Read South Giziga Sir 22 Bible Online

Sir 22 - South Giziga bible

Sir 22

¹Masafaya Mbur masafaya na, a bam vu ati ɗugur militakaŋ zay le, a ga mbur gar kuy ta, a hizigaka avra.

²Masafaya a bam vu ati zay mizikitiŋ, mbur mija haŋ le avaŋ gar na, a buna haŋ ceɗ ceɗ le. Zuŋ manja kuti

³Zuŋ manja kuti na, i mesem avi cine, da i zuŋ mongoso na, a gaŋ malambaˀ ti vendeke.

⁴Zuŋ mongoso misi lesle, a lum zile, amma mapi mesem na, cine a mbul di mi.

⁵Zuŋ macin mi ta na, a pa mesem da cine ati zil naŋ, na taŋ cuw taŋ a sa hirsakaŋ.

⁶Supa mingiɓi da zuŋ nah, ar pas naŋ kasl ta na, naŋ kaɓa mizli masingiram ar li dika mbur. amma laway waɗ sirika vu mijãwjãw na, i sin mijileŋ ko amaka gar. Slalak ngi gilaw anta

⁹Dubuna gwat da mbur gilawa, naŋ kaɓa mbur masluruɓ tutuŋ muwuh le, malla puɗuka mbur mahinje haɗa wuɗ wuɗ.

¹⁰Supa ɓi da mbur gilawa, naŋ kaɓa ka masipa da mbur mihinje le, a dirba nah a sa cufuɗuw: «I mi migi ka?»

¹¹Tuwa mbur mumuca, asi a pula li mijahha le, na tuwa mbur gilaw aya, asi lesl anta ava ta. Tuwa mbur mumuca sekvu, asi a lum li musuka vu le. na kpak ngi mbur gilawa, naŋ tuwaˀ a funa muco le.

¹²Mbur mumuc le na, a gaka vagay naŋ luma pala si, amma avi mbur gilaw malla manja lesle, ar siifa naŋ gar naŋ ar li gi vagay.

¹³Ki ɓam ɓi ati mbur manja lesle puyuk ta, yo ki zuɓam jiviɗ ati mbur gilawa ta. Wi vu avaŋ vur naŋ macuw ar ɓi, yo vur naŋ masa hira vu na, a jupuw. Da ki wuɗ ɓi ta na, kil di, vur gwat naŋ masa ga gilaw gilaw tuwa, a sa guw kuy ta.

¹⁴Gwat mududok fineˀ plom [3] ada kwa? A zilaka ‹gilaw› ta na, slimiɗ naŋ mekelem ada kwa?

¹⁵Zuwen jijira muyuŋ sak, mandaŋ sak, malla ɓiri risl, a funa ɓusa mbur manja lesle le.

¹⁶Marja muɓurjugo le gidaŋ gidaŋ a hirnga haya, ko da ruwuy a wus hiɓik hiɓik kwana, anta puwa ta. Na da mbur a juwa ɓi le a mevele, a wuluk le kuy kuy na, n’anta sa pula zar kutum kine ta.

¹⁷Mbur mujuwa ɓi le a mevel naŋ ti wuluk kuy kuy na, naŋ kaɓa magam wuya avi dalam mingirzla le.

¹⁸Ɗugur memeɗehey miɓaˀ ɓaˀ a hirnga dalama, da burkataŋ a ra gi na, a hizigiɗa taŋ. Naŋ kine, mbur misi wuluk ngi gilaway a ra gaŋ zluwun na, da gwat ngi zluwun wanaka mulumaŋ le na, a cici deŋ gu ta. Ji ngama ngi caˀ

¹⁹Mbur mukuɗuw le avi zingaˀ hiri na, tuwuy a bawa, yo mbur mukuɗuw le a mevele, a njika wuluk ngir mevele.

²⁰Mbur mahizig ɗugur nga wuzla ɗiyuwoyo, a waha taŋ, mbur mambuɗa hirnga da ngama naŋ na, a hirya ji ngama taŋ.

²¹Da ki muɗ maslalam le ng’ar ngama ɗike na, ki ɗiyaka ɓi nah gu, ki gi di vagas ta.

²²Da ko ki tiram le ati ngama ɗike na, ki zluwun ta, ki ɗiyaka ɓi nah gu. Amma da ki ra zaŋ, ki ra hirsaŋ, ki ra njika ɓi naŋ miyaŋŋa, ki ra dirɗaŋ a dirba naŋ na, ko i ngama ɗik wanaka gar, a kil ti ka.

²³Da midigwi ɗik i misi murga na, anja a puluw mevele le na kuy, da ɓi nga naŋ misa ɗiyi le na, ka kwana ki sa cir ti seˀe ya. Naŋ misi ar bonoy na, gi teŋteŋ avaŋ, da naŋ misa zum hay ngi mbur le na, naɓa ki sa lum aya.

²⁴Cunju mabo tir misirgaɗ malla cunju mangis ŋsewwe na, a tuɓa mbuŋ tiɓeˀ le avi vu, naŋ kine ya, ɓa pumbus a sa bi tikeˀe na, naɓa zi vu a bi le si.

²⁵Ko mesem anta sa giy ngi cik vu a hirnga ngama ɗu ta ndidaˀ wãˀ, ko y’anta sa kil di ta ndidaˀ.

²⁶Na da gwat ngi mendere a gi le avi ya vurˀe na, mizli masa cinaka gar na, a sa zluwunam di. Dira dibiɗ ngi jigina hirnga ɗiki

²⁷I wuɗ mijigin, ɓa a jiginiy mingiɓi ɗu, ɓa a tufiy mi taf taf ngbulum. Naɓa ko y’anta sa lih mi ngi ci ar ɓi ta, yo mingiɓi ɗu i gabal mifiliw ta.