Read South Giziga Sir 17 Bible Online

Sir 17 - South Giziga bible

Sir 17

¹Gwat sey mizli a gaka da Buymisemuŋ Bumbulvuŋ a ga mbur titira ti ruwuy, dar a sa mi di ng’ara muŋ ma.

²A sa hine le da mizli a ruwuyo, a tuwuɗaka ta, a cifa taŋ i buyoy ar gwat ngi ruwuyoyo.

³A ga taŋ, a bam vu ati naŋ, joˀ a vula taŋ gidaŋ ka nga naŋ vuna ya.

⁴-SIR 11:15A ga ɓa gwat misi titiri gar a zluwun di, ɓa a cifam, taŋ i buy ngi gwat misi sar mufaɗay ati ɗiyuwoy.

⁶A vula taŋ gi kiita, mingiɓi, hiri slimiɗi waɗ lesl ɓa a wulkam.

⁷A naha taŋ ti sin waɗ lesle. A buga taŋ gi mezle ati gi malambaˀa.

⁸A ga ɓa mizli a zluwunam di a mevel taŋ, ɓa a buga taŋ gwat mezlehey naŋ miga taŋ.

¹⁰Ɓa a hunumakaŋ ti slimiɗ naŋ mipal na, a slufaka gwat mezlehey naŋ miga taŋ na a raŋ. Ɓimujuwa misi jumoˀay

¹¹Bumbulvuŋ a vula ɓi mijuwa mavul siifa da mburo, bac nga hirnga sina gwata ma.

¹²A ɗiyi ɓi ngi jumoˀay ngi set ati taŋ, yo a dubuna taŋ ɓi naŋ mujuwa a mevele.

¹³A puraka dudok ngi Buymisemuŋ le ti hiri taŋ, A cinaka ˀay naŋ mimezle na le ti slimiɗ taŋ.

¹⁴A ɓa taŋ na: «Jam lesl avi gwat mijeŋ ta gar», a ɗuva taŋ ɓi da mbur gar, vur ɓi ngi cifi awuzla mizli. Bumbulvuŋapura gwataya gar

¹⁵Bumbulvuŋ a ro hiri taˀ ngi pura gwat ngi gi ngimizli ar pas gar, ko t’anta ɗumom a mi hiri naŋ ta.

¹⁷A vula buy da sukwi gar, amma Israyele i mi nga naŋ Bumbulvuŋ.

¹⁹Avi Bumbulvuŋ, gwat mizli magaka gar na, naŋ kaɗaŋ kaɗaŋ kaɓa papasa, hiri naŋ a ro taˀ avi gwat ngi gi taŋ.

²⁰Gwat mijeŋ ta taŋ magaka, anta ɗum ava ta, mungra taŋ a ro njak a mbuŋ Bumbulvuŋ.

²²Gwat mbur mavula da misi murga na, a mbuŋ Buymisemuŋ naŋ kaɓa ɗuva haŋ ar ɗerewol, gwat mezle mbur miga le na, a wi di vu ka zingaˀ hiri.

²³Ar kiɗa mi naŋ na, Buymisemuŋ a sa slikiɗ ngi wurka mizli, a sa wurka taŋ weˀe avi gwat ngi gi taŋ.

²⁴Amma da mizli mizila ma ravaŋhaya, a pula taŋ jiviɗ ngi mo ng’avaŋ, mizli miŋhihiyam le na, a vula taŋ gidaŋ. Zila vu ngi mo ng’avi Buymisemuŋ

²⁵Mo ng’avi Buymisemuŋ, pula mungra, tumbulo gidaŋ naŋ, naɓa mungra ɗikey a ngicam avra.

²⁶Mo ng’avi Buymisemuŋ Mimadiɗa, mbiɗi duba da gwat mijeŋ ta. Gwat mukuyta wãˀ na, hirsa wãˀ.

²⁷Buymisemuŋ Mimadiɗa, masa hunumaŋ ar li ngi mizli mucahay i waka? magakaŋ sise mizli misi ti siifahay!

²⁸Da mbur a muc le, a kiɗ mi le na, gi sise anta ava mata, magaka sise da Bumbulvuŋ i mizli miwirwir misi ti siifahay.

²⁹Pura ircece avi Bumbulvuŋ haɗa, yo a pula mungra ngi mizli mabuɗam hiri ng’avaŋ!

³⁰Gi gwat gar gu na, i ɓi ngi mizli ta, asi mbur titira mamuc ta na anta.

³¹Gwat mufuna pas ti pusluɗa li ada kwa? Na ar li mekeleme, a tiri sikiɗiffe ngbaŋ. Mbur titira mawuluk ngi gi mungra na, naŋ kanah ya.

³²Buymisemuŋ a ra jigina buy vurum ngi muŋhoyo, amma mizli titirahay gar, i murɓuk ati fucu ngata raŋ.