Read South Giziga Sir 16 Bible Online

Sir 16 - South Giziga bible

Sir 16

¹Buymisemuŋ naŋ ti mevel mezleŋ, amma a cici kaŋ kaŋ ar gwat naŋ mawuɗo Yi ziri ngweɗeŋ ngweɗeŋ, da gwat ngi gi taŋ anta na, naŋ kuy ta. Da ziri ɗik mizilehey a ra zirɗaka mi ngi Buymisemuŋ na, ki jijih asi ki yi mizilehey le si ta.

²Da ziri ɗikey mihaɗa, anta zluwunam ti Bumbulvuŋ ta na, Ki jijih vur taŋ haɗa si ta.

³Ki ɗuva wuluko taˀ, a sa zikam haɗa na, ki ɗuva ta, ki ɓi sar jah jah: ziri ɗuwoyo kweslekwesle na, ki ɓi ta, mangal purla a funa ziri durmuko le, yo muc manja zuŋ, a funa muc awuzla ziri mizirɗa mi ngi Bumbulvuŋhoyo le.

⁴Mbur misi lesl purla, a ji a naha walahaya, amma hilfa ngi mizirɗa miheye, a sa susuyumokoŋ.

⁵Sukwi ngi gwat misi ka tayna, i pur le ti hiri ɗu, yo wi ɓi ti wi mifineˀ tay na, i cin le ti slimiɗ ɗu.

⁶A wuzla migi mungrahay micikilam le na, himaˀ ngi Buymisemuŋ a bul vu, angi mizli mislikiɗa ɓiheye, mevel ngi Buymisemuŋ a tiɓi ka vu.

⁷Mizli suburohoy misi zlezle, mislikiɗam ɓi vur taŋ migidaŋ na, Buymisemuŋ a pula taŋ mungra taŋ ta.

⁸A walahay ngi Loto teˀta, asi huhumo vu ngi mizli ngir walahay nah, a gaŋ kuyta wãˀ.

⁹Kanaˀanahay, mizli mihĩˀĩ ngi ziziheye, Buymisemuŋ a pura taŋ ircece ta, a ngizlaka taŋ kuɗup asi mungra taŋ.

¹⁰Ko Israyeley mudurmuk skat skat merkeɗ, micikilam asi mevel taŋ migidaŋ na kwana, a mucam le ya.

¹¹Da ko i mbur purla asi taŋ misi hirnga gidaŋ, da a ndiram le manja a kutaka taŋ ti bonoyo na, naɓa a zuma hirnga da mizli. Asi pura ircece ati mevel mufõh fõh i ngi Buymisemuŋhoy, naŋ gidaŋ haɗa ngi pula mungra, amma a slikiɗ huma ma.

¹²A pur ircece haɗa, a zuɓ huma haɗa ma, a ga kiita da mizli weˀe avi gwat ngi gi taŋ.

¹³Migi mungra, n’anta sa kil ti gwat naŋ muluma ar vurumo gu ta, amma mizli miteŋteŋhey maɓusam ɓi na, anta sa pulaka taŋ mesem mesem ta.

¹⁴Buymisemuŋ a juw vu le ndrehhe ngi pura misi murgahaya ti hiri mezle, amma a sa gi ti mburo weˀe avi gwat ngi gi naŋ. Ki lih avi Bumbulvuŋ gu ta ndidaˀ

¹⁷Ki ɓi: «I sa ɗum avi Bumbulvuŋ, kal kal a muŋ adiga, masa siniy i waka? A wuzla zuguduw mitimbiɗim hana, anta sinikiy ta. Na zle yi wa, ɓa a sinikiy awuzla gwat misikinih Buymisemuŋ miga taŋ naka na?» Ki ɓi ta.

¹⁸Asi birngiŋ waɗ nga duba birngiŋ, li mijileŋ waɗ ruwuyo, da Bumbulvuŋ a so le nga pur taŋ na, a wusam hiɓik hiɓik.

¹⁹Muŋwahay ati si virzi ngi ruwuyo, da Buymisemuŋ a pura taŋ le keɗ na, a jijikam kər kər.

²⁰Amma gar ti nah kwana, anta wulkam ta na si, mbur maji lesl avi gwat ngi gi ngi Buymisemuŋ i waka?

²¹Burkataŋ a gi gurjik, ko mbur misina anta, vendeke ngi gwat ngi gi ngi Buymisemuŋ, mbur masina anta.

²²Gwat ngi gi naŋhay mijeŋŋe na, masa til di mi i waka? makutuko taŋ i waka? Jumoˀay ngi Buymisemuŋ ati mizli naŋ kileŋ!

²³Mbur manja lesle, a wuluk kahana so: mbur gilaw ati mbur miziza, a wulkam wuluk ngi mibirgahay. CIKILA HIRNGA NGI DUBUN MUCUW NAŊ Cinjaha gwat, Buymisemuŋ miga taŋ

²⁴Mangal ɗu, cin ɗi, dubuna sin ɗu, ɓi ya maɓa na, ga ti mevel ɗik wãˀ.

²⁵I sa njikuw dubun ɗu ti jiviɗ naŋ, sin ɗu, i sa tiluw di mi kasl kasl.

²⁶Angi zli virzi naŋ, ti Bumbulvuŋ miga slra naŋ na, a ngica taŋ ar li taŋ ar li taŋ.

²⁷A ɗiya gwat ngi muŋhoy ti jiviɗ naŋ ti jiviɗ naŋ ngi sete, zle angi ɗuva virzi naŋ hã nga mbuŋ kileŋ. May a ja taŋ ta, yo anta giram ta, a buluwaka slra taŋ ngi gi daˀ ta ma kini.

²⁸Ko gwat miba sar daˀ da cil n’anta, ɓa a cinaka mi da ɓi ngi Buymisemuŋ ta na anta.

²⁹A dirba nah, Bumbulvuŋ a puro hiri nga ruwuy, joˀ a mba ruwuyo ti gi mezle naŋ.

³⁰A naha ruwuyo heɓeheɓe ti sukwi ngi gwat misãmihey, ɓa a dirba taŋ mumucam le na, a mam nga ruwuyo muŋ.