Read South Giziga Sir 19 Bible Online

Sir 19 - South Giziga bible

Sir 19

¹Mbur magi slra gu, amma a si mbaazla haɗa na, n’anta gi zlili ta, mbur mapura gwat memeɗeheye ka gwat ta na, sekvu sekvu na, a sa sli.

²Mbaazla ati ngwasaya, a ra zizaka zil misi lesleye. Mbur masipi burvulahaya, sekvu sekvu na, n’anta sa wa vu naŋ gu ta.

³Gwat ngi gi naŋ nah, a hizigiɗaŋ ng’ar mucu, joˀ mumuyuŋ a sa zuma vu naŋ mazĩˀĩ na. Gi mi a suw ti ɓi

⁴Mbur matuɓa mi ngi mbur kutum na, i mbur mawuluk ta. Mbur magi mungra na, a gi di malambaˀ da vu naŋ.

⁵Mbur macir hiri ti malambaˀa, a sa jakaŋ ti kiita.

⁶Mbur mahirsa gimi mikwalĩ kwalĩ na, a lihi avi malambaˀa.

⁷Mbur miɓa ɓi le na, ki ɓa ya ta, naɓa ko gwat ɗik masa zizi neˀ anta.

⁸Ko ki sluf ɓi ngi mbur ta, ko ngi ngama ɗiki, ko ngi mesene ɗiki. Da teˀ teˀ ɗik a cuw ar ɓi na, haˀaw ɓula, dakanah ta na, ko ki njik ɓi neˀ ta.

⁹Vur mbur ka maɓa ɓi naŋ na masa cin, joˀ a zluwun ti ka, yo da pas naŋ misa bo le na, a sa hirsuw.

¹⁰Da ki cin ɓi le na, muc di pam a kwacay! purakaɓa ɓi ta, ko gwat masa buga anta.

¹¹Mbur manja lesl micin ɓi le na, a gaŋ a kwacaya koɗo koɗo, kaɓa ngwas kwacay majaŋ ngi yi.

¹²Ndir ti ɓi ngi mbur teˀ a kwacay na, avi mbur manja lesle, naŋ kaɓa luvut miŋsiw ar tuwal naŋ. Ka micin ɓi le na, wunjula kuy kuy ɗagay

¹³Da ki cin ɓi malambaˀ le a hirnga ngama ɗike na, cufuɗa kwaɗay, a sin ta, a ɓi ɓi neˀ ta kwani, amma da a gi gwat le na, ɓa a ma hiri naŋ mata.

¹⁴Da ki cin le, midigwi ɗik a gi mbaɗa le na, cufuɗa kwaɗay, a sin ta, a ɓi kanah ta kwani, yo da a ɓi le kanah na, ɓa a ma hiri naŋ mata.

¹⁵Mizli a jam ɓi gbiŋ gbiŋ lambaˀ da mizli, cufuɗa ngama ɗike ɗagay, ki tuɓa mi ngi mizli maɓaka na gara si ta.

¹⁶Mi i gabal mifiliw, amma mekeleme, a bo tir wuluk malambaˀ ta ngbaŋ, mbur milih mi daˀ ar mingiɓi naŋ ta i waka?

¹⁷Cufuɗa midigwi ɗike ɗagay, ɓa ki sa bucaŋ, pula ɓimujuwa ngi Buymisemuŋ Mimadiɗa, a ga slra nah. Sin miijileŋ migisiŋ ati migisiŋ ta

²⁰A sinaka sin mijileŋ avi mbur mazluwun ti Bumbulvuŋ, angi sin mijileŋ gar na, sipa ɓimujuwa ngi Bumbulvuŋ ada angaŋ.

²²Amma sin ngi gi gwat malambaˀa, i sin mijileŋ ta ɓula. sipa kuti ngi migi mungrahaya, i ɓi ngi lesl ta.

²³Sina gwat mekeleme mukuyta wãˀ ada, mbur manja sin mijileŋ na, i manja lesle.

²⁴Mbur manja lesl mazluwun ti Bumbulvuŋ na, a funa mbur misina gwat mangila ɓi mijuwa ngi Bumbulvuŋ le.

²⁵Sina gwat mukuy kuy wãˀ maru ti mbur ng’ar malambaˀ ada, yo mizli a gam di slra ngi luma gwat taŋ mawuɗam.

²⁶Ki pura mbur mekeleme, a ru hirnga jik a ruwuy kaɓa bonoy a funaŋ le, amma ti kwacay naŋ, a tikin di mizli ti tikin.

²⁷A ɗumo hiri ɗum, a gi kaɓa midigizla, yo da mbur miki slimiɗ anta so na, naɓa naŋ a funuw le si.

²⁸Mbur mekeleme, a ngum gi malambaˀa ta na, asi gidaŋ ngi gi naŋ misi anta, da a luma jiviɗ naŋ le na, a ga kutumo si.

²⁹Ki pura mburo keɗ keɗ na, ki sinaŋ, ki pura cum cum avi hiri na, da i mbur mezle, ki sinaŋ.

³⁰Ki zana naŋ avu vu, singir naŋ, ati ru naŋ, a buga mbur mezle ati mbur malambaˀa.