Read South Giziga Sir 24 Bible Online

Sir 24 - South Giziga bible

Sir 24

¹CIKILA HIRNGA NGI UBUN MIMAKIR NAŊ CIKALLA Hunuma vu ngi sin mijileŋ Sin mijileŋ, naŋ ti ngilawuy nga naŋ kaˀ a ruwuy, A ga dudok da vu naŋ awuzla Israyel mizli naŋhay.

²A wuzla jum ngi mizli ngi Buymisemuŋ Mimadiɗa, a zla mingiɓi, joˀ a zla gi dudok da vu naŋ tehhe, a mbuŋ gidaŋ ngi Buymisemuŋ.

³A ɓi na: «I bo ti balam Buymisemuŋ Mimadiɗa, i sirta ruwuyo le sirit kaɓa mulbuɗu.

⁴Hay ɗu naŋ seŋseŋ ar birngiŋ a muŋ, janga ɗu ngi buyo, naŋ taˀ ar musure ngi gazlavay.

⁵Ya vuna, i guno si gazlavaya le kurzluˀ pal ɗu, i ru digi le a hur mubuliy mijileŋhey.

⁶Zumabuy ɗu, a ru seŋseŋ ar diɓel ngi yamay waɗ asi ruwuy kurzluˀ gar. I zum buy ar mizli gar waɗ ar sukwi ngi mizli gar.

⁷A wuzla taŋ gar na, i sipi li musuko vu: I sipi li le ngi pi hay ɗu.

⁸Akẽh na, Buy miga gwatay gara, a ɓiy ɓi midaˀ le, mbur migiy deŋ titiri, a bigiy li cifi ɗo. A ɓiy na: «Ɗiya li cifi ɗike awuzla dideˀ ngi Zakopoy, lum zlili ɗike a ruwuy Israyel.»

⁹A giy dumbuŋ ar gwatay misa gama, yo y’anta kiɗ mi ta wãˀ ngi sete.

¹⁰I ga mikuli ɗu le a mbuŋ Buymisemuŋ Mimadiɗa, ya mindir wãˀ a muwã Siyoŋ na, naŋ kahana.

¹¹Buymisemuŋ a vuliy musuka vu le ar walahay mawuɗam haɗi, yo ya mazum buy na, ar walahay Zeruzalem vuna.

¹²I dir dimbasl le awuzla mizli misi ti dudokoy, zlili ɗu naŋ tir vay ngi Buymisemuŋ.

¹³I gil kaɓa miter ngi Libaŋ yo kaɓa widis sipre a muwã Hermoŋ.

¹⁴I gil kaɓa babazla a ciki yam mivi ar papala ngi En-Geɗi, kaɓa kalaf gagaza ngi luguɗo lar misi a Zeriko, kaɓa tutumbur mezle misi ar li micay, i gil haɗi kaɓa mendesle.

¹⁵I ka zĩˀĩ ɓaˀ kaɓa kanel ati kalaf mazĩˀĩ ndum, kaɓa mir muwuna ti wini, i pulo zĩˀĩ ngi urdi ngi vu vu ɗu, kaɓa galbanum , onikse waɗ sitorak , yo kaɓa gazlavay ngi mukuturɓuy ngi zlum misi ar hay ngi Bumbulvuŋ.

¹⁶Yakaɓa miter miki haŋ le kiyih kiyih, kalaf ɗuwoyo taŋ kuyu gwatta, yo mezle haɗi.

¹⁷Yakaɓa gudubun muɓul slilih slilih yo mufuyuk ɗuwoy a sa yam zingaˀ mezle locok locok.

¹⁹Kum muroko ti may ɗu na, soko ng’avi ya, zumam yi ɗu hã ki mbam.

²⁰Wuluk keŋ ar ya na, naŋ ndum fineˀ mama, da mbur a lumiy le na, a funa mam paɗ ti hay naŋ le.

²¹Mbur gar mazumiy na, a gaŋ zum zum, mbur gar masiy na, a gaŋ si si.

²²Mbur maciniy mi na, anta sa pi mesem ta, mizli magam slra ati ya na, anta sa gam mungra ta.» Sin mijileŋ ati ɓimujuwa ngi Buymisemuŋ

²³Ɓi ndra muslufoko taŋ ani na, taŋ ar ɗerewol jumoˀay ngi Buymisemuŋ Mimadiɗa, i ɓimujuwa Moyis miɓa ndra di daˀ le, ɓa a tiri zlili ngi dideˀ ngi Zakopoy jom arleˀeŋ.

²⁵Ɓimujuwa a tuwuɗa sin mijileŋ le kaɓa mizaw Pisoŋ, malla kaɓa mizaw Tiger ti viya.

²⁶Lesl naŋ a zuɓ mekepel kaɓa mizaw Efrat, a zuɓ mekepel kaɓa mizaw Zurdeŋ ti sifi.

²⁷A ra ndaha li ti dubun naŋ kaɓa mekepel mipaɗavra avra a mizaw Nil, kaɓa mizaw Gihoŋ ti sifi ngi gudubun.

²⁸Mbur mizla dubuna ɓimujuwa dumbuŋ a kiɗa mi ngi dubun nah ta ndidaˀ wãˀ, mbur ngi dirba wãˀ masa zla dubun naŋ, anta sa tika teleleˀ ta

²⁹Asi wuluk nga naŋ, naŋ haɗi fineˀ mubuliye, yo gwat naŋ mujuwa taŋ ngi gi, i wuluk mijileŋhey fineˀ yam mijileŋ.

³⁰Na ya, yakaɓa baray mapuloko di tivi mizaw madiɗaŋ, ya kaɓa zlazlar maci ng’ar jarne.

³¹I ɓi ti kwacay ɗu na: «I sa pi ng’ar jarne ɗu na, i sa naha guva ngi la raya mbaf mbaf.» Pura baray ya mupulo di tuwa, a tiri mizaw madiɗa le, yo mizaw ɗu madiɗa, a tiri mubuliy le.

³²I sa ga ɓa gwat ya ma dubana da mizli a bun ca ray kaɓa li mawun, hã mizli mikileŋhey a puraka li minjahha nah.

³³I sa njika dubun ɗu, kaɓa i ɓi Buymisemuŋ minjika, joˀ a sa ndir da mizli masa yaka taŋ ti mbuŋ.

³⁴Puraka ɗi, ya misin bonoy na, anta vur ya pal ta, amma vur mizli masipam sin mijileŋhey gar.