Read South Giziga Sir 21 Bible Online

Sir 21 - South Giziga bible

Sir 21

¹Kil ti mungra Mangal ɗu, ki gi mungra le kwa? Ki ma hiri nah mata, yo cufuɗ ambuh vur malambaˀ ɗik misi zleˀehey na.

²kil ti mungrakaɓa ka makil ti kaw, asi da ki gumbaˀa le na, a sa humbuɗuw. Slin ngi mungra naŋ ka ngi mobor, a ja mburo le na, a mucu.

³Ngila ɓimuɗuva, naŋ kaɓa maslalam misi mi cuw, da a ngumukuw le ti naŋ na, waˀa n’anta kuf ta ndidaˀ.

⁴Suromi da mbur waɗ moˀore na, a zliɗ zlili: yo hay ngi muhuhumo vu a sa wuhu leɗeɗ kanah vuna ya.

⁵Dira dibiɗ ngi mbur misi murga, a ci seŋseŋ a slimiɗ Buymisemuŋ, joˀ a ɗiyaŋ ɓi nah a hahãŋ si.

⁶Mbur mangum a mbiɗakaŋ hirnga ta na, a zuɓ jiviɗ ngi mungra le, amma mbur mazluwun ti Bumbulvuŋ na, a sa zil ma ravaŋ a mevel naŋ.

⁷Mbur maɓi ɓi mezle vol vol na, a sinakaŋ ɓaˀ li, amma ɓi naŋ miɓakasl ta gar na, mbur misi lesl a sinaŋ.

⁸Mbur mandira hay naŋ ti dala ngi mbur na, a cikil di i ɗugur ngi ndira zivi nga naŋ.

⁹Mizirɗa mihey micikilam le na, naŋ kaɓa gabaga miɗip ɗipi, kiɗa mi taŋ i vu matiɓi giw giw.

¹⁰Jiviɗ ngi mizli migi mungrahaya, naŋ ɗalla manja ɗugur, amma a ra kiɗ mi ar heleleŋ ngi mizli mumucahay. Mbur misi sin mijileŋ waɗ manja lesle

¹¹Mbur maja ɓi mijiwa na, a jigina hirnga naŋ avi wuluko, yo zluwun ti Bumbulvuŋ kwana, kiɗa mi naŋ i sin mijileŋ ya.

¹²Mbur misin gi gwat neˀ ta na, a dubunakaŋ gwata tuwaˀa, amma sina gi gwat mekeleme, a yuw ji mevel hasl hasl.

¹³Sin ngi mbur misi sin mijileŋ a zuɓ kaɓa mekepel, yo kuti naŋ mavula, naŋ kaɓa miviɗiviɗi ngi yam mavul siifa.

¹⁴Kwacay ngi mbur gilawa, naŋ kaɓa tutuŋ muwuh le, gwat naŋ madubuna gar na, anta ji neˀ le a hirnga ta.

¹⁵Da mbur mudubun le, a cin ɓi ngi sin mijileŋ le na, a tuɓa, joˀ a ru di nga mbuŋ. Mbur sulome, a cina le na, a ŋhiya ta, a hiziga ɓi nah zloh murdirba.

¹⁶Ɓi mukoloŋ koloŋ ngi mbur manja lesle, naŋ kaɓa gwat mududok ngi jijir nga mulaka, amma mingiɓi ngi mbur misi lesle, naŋ mezle ndrehhe.

¹⁷Ar cikile, a cinaka mingiɓi ngi mbur misi lesle, yo a wulkaka ɓi naŋ a mevele.

¹⁸Sin mijileŋ avu mbur gilawa, a pura kaɓa hay mupuwa le paw paw, yo sin mbur manja lesle, i mingiɓi mivaw vaw lambaˀ.

¹⁹Avu mbur manja lesle, dubuna gwata, naŋ kaɓa a cakaŋ di dambula ar sar, kaɓa a gakaŋ di anko avi haŋhaya.

²⁰Mbur gilawa, a singir gwesl wuzlar, amma mbur misi lesle, a singir gumusso tin sekvu.

²¹Avi mbur misi lesle, dubuna gwata, naŋ kaɓa gwat ngi wuya ngi ɓiri hirnga, kaɓa ɓalaŋ a haŋ hazum.

²²Mbur gilawa, a ci nga hay mburo ŋhos, amma mbur misina ɓi le na, a ci sekkevu.

²³Mbur gilawa, naŋ mici le si na, a hiliɗ vu nga haya, amma mbur mukuta le kuteˀ kuteˀe, a cici deŋ avra kwaɗay.

²⁴Mbur manja kuti, a jik slimiɗ ngi cina ɓi micaŋ ta, amma avu mbur misi lesle, i ɓi ngi mesem.

²⁵Migi miheye, ɓi taŋ micinoko di le na, a maka hiri nah, amma misi lesleye, a ɓaka ɓi nga taŋ weˀe.

²⁶Mbur manja lesle, ɓi misi a mevel naŋ gar na a ɓa daˀ le, amma mbur misi sin mijileŋ, a ndir ti mingiɓi a mevel naŋ.

²⁷Da mbur mizirɗa mi a ra nisa mbur mazlir di ta na, a nis di hirnga naŋ tehhe.

²⁸Mbur macikisl ɓi na, a hiryi di hirnga naŋ tehhe, yo midigwi naŋhaya gar a sa hirsakaŋ vurˀe.