Read South Giziga Sir 13 Bible Online

Sir 13 - South Giziga bible

Sir 13

¹Sara lum ɓi Mbur mija haŋ le avi mukuturɓuyo, a jupaŋ haŋ, mbur mandir ɓaˀ a hay muhuhumo vu na, a huhum ka naŋ vuna ya.

²Gwat mufunuw le ti dudok na, ki zuɓa ta, mbur migidaŋ fineˀ ka malla misi zlili fineˀ ka na, ki ndir ɓaˀ a hay taŋ ta. Gwat ngi hohoy ati gwat ngi ɓiri, a jumom mbri mbrike? da a zliram le na, gwat mindira ti hohoy a wuhu.

³Da mbur misi zlili a gi gwat mijeŋ ta le na, i naŋ maji mevel tehhe muŋ.

⁴Da ki pulaŋ gir gu na, a zumuw tam tam, da gir a guw le ya so na, a pulu fuk.

⁵Da gwat ada asi haŋ ɗike na, kum zlazlaɓ, a tuɓa avi ka talalaˀ, ko a caŋ ta.

⁶N’ada ti may ɗike kwa? A tukunuw ti tikin, a singiruw mur mur, ɓa ki pura ka mbur mezleŋ. a sa ɓu mi mideɗek, a cufuɗuw: «Gwat ka mawuɗ i guw di i gwat mike?»

⁷A sa puw mesem, a ziluw ngi zuma ɗaf ngi muguzlum, ka kwana, ki sa tika zlili ɗik ngi zil naŋ is cuw malla makir. A dirba nah, a sa singir ar ka, a hir hirnga ar ka deŋ, kum mizliram le na, a gi kaɓa a puru ta.

⁸Ji lesl, ki pula vu ɗik a tukunukuw ta, yo ki hin hirnga lambaˀ ka gilaw ta.

⁹Da mbur madiɗa a zuluw le ngi zuma ɗaf na, ko ki ngum ta, dar a sa hurdum ti ka hirdam.

¹⁰Ki wus vu kutum ta, vur naŋ masa ɓulo ka muŋ, amma so na, ki cici kileŋ ta, vur naŋ mapuyuk ti ka hirngaŋ.

¹¹ko ki zli ɓi ngi ɓam rak rak ati naŋ ta, ki tuɓa mingiɓi naŋ mukoloŋ koloŋ na ta, asi naŋ magi mi kwalĩkwalĩ na, i ngi ci a kwacay ɗiki. naŋ masunguruw mur mur na, a ra jiɗa wuluk ɗike.

¹²Mbur manjika ɓi ngi cil naŋ kpah kpah na, i mbur manja mesem, sina sin le, ko a bi ngi kiɗuw ma, a kiɗuw, ko a bi ngi kuw ng’ar dangay kwana, a kuw.

¹³Wi vu, yo ji lesl kuy kuy, asi ka maru na, ar li mazizi vu. Misi zlilihey ati misi murgahay

¹⁵Gwat misãmi gar a wuɗ cil naŋ mibam vu ati naŋ, yo mbur titira gar a wuɗ cil naŋ ya.

¹⁶Gwat misãmi gar na, a cifi sukwi naŋ sukwi naŋ, yo mbur titira ya kwana, a hin ti mbur titira ya.

¹⁷Gwat mujumo kiriɓuh ati zuŋ tumuŋ ada kwa? Mbur migi mungra ati mbur miteŋteŋ kwana, kanah ya.

¹⁸Motokoŋyo ati kiri, a cifam zuy zuy arleˀe gu kwa? misi zlili ati misi murga a cifam zuy zuy arleˀe gu kwa?

¹⁹A wuzla ɓuh na, zungu ɓuh i useˀ ngi moboroy, naŋ kanah ya, misi murgahaya, i li zum ngi misi zlilihey,

²⁰Mbur muhuhumo vu, a hirsa mbur muluɓ luɓo, naŋ kanah ya, misi zlili a hirsa mbur misi murga.

²¹Da ɓi a luma mbur misi zlili le na, ngama naŋhay a jinakaŋ, amma da ɓi a luma misi murga le na, ngama naŋhay a pulakaŋ fuk.

²²Da ko mbur misi zlili a zluɓ ɓi le kwana, mijini naŋhaya heɓeheɓe, ko da a ɓa me horof kwana, a ɓakaŋ naŋ jeŋ si. Amma da mbur mihina hirnga a zluɓ ɓi le na, a mbiɗakaŋ hirngaŋ, da a ɓa ɓi kasl kwana, ko anta puraka ka ɓi ta.

²³Da mbur misi zlili a ra ɓi na, mizli a taˀaka mi siriw, a ŋhiyaka mingiɓi naŋ. Da misi murga a ra ɓi na, a ɓakaŋ: «Ki waka?» Da sar a baŋ le na, a pakaŋ haŋ ɓa a diɗ wãˀ.

²⁴Da ki luma zlili ti jiviɗ naŋ na, i gwat mezle, amma avi mizirɗa miheye, murga i gwat malambaˀa.

²⁵Gwat misi a mevel mburo, mezle ati malambaˀ gar na, a pur avi hiri naŋ.

²⁶Mbur masingir mur mur na, a buga mevel naŋ a hin le, amma ɓa ngi luma mi ngi wuya na, sey ki wuluk tuwaˀ tuwaˀ kwaɗay.