Read South Giziga Sir 15 Bible Online

Sir 15 - South Giziga bible

Sir 15

¹Mbur mazluwun ti Bumbulvuŋ na, a ga gwatakahana so. Mbur buy ngi ɓi Mujuwa na, a sa lum sin mijileŋ.

²Sin mijileŋ a sa ji di hirngakaɓa i mumuŋ naŋ, a sa tuɓaŋ kaɓa diyli mungbuˀo matuɓa zil naŋ.

³Sin mijileŋ a sa vulaŋ gwat ngi zum mavulaŋ lesle, a sa vulaŋ yam ngi si mavulaŋ sin mijileŋ.

⁴A sa ginisl ti naŋ, ko a bujungusl ta, asa gumbuˀ di, ko anta sa ndir mesem mesem ta.

⁵Sin mijileŋ a sa tiri di madiɗa angi midigwi naŋhaya. Da a ra ɓi awuzla mizli na, i sin mijileŋ masa njikaŋ mingiɓi.

⁶A sa lum mumul waɗ tuwuɗa hirnga ngi jiɗa meceŋceleŋ, slimiɗ naŋ a sa zil ngi sete.

⁷Amma gilaway anta sa lumam sin mijileŋ ta, migi mungrahay anta sa puraka ti hiri vuna ta.

⁸Sin mijileŋ naŋ kileŋ avi mbur muhuhumo, anta sa so keŋ ar wuluk ngi misi slireye ta.

⁹A zlir ɓa migi mungrahay a hunumaka Bumbulvuŋ ta, asi mislino di i Bumbulvuŋ ta.

¹⁰Maga ɓa mbur a hunuma Buymisemuŋ na, i sin mijjileŋ, i Bumbulvuŋ vuna majukuw di. Mbur a muca kwanay a duba sar naŋ

¹¹Ki ɓi: «I Bumbulvuŋ vuna mubuˀiy avi jiviɗe na,» ki ɓi ta, asi gwat Bumbulvuŋ mahirsa na, anta ga ta.

¹²Ki ɓi: «Bumbulvuŋ vuna a ziziy le na,» ki ɓi ta, asi n’anta ti may ngi migi mungrahaya ta.

¹³Bumbulvuŋ a hirsa gwat mukuyta wãˀhay gar, mizli miteŋteŋ naŋhaya taŋ kanah ya.

¹⁴Ar zli virzi ngi gwatay gar na, Buymisemuŋ a gi mburu, joˀ a pula a gi ka naŋ muwuɗu.

¹⁵Da ki wuɗ le, ki sipa ɓimuɗuvahaya gu, gi teŋ teŋ avi Buymisemuŋ na, a gi avi mevel ɗiki.

¹⁶Vu waɗ yama, a pula taŋ le mbak a mbuŋ ɗike, wini asi taŋ, ɓa ki ca haŋ ng’ara so.

¹⁷Buymisemuŋ a ɓa ɓi ngi siifa ati muco daˀ daˀ le da mizli, sey da mbur miwini le asi taŋ, ɓa a vulaŋ di.

¹⁸Asi sin mijileŋ avi Bumbulvuŋ naŋ haɗa, naŋ gidaŋ haɗa, yo a pura gwat gar.

¹⁹Aro hiri taˀ avi mizli mazluwunam di, naŋ vuna, a sina gwat mizli magaka le gar.

²⁰A ɓi mbur daˀ le ɓa a ziriɗ mi ta, a pul jiviɗ daˀ da mburo, ɓa a gi mungra ta ma.