Read South Giziga Sir 26 Bible Online

Sir 26 - South Giziga bible

Sir 26

¹Mbur misi ngwas mezle, naŋ ar mumul Ngwas mezle, a vula mumul da zil naŋ joˀ a zik ar siifa naŋ makaw cuw.

²Ngwas miwirwire, zil naŋ a cir hiri, zil a sa ngira siifa naŋ zuy zuy.

³Ngwas mezle na, i gwat ngata ra mezle Bumbulvuŋ muvuluw di, i mi ngi mizli muzluwun ti Bumbulvuŋhoy.

⁴Mizli misi ngwas mezlehey na, ko i misi zlilihey, ko i misi murgahay kwana, mevel taŋ zuyyo, a ndiram ti singir mur mur ko ar mike gar. Wi vu avi ngwasay

⁵Gwatay ada makir magikiy zluwuno, yo mumufaɗ taŋ a giy zluwun fineˀ ma: cikisla ɓi, cikil mitimbilik waɗ ji ɓi cek na, i gwat mukuy tahay wãˀ fineˀ mucu.

⁶Amma bonoy mukuy ta fineˀ gidaŋ na, i ngwas magi suloŋ ti giseˀeŋ, yo mi ngi kwala naŋ mabo di, naŋ ndum ta wãˀ.

⁷Ngwas misi moˀore, naŋ kaɓa galalaŋ mujuw kuy kuy ta, masukuta ˀay ngi slahaya. da ki wuɗ tikaŋ ˀay na, naŋ kaɓa mbur maji uruc tahaŋ.

⁸Ngwas mawi ti mbaazla na, i gwat ngi ji mevel madiɗaŋ, anta sa ɗumo gwat ngi mesem naŋ mata.

⁹Kpak ngi ngwas malambaˀa, a pur avi pura hiri naŋ si, a sin avu kuɓuco hiri naŋ.

¹⁰Da zuŋ ɗik mongoso i mukuwa na, jigina kuy kuy, asi da naŋ misa lum li le feŋ na, a sa ga gwat naŋ mawuɗo wãˀ.

¹¹Jigina avi pura hiri naŋ ngi vurka vu na, yo da a tikinuw le na, anja a zumuw hirnga ta.

¹²Zuŋ nah, naŋ kaɓa mbur muzuɓa mulak, yam mira kiɗaŋ, naŋ mulum yam le a mbuŋ si na, a saŋ, zuŋ nah, a vula vu naŋ ko da waka gar muro ti may naŋ, mbur mudumbuŋ mizlaŋ le si na, a vulaŋ vu naŋ si. Hunuma ngwas mikaslsla

¹³Ngwas mapuya vu da zil naŋ na, a ga zile denene, naŋ magaŋ gwat mezle naŋ misina na, zil a ndir gboŋ gboŋ.

¹⁴Ngwas magi mi kwalĩ kwalĩ ta na, i gwat ngata ra Bumbulvuŋ mavula, yo zuŋ migilaka le ti jiviɗ naŋ na, gwat mindil n’anta.

¹⁵Ngwas micina mi na, i leleŋ ngi wuzla leleŋhey, yo ngwas magi lambaˀ lambaˀ ta na, ko gwat mindil n’anta.

¹⁶Ngwas mukuy, giɗaɗo maja hay naŋ ti jiviɗ naŋ na, a bam vu le ati pas mideŋ.

¹⁷Ngwas mezle mifetek feteke, a bo makatak kaɓa lampe matiɓi ar li ɗuv naŋ ar hay Buymisemuŋ.

¹⁸Sara cir cir, sar ngi ɗuv a ruwuyo gidaŋ gidaŋ, naŋ kaɓa ɓamtal ngi ɓiri hirnga mikaˀ ar ɓiri bara. Gwatay makir majam mevel da mbur

²⁸Gwatay ada cuw magirikiy a mevele, yo mimakir taŋ a ra slikiɗiy mevele fõh fõh: mbur soje muro ti gir, asi naŋ i misi murga, mizli mahirsaka misi lesley, waɗ mbur mapula ɓi mijeŋŋe mbak, joˀ a gi mungra na, Bumbulvuŋ a wi taŋ vu le weˀ ngi sa zizi ti maslalam. Gwat maka mi da migi tererehey

²⁹Mbur migi terere a lih ti tuwaˀ avi malambaˀa, yo mimbiɗi haŋ kwana, anta bi ar mungra ta