Read South Giziga Sir 23 Bible Online

Sir 23 - South Giziga bible

Sir 23

¹Bumbulvuŋ, Baha, Buy ngi siifa ɗu, ki puliy mbak da mingiɓi mabo ti balam ɗu ta, ko ki pula mi ngi kwala ɗu a hizigiɗiy ta.

²Anja wuluk ngir mevel ɗu, a hin hirnga asi kuti ka mavula, yo anja mevel ɗu, a dubun sin mijileŋ, ɓa i pula malambaˀ ɗu maziziy na mbak a gi ta, yo mungra ɗuwoy ya miga taŋ manja sin na, i pula taŋ mbak a gam ta.

³Zluwun a ra giy vur malambaˀ ɗuwoy masa sikam, yo mungra ɗu masa cikil ɗap ɗapa, vur ya masa diɗ a mbuŋ mizli mazliram ti ya ta, yo vur mesene ɗu masa singir ar ya.

⁴Aw Bumbulvuŋ, Baha, Buymisemuŋ ngi siifa ɗu ki vuliy pura hiri mahiris vu ta,

⁵yo ɓula may gwata kileŋ avi ya.

⁶Anja may gwat ngi kwelegwer ati may gwata, a zumam buy ar ya ta! Anja ki puliy mbak da may gwat, ya mawuɗ haɗa ta! Dubun vur mingiɓi: (a) vur hudum

⁷Cinam ɗi ziri ɗuwoy, dubunaka ji lejeŋ avi mi! Mbur mija dubun nah le a hirnga na, n’anta sa ci ar kwa ra ta ndidaˀ.

⁸Migi mungra, a jakaŋ ti mingiɓi ngi balam naŋ tehhe, mbur masingir ar mbur waɗ muhuhum vu na, mahizigiɗa taŋ i mingiɓi vuna.

⁹Anja ki sirika hudumo ta, yo ki ndir ti slimiɗ ngi Buymisemuŋ Mipala ngek avi mi ta.

¹⁰Naŋ kine ya, mbur beke majiginaka deŋ ti deŋ na, naɓa vivi ngi kiɗe, ada ava na si, naŋ kine ma, mbur mahudum, mazila slimiɗ ngi Bumbulvuŋ ar gwat gar na, anta lih manja gi mungra ta ndidaˀ.

¹¹Mbur mandir ti hudum ngek avi mi na, naɓa a ra lum jiviɗ ngi ngila ɓimujuwa haɗa haɗa, yo kuti ti lawaya, anta zuɓ virzi a hay naŋ ta. Da a hudum manja wuluk na, mungra naŋ a mbiɗi nga hirnga naŋ muŋ, da a gi di le ka ɓi ngi sefel na, naɓa a zluɓ ɓi le makaw cuw. Da a hudum lambaˀ na, a sa jakaŋ ti kiita, yo hay naŋ a sa si bonoy haɗa. Dubun vur mingiɓi: (b) jiviɗ ngi ɓi ɓi

¹²Jiviɗ ngi ɓi ɓi mekeleme, a bam vu ati mucu, i wuɗam i cinaka cin le ar sukwi ngi Zakopo ta ndidaˀ! Asi mizli miteŋteŋ ngi Buymisemuŋhoyo, a roko dedeŋ kileŋ avi gwat misi ka tayna, anta caka sar ar mungra misi kahana ta.

¹³K sirika mingiɓi mutuzloˀ tuzloˀo ta, asi i ɓi maci ti ka ar mungra,

¹⁴Ka muro joˀ awuzla mizli micawwahay na, wuluk keŋ angi bunuk ati munuko, vur ka masa wi vu ɗik a mbuŋ mizli tayna gu ta, ka misirka mi ngi gilaway tuwa na, ki ɓo di da tuzloˀ dana. Ki sa pura vu ɗike, zuwen taŋ muyukuw ta, joˀ ki nisa hin ngi yi ɗike.

¹⁵Mbur misirik le ngi ɓi ɓi vol vol lambaˀ na, gar gar, a cin kuti ta ndidaˀ. Hin ti ngwasay lambaˀ lambaˀ

¹⁶Mizli micikila mungrahay ɗap ɗapa, ada ti sukwi cuw, mimakir taŋ, a so ti huma ngi Buymisemuŋ nga hirnga naŋ. May gwat taŋ matiɓi ka vu na, anta muc ta, sey da naŋ muluma gwat naŋ mawuɗo le. Mbur mavula vu naŋ da may gwat ka kwelegwer na, anta pula ta, sey da may gwat vuna, a zumaŋ le kap kaɓa vu mazuma gwata.

¹⁷Avi mbur misi may gwata, ngwas gar i ngi zuɓo si, anta pula ɓi nah ta, hã pam.

¹⁸Mbur miteŋteŋ ta na, ko da ngwas naŋ ada kwana, a ɓi ti kwacay naŋ: «Masa puriy i wa maka? Li i luvuŋ, ya ɗum a hur dalam, ko mbur mapuriy gu anta. Na zle i lik mike? Buymisemuŋ Mimadiɗa anta sa ki slimiɗ ar mungra ɗu neˀ le ta.»

¹⁹Mbur miteŋ teŋ na, a zluwun di hiri ngi mizli, hiri ngi Bumbulvuŋ a pur haɗi, a ci kweŋ kweŋ fineˀ pasa na, a sina ta. Gwat mizli magaka gar na, a ra pura, yo a pur seŋseŋ ar li mukulkuc kulkuc ko wanaka gar.

²⁰A sina gwataya dumbuŋ ar naŋ misa ga taŋ, yo a dirba taŋ mikiɗam mi le kwana, a sina taŋ le na si.

²¹Mbur miteŋ teŋ ta nah na, a sa kutakaŋ ar li ngi luma, a sa ra jakaŋ gurjik. Hin ti ziley lambaˀ lambaˀ

²²Ngwas mapula zil naŋ mbak, a ra yaŋ muzuma haya ti mbur mekelem na, i kiita misi purla makutukoŋ,

²³dumbuŋ naŋ na, a ngila ɓimujuwa ngi Buymisemuŋ Mimadiɗa le, yo ma na, a gi malambaˀ le avi zil naŋ ma, mimakir naŋ na, naŋ magi madama na, a tiri le i ngwas sulome, yo a yi ziri le ti madama mbak zil naŋ.

²⁴A sa ɗiɗaka ngwas nah vuna nga wuzla kus ngi mizli, joˀ a sakaka virzi ngi ziri naŋhaya purla purla.

²⁵Ziri ngi ngwas tayna, a sa mucam dafa, anta ɓa hã a yam cak le ta.

²⁶Mizli a sa ndiram ti nisa ngwas nah keŋŋe a hirnga, ko a dirba muc naŋ kwana, mesem n’anta kiɗ ta.

²⁷Mizli masa ndiram ti siifa a dirba naŋ na kwana, a sa sinaka, zluwun ti Bumbulvuŋ na, gwat mifini n’anta, yo gwat mundum fineˀ ja ɓimuɗuva naŋhay na, anta.