Read South Giziga Sir 2 Bible Online

Sir 2 - South Giziga bible

Sir 2

¹Mbur miteŋteŋ misi ar bonoy Mangal ɗu, da ki wuɗ gi gawla ngi Bumbulvuŋ na, juw vu ngi ji hirnga ti bonoy.

²Ɗiya mevele, ɓa a cici deŋ purla, yo cici zlak, da bonoy mulumuw le na, ki gi gigisl ta.

³Jum ng’avu Bumbulvuŋ, ki kirih tiva ta, naɓa ki sa kiɗa mi ngi hin ɗike ti zlili.

⁴Gwat magi avi ka gar na, tuɓaŋ, da pas a bo le ngi hina hirnga na, ɓusaŋ.

⁵Asi ɓa a bam ti malambaˀ ngi ɓiri hirng’avra na, sey a luwuslaka ar vu kwaɗay, mizli ngi Buymisemuŋhoyo kwana, a sinaka taŋ angi bonoy mubul vu le ya.

⁶Pula mevel ɗik da Buymisemuŋ, naɓa a sa jinuw, sipa jiviɗ ɗike cir cir, yo ɗuva wuluko taˀ aseˀe.

⁷Kum muzluwun ti Bumbulvuŋhoy, njaham hiri asi ircece naŋ, ki mbuɗam duba ava ta, vur kum madiɗam.

⁸Kum muzluwun ti Bumbulvuŋhoy, pulakaŋ mevel kumoyo, migir kumo anta sa zizi ta.

⁹Kum muzluwun ti Bumbulvuŋhoy, njaham hiri asi gi mezle naŋ, asi cira hiri ngi set waɗ ircece naŋ.

¹⁰Puraka dideˀ kumoy mucohomo keɗ keɗ ɗi, mbur mupula mevel naŋ da Bumbulvuŋ asi taŋ, ɓa a pulakaŋ le mesem mesem vuna i waka? Mbur muhurdum hirdam ngi muzluwun ti Bumbulvuŋ, ɓa a pulakaŋ le fuk vuna i waka? Mbur mizilaŋ, yo a zilaŋ mi ta vuna i waka?

¹¹Asi Bumbulvuŋ i mbur mezle mapur ircece, a pul mungrahay, yo a laha mbur misi ar bonoyo.

¹²Mizli mihĩyahay, yo matumom vu gu ta, migi mungrahay masipam jiviɗ jom cuw arleˀe na, taŋ ar bonoy.

¹³Mbur mambur mbor ta, mapula mevel naŋ da Buymisemuŋ ta na, naŋ ar bonoy, Buymisemuŋ anta sa cik vu ar taŋ ta.

¹⁴Kum mahurdumom hirdam ta na, kum ar bonoy, tapas Bumbulvuŋ masa cufuɗa gwat ngi gi kum na, ki sa gam mbrike?

¹⁵Mizli muzluwun ti Bumbulvuŋhoy na, t’anta slam himaˀ avi ɓi naŋ ta ndidaˀ. Mizli mawuɗakaŋ na, a sipaka jiviɗ naŋ.

¹⁶Mizli muzluwun ti Bumbulvuŋ na, a gakaŋ gwat ɓa a cir hiri, mizli mawuɗakaŋ na, a zumaka ɓimujuwa ka ɗafa.

¹⁷Mizli muzluwun ti Bumbulvuŋhoy na, a wam vu le weˀ a mevel taŋ, a hinam ˀay a mbuŋ naŋ, a ɓam:

¹⁸«A tuɓaŋ na, i cam ng’asi haŋ ngi Bumbulvuŋ, a funa ndra macam ng’asi haŋ ngi mbur titira na le, asi Buymisemuŋ, naŋ mimadiɗa tuwa na, pura ircece avi naŋ haɗa ya.