Read South Giziga Sir 25 Bible Online

Sir 25 - South Giziga bible

Sir 25

¹Gwat mezlehey makir ati malambaˀhay makir Gwatay ada makir ya mawuɗ haɗa haɗa, yo i gwat mezlehey avi Bumbulvuŋ waɗ avi mizli: jumoˀay ar wala ngi sukumoy, ji ngama ti midigwi waɗ zil ati ngwas mawuɗam vu kuy kuy.

²Iriŋ ngi mizli ada makir, ya mahirsa taŋ a mevel ɗu, asi gwat ngi gi taŋ a jiy mevel mbak le ta: Mbur misi murga mahuhum vu, mbur misi zlili magi slir, waɗ mbur midigila manja lesl magi madama. luma gwat ti midigila

³Da ki pus milef ti gawla ɗike ta si na, ki lum gwat ti midigila ɗike mbri mbrike?

⁴Kayya! mbur misi hol tullo, a ndila le ngi gi kiita yo mizli micawwahaya, a ndilaka le ngi vula kuti!

⁵Sin mijileŋ a jam haŋ le ati midigilahaya, yo mizli ngi hunumoyo kwana, wuluk ati vula kuti, a jam haŋ le ati taŋ ya!

⁶Mizli midigilahay a puraka ɓiheye le gar si, ɓihey gar taŋ kaɓa mutuwuɗa tuwaɗ tuwaɗ avi hirnga taŋ, yo taŋ a jijaham nga taŋ, asi a ra zluwunam ti Bumbulvuŋ. Mumul mufineˀ mekelemey

⁷Gwatay macirikiy hiri a mevel ɗu ada ngoltir, yo i zil mukuruˀ taŋ gu ma: Mbur mamumul asi ziri naŋhay, mbur misi ar siifa ruŋ, mapura mesene naŋhay madiɗam.

⁸Mbur mulum ngwas misi lesle, mbur milih mi daˀ ta, mbur magi slra avi mbur, buy naŋ a ndilaŋ ti lesle ta na, a mumul.

⁹Mbur misi ti lesl kuy kuy, yo mbur maɓi ɓi da mizli majikam slimiɗ na, a mumul.

¹⁰Mbur muluma sin mijileŋ le na, i mbur madiɗaŋ! Amma mbur mufuna mbur mazluwun ti Bumbulvuŋ anta ɓula.

¹¹Zluwun ti Bumbulvuŋ a funa gwatay gar: mbur muluma le na, ngi wi ti naŋ i waka? Ngwas malambaˀa

¹³Ko gwat ngi ji mevel wana, mafuna maci cik cik asi vu na anta, ko sukwi ngi moˀore wana, mafuna moˀore ngi ngwasa anta!

¹⁴Ko gwat ngi mendere wana, mafuna gwat ngi mendere, mihiris ɗik maguw di anta! ko pula cuwal wana, mafuna ngi mesene ɗik maguw di anta!

¹⁵Ko muwuŋ mafuna muwuŋ ngi kaw anta, ko huma mafuna huma ngi ngwas anta.

¹⁶Zuwen ndra micifam ar hay purla ati mobor malla ngoŋngoŋ, a funa cifi ar hay purla ati ngwas malambaˀa le.

¹⁷Moˀore ngi ngwasa, a hiryaŋ hiri ndiɓiɓ, yo a gaŋ hiri mbuˀ mbuˀ kaɓa ngi luˀuf.

¹⁸Zil naŋ a zum ɗafa a hay midigwi naŋhay, yo ɓa a ɓusa ɓus kwana, a ra niˀic ti gidaŋ na si.

¹⁹Ko malambaˀ wanaka gar, i ngataraŋ anta funa malambaˀ ngi ngwas maga ta. Anja ngwas a lum mendere kaɓa ngi migi mungrahay!

²⁰Ngwas magi mi haɗa avi zil miteˀteˀe, naŋ kaɓa mbur midigila majiɗ ng’ar muyuŋ mizikitiŋ.

²¹Ki pula vu ɗik mbak da ngwas mukuyoy ta, ji lesl, anja ki hiyĩ ngwas asi zlili naŋ ta.

²²Mbur zil, ngwas naŋ mazum di na, ngwas a sa ji mevel ar naŋ, a bucaŋ waɗ paŋ mesem mukuyta wãˀ.

²³Ngwas misi moˀore, a yi hinikaˀay, nduruɓo hiri waɗ ji mevel. Ngwas magi gwat ngi cira hiri da zil naŋ ta na, slra naŋ i pula haŋ kekewel kekewel, sa ra guluɓ guluɓ.

²⁴Mungra mubo na tivi ngwasa, yo ndra mamucam gar na kwana, cek ti seˀeŋ.

²⁵Ki pula yam ngi okolori ɗik a ngil avra ta, na ki pula jiviɗ da ngwas misi moˀore a ɓi ɓi ta ya.

²⁶Ko ar gwat meciɗeke, da n’anta cin mi ta na, muɗa vu ɗik ti vaŋ, ɓula avra.