Read South Giziga Sir 20 Bible Online

Sir 20 - South Giziga bible

Sir 20

¹Anja kisina li zliv ki ɓi malla ki cifi teˀ teˀe Pas mekeleme, a bucuka mburo ngataraŋ, mbur miteˀteˀe, a bigi naŋ ti lesle.

²Amma mbur mambiɗi mi na, a funa mbur miteˀteˀ ti mevele le.

³Mbur masina malambaˀ naŋ na, naɓa ɓi anta a hiryi ava ta.

⁴Mbur mawuɗ pula bol ti gidaŋ na, a bam vu ati mbur munguɗo maji zuŋ diyli ɓa a hin di.

⁵Mbur mekeleme, naŋ teˀ teˀe, a bigi i mbur misi sin mijileŋ, mekeleme, a gimi haɗa, a bigi moˀore naŋ.

⁶Mbur mekeleme, naŋ teˀ teˀe, asi a sina a mbiɗa kini ta, ɓa a sa mbiɗakasl ar li mijam haŋ le.

⁷Mbur misi sin mijileŋ, naŋ teˀ teˀe, a sa ɓi ar li mijam haŋ le, amma mbur magi zlokoko ati mbur manja lesle, a pulaka li mijam haŋ le ngi ɓi tuwa, hã a cuhu.

⁸Mbur masika mi koloŋ koloŋ na, a sa hirsakaŋ, na mbur miteˀteˀ fineˀ gidaŋ na ma na, i misi moˀore. Gwat mijam haŋ ta

⁹Da mburo bonoy a lumaŋ le na, pas mekeleme, a lum di gwat pas mekeleme kwana, luma gwata, a hirya mburo.

¹⁰Gwat ngata raka mavula da mburo, anta puluw gir ta, na mekeleme, a puluw gir makaw cuw.

¹¹Mekeleme, gi ɗongoro, a ma mburo nga ruwuy, yo mekeleme kwana, mbur mahin hirnga na, a gaŋ le ɗongor.

¹²Mbur mekeleme, a hiɗik gwat haɗa ti dala neˀkini, amma dambalaka a hiɗika na, didal hirnga nah makaw tarnaˀ.

¹³Mbur misi sin mijileŋ, a ɓi daˀ si na, mizli a wuɗakaŋ. amma mbur gilawa, a hirya mi mideɗeke vol vol lambaˀ.

¹⁴Gwat ngata ra mbur manja lesl mavuluw di na, anta puluw gir neˀ le ta, asi a ro hiri taˀa, ɓa ki vulaŋ fineˀ naŋ muvuluw di na.

¹⁵A vuluw le gizit na, a ɓuw me suweˀ, ˀay paɗ a muŋ kaɓa mbur migi terere ar luma. Da mbur a didiɗ gwat le avaŋ dana na, ti prik na, a ra cufuɗa si. Mbur misi kahana, i mbur ngi hiris!

¹⁶Mbur gilaw a ɓi na: «Ko ngama ɗu anta, mezle ya maga na, ko mbur matuɓa anta, muzuma ɗaf ngi hay ɗuwoyo, i misina vuhoy ta.

¹⁷Pas mekeleme, mizli a singiram anga! Ki lih mi ta

¹⁸Ka malih mi na, zuwen ka maslir, ki diɗ a jiviɗi. mbur misi moˀore a diɗ gurjik vuna ya.

¹⁹Zuŋ migila manja kuti, naŋ kaɓa maslufaka, mijam haŋ ta, mizli manja lesley mandiram di ngek avi mi.

²⁰Mbur gilaw maɓi ɓi ti kucuwulo, mizli anta tuɓaka ta, asi n’anta ɓakasl ar li naŋ ɓa a jam haŋ ta.

²¹Mabi ti mburo cimak tir mungra sey i murga, taŋ a hinjam fuk gwesl.

²²Amma mizli mazizaka hirnga taŋ tahaŋ taŋ asi mizli manja lesleye ada, asi t’anta ɓam ĩĩ gu ta!

²³Mbur mekeleme, a pura mburo ka mbur, da a ɓa ngama naŋ le, a sa vulaŋ gwat na, joˀ a tiram i mesenehey ngatara lambaˀ.

²⁴Gi slirer i gwat mukop avu mbur, magaŋ mesem kuyta wãˀ, Mizli gilawaya, a ndiram di ngek avi mi.

²⁵Mbur muhulo, a funa mbur magi slir mbak le ta na le, amma taŋ cuw taŋ a sa zizam ɓula.

²⁶Mbur misirka gi slire le na, a vula futuru da mizli, yo naŋ vuna a ndir ti mesem ndrehhe. Gwat ngi lum ati gwat ngi gi ngi mbur misi sin mijileŋ

²⁷Maru ti mbur misi sin mijileŋ nga mbuŋ i gwat haɗa ta, yo mbur misi lesle kwana, mizli madiɗahay a puraka kuy.

²⁸Mbur muhuv mezle, a cikila daw a məlaŋ paɗavra avra, mbur misi mizli madiɗahay a puraka kuy na kwana, da a gi gwat mijeŋ ta le na, a pulakaŋ di teˀe.

²⁹Gwat ngata raŋ ati gwat ngi muvula, a hirya mevel ngi mbur misi sin mijileŋ, naŋ kaɓa taɓak macaka a mi zungu, a tikaŋ ngi mbiɗa hirnga da mizli.

³⁰Sin mijileŋ muɗum na, naŋ kaɓa zlili midika a ruwuy, taŋ cuw taŋ anta pulam gir ngi mike?

³¹Mbur gilaw mandir ti gilaw naŋ teˀ a kwacay na, a funa mbur maɗumo sin naŋ mijileŋ na le.