ki cifa gweˀ avi ka ta, vur naŋ masa putukusuw, a tuɓa li ɗike. Ki cifaŋ i mijingaˀ ɗik ar slra ɗike ta, vur naŋ maŋhiya li ngi ɗike. Mingiɓi ɗu naŋ kaslsla na, ki sa sla wala nah aruŋ, ki sa gi: ay na, mingiɓi ɗu a cuh le si.

¹³Mbur mitikina vu malla mijigina gwat ngi ɓuhoyo, da kaw a kiɗaŋ le na, masa puraŋ ircece i waka?

¹⁴Naŋ kanah ya, ngama ngi mbur migi mungra, maci ar mungra naŋ na, anta likaka ta ya.

¹⁵Ki zikam haɗa ati mbur migi mungra ɓula, amma n’anta ɓuw ɓi ngi kwacay naŋ ta.

¹⁶Mesene ɗike, a ɓuw ti ˀay mezleŋ, amma a mevel naŋ, a wuɗ puw haŋ ng’ar vigiɗi. A tuwuy ti tuwuy asi ka ngbaŋ, amma da a luma jiviɗ naŋ le na, pumbus ngi ɗik pal ɗike, naŋ muk ava ta.

¹⁷Da gwat ngi mendere migi le avi ka na, a ndil dumbuŋ ar ka a ga vu naŋ kaɓa a kulo di widi ɗiki, dambalaka, a wuɗ ɓa a nduwu sar.

¹⁸A hizigiɗ hirnga deŋ, a kiɗ haŋ proˀ proˀ, joˀ a ɓi ɓi malambaˀ ar ka vol vol teˀ le ta.