Read South Giziga Sir 18 Bible Online

Sir 18 - South Giziga bible

Sir 18

¹Bumbulvuŋ i madiɗaŋ Bumbulvuŋ misi ti siifa ngi sete, a ga gwataya le, ko loŋ a ndir ta.

²A zilam mbur mijeŋŋe na, sey i Bumbulvuŋ pal naŋ.

⁴Gwat naŋ masa ga na, a pul jiviɗ daˀ da mbur ɓa a til di mi ta, Gwat madiɗahay Bumbulvuŋ taŋ na, masa sina gu i wa maka?

⁵Gidaŋ nga naŋ buyo, matoho, a bi ani ani gu i waka? Masa slufa ɓi ngi gi mezle naŋ mihaɗa na gu i waka?

⁶Mbur a ngica avra gu ta, a pi nga meˀe gu ta, ɓa mbur a sla wala ngi gwat mezlehey Bumbulvuŋ maga taŋ na, a gi ta.

⁷Da mbur a wa kaɓa a kiɗa mi ngi sluf naŋ le na, naɓa a zli virzi naŋ ti zli, da a cica le na, a sina zli vizi naŋ kini mata. Mbur i gwat ngatara lambaˀ

⁸Mbur i gwat mike? A pul gir ngi mike? Gwat mezle malla malambaˀ naŋ maga na, a mbiɗi avra mbrike?

⁹Da mbur a ndila vi skata le na, naɓa a gi vu le.

¹⁰Vi miskat nah, avi zik ngi vi matiki ta, naŋ kaɓa yam teŋ ng’ar mubuliy, kaɓa mengeleleŋ ngi muyuŋ a ˀaydidik.

¹¹Vurˀe, Bumbulvuŋ a ra ndi ɓi avi mizli titirahaya, yo a ra ga taŋ mezle.

¹²Kiɗa mi ngi mburo, naŋ ti ndurɓo hiri, Buymisemuŋ a ra pura, yo a sina le kuy kuy, naŋ mapura taŋ ircece nga mbuŋ nga mbuŋ na vurˀe.

¹³Mburo, a pur ircece da mbur cil naŋ, amma Bumbulvuŋ a pur ircece da mbur gar. A mbiɗa taŋ hirnga, a sirika taŋ, a dubuna taŋ gwat, a mo ti taŋ kaɓa mijigin mamo ti ginew naŋhay mitaˀ gezleŋ.

¹⁴Mizli mawuɗam dubuna gwat, yo mizli miwirwir ngi sipa gwat naŋ mujuwa a mevel naŋ na, a pura taŋ ircece. Jiviɗ mezle ngi jina mbur

¹⁵Mangal ɗu, da ki ra gi mezle da mbur na ki mbuɗaŋ hirnga cici ta. Da ki ra vul gwat ngatara da mbur na, ki ɓaŋ mi ngi ji mevel cici ta.

¹⁶Wulng’ar a tisla li takwa? Naŋ kanah, mingiɓi a funa gwat ngi vul ngatara gu.

¹⁷Mingiɓi mezle a funa gwat mupuɗaw mavuluku di takwa? Mbur mawuɗ vu a vula taŋ jom cuw taŋ.

¹⁸Mbur gilaw a mbiɗa hirnga da mburo lambaˀa si, gwat ngatara mbur misi suloŋ mavula, a guw tuwuy. Mbur misi sin mijileŋ a wi vu

¹⁹Sina gwata sin le kwaɗay, ɓa ki sa ɓi a dirba. wi vu ti vu ɗike vur jiji majuw.

²⁰Ɓa a sa gukuw kiita tikeˀe na, pura malambaˀ ɗike kwaɗay, naɓa ti taŋ masa cufuɗukuw ɓa ki slufa ɓi ɗike na, a sa pulukuw mungra.

²¹Ki kutuk jiji a juw kaw le, ɓa ki sa hin hirnga ta. amma daka migi mungra le si na, buga ki ra zil marava.

²²Anja gwat a tukuw ngi ja mi ngi Bumbulvuŋ ar hin ka muwuɗ le ta, ki kutuk ɓa ki sa ja mi naŋ seŋ ar muc ɗik ta.

²³Da ki wuɗ ji mi ngi Buymisemuŋ na, sey ki juw vu le, ki gi kaɓa mbur mawuɗ ci a kwacay Bumbulvuŋ ta.

²⁴Wuluk ar himaˀ ngi Buymisemuŋ masa guw bonoy ar hin ngi kiɗa mi ɗiki, ar kuti ti bonoy tapas Buymisemuŋ masa mbiɗi duba avi ka na.

²⁵Ar vi ngi dawa, wuluk ar may masa gi. Ar vi misi gwat ada asi haŋ ɗike, wuluk ar hin ngi murga misi gwat ɗik anta neˀ ta.

²⁶Zle ti miprik hã pastaˀ na, li a mbiɗi le, gwat gar a gi avu Bumbulvuŋ kutum.

²⁷Misi sin mijileŋ, i mbur miwi vu le ndrehhe, da mungra a ra ɗiɗaŋ na, anta gi vagas neˀ le ngi lih ti ra ta.

²⁸Mbur misi lesl gar na, a sina sin mijileŋ le, yo mbur muluma le na, sin mijileŋ a ɗuvaŋ hirngaŋ.

²⁹Mizli misina miheye, a ra bugaka sin taŋ mijileŋ ya, a ra zliɗaka mingiɓi taŋ misinaka le kuy kuyo, kaɓa vuŋ mazliɗi. Wi hirnga ɗiki

³⁰Ki pula vu ɗike da may gwat a ɗiɗuw ta, ji lejeŋ avi may gwata.

³¹Da ki ra kiɗa may ngi may gwat maju gar na, a sa tiri ti ka, ngama ɗikey a sa singiram ar ka.

³²Anja ki cir hiri ngi ɗike ti gi gwat ngi may gwat ta, vur naŋ masa mbiɗi sey ki wurka ti wuruku.

³³Da birtete ɗik a gi le njoŋ na, ki didiɗ dala ngi gi muguzlumo ta, vur ka mavusu.