Read South Giziga Sir 27 Bible Online

Sir 27 - South Giziga bible

Sir 27

¹Mizli haɗa a gam mungra ngi luma zlili, mbur mawuɗ gi zlili na, anta sin vu ta.

²Mungra a ci ar wala ngi mbur migi terere ati mihiɗika gwata, kaɓa macaka dum ngi zlavaɗ kik ar wala ngi ɗuguroy cuw.

³Da mbur a pula vu naŋ wãˀ da zluwun ti Bumbulvuŋ ta na, hay naŋ a tiri diŋ kutumo si. Mingiɓi ngi mburo, a buga deŋ naŋ

⁴Da a ra kicaˀam gwat ti tami na, hoyok naŋ a ndir a ra, naŋ kanah ya, malambaˀ ngi mburo, a bawa ar naŋ makiɗ slir.

⁵Mabuga mindira gwata, a sina ndire le na, i vu, a sinaka puɗaw ngi mburo avi mingiɓi naŋ.

⁶Yi ngi widise, a gi avi huf naŋ, naŋ kine ya, a sinaka wuluk ngir mevel ngi mburo ar kiɗa slir.

⁷Ki ngil wuy ti mburo daf, manja ki cina mingiɓi naŋ ta, a sinaka mburo ar kiɗa slir naŋ vuna. Migir ngi mbur magi gwat ti sin mijileŋ

⁸Da ki ra sipi ɓi mijeŋŋe na, ki sa luma, joˀ gi gwat mikasl kasla, a sa sirtuw sirit kaɓa godo misi ti dudok.

⁹Sukwi ngi ɗiyuw misi purla, a cifam ar hay purla, vurˀe, ɓi mikaslsla na, naŋ vur mizli mikaslslahay.

¹⁰Mungra a ra jiɗa migi gwat mijeŋ tahaya, kaɓa mobor majiɗ useˀ.

¹¹Ar mingiɓi ngi mbur miteŋteŋ na, sin mijileŋ ada anga, amma mbur manja lesle, a mbiɗi mekelem mekelem kaɓa kiya.

¹²Ngi cifi awuzla mizli manja lesleye, wa pasa ti wi, na daka awuzla mizli misi lesley na, ka ziki.

¹³Mingiɓi ngi mbur gilawa, a ji mevel da mbur, singir taŋ, naŋ kaɓa ngi mbur sulome muzluɓ ɓi le.

¹⁴Mingiɓi ngi mbur mandir ti hudum ngek avi mi na, anta gi vu kuy ta, da a ra tiri na, a ki disla slimiɗe.

¹⁵Da mizli muhuhumo vuhoy a ra tiram na, a sa kiɗ mi ti pi pumbus, yo zi vu taŋ na, a guw cina ta. Sina ndir ti ɓi teˀ a kwacaya

¹⁶Mbur manjika ɓi miyaŋŋa na, mbur mapulaŋ mevele n’anta mata, yo anta sa lum ngama ngisi mevel naŋ mata.

¹⁷Wuɗ ngama ɗike, gi teŋteŋ avaŋ, amma da ki njikaŋ le na, ki sipaŋ ngi ngama mata.

¹⁸Naŋ kaɓa mbur muy naŋ a zizi, a mumuc le, ka kwana, ji ngama kum ati midigwi ɗike, a zizi le ya.

¹⁹Naŋ kaɓa ɗiyuw malih kwek tisi haŋ ɗiki, ka kwana, ki pula midigwi ɗike mbak a cuhu, k’anta sa luma virzi naŋ ngi ngama mata.

²⁰Ki sipa mata, asi a cuh le kileŋ si, a lih le, kaɓa mangazaw malih avi gwindiɗi.

²¹Da waˀa a gi le na, a mbizaka ɓa a kufu, da ki zam vu le na, ki ɗiyaka ɓi nah gu, amma mbur manjika cil naŋ na, ɗuva wuluk taˀ anta mata. Ɓi mi cuw cuw

²²Mbur makuɓuc hiri da mbur na, a ra gijuw ɓi malambaˀa, amma da ki pura le na, cici zar avaŋ.

²³A mi hiri ɗik na, a ɓi mi mideɗek, yo a mumul asi mingiɓi ɗike ma, amma da k’anta na, a mbiɗa me, a ɓa ɓi ɗike ti malambaˀ ngi hiryi ɗiki.

²⁴Gwat ya mahiris ada haɗi, amma ngaɓa naŋ, i sukwi ngi mizli misi ka tayna. Bumbulvuŋ kwana, a ra hirsa taŋ ya. Gimalambaˀa, a mbiɗi a hirnga ɗiki

²⁵Mbur mahizik ɗugur cir cir ng’amuŋ na, a sa diɗ a hirnga naŋ tehhe. Mbur manjik cil naŋ ngi gaŋ malambaˀ na, a sa lum gwat ngi suko mi.

²⁶Mbur mali pilkaw, ɓa cil naŋ a diɗ ng’a ra na, i naŋ vuna masa diɗ tehhe ng’a raŋ, mbur mawuɗ a ja cil naŋ ar kwar na, kwar a sa ji tehhe i naŋ muŋ.

²⁷Mbur mamuca kwanay deŋ ti deŋ na, a gic a duba sar naŋ, gwat masa gi ava na, anta sina a bo ti ka ta.

²⁸Singir ar mbur waɗ zi vu na, i gwat ngi muhuhumo vuhoy, na pula cuwala, a ra kutukoŋ ɗum ka mobor makutuk gwat ngi ji.

²⁹Mizli mamumulom asi mizli miteŋteŋhey a ra diɗam na, a sa jaka taŋ ti kwar, ɓa a sa muc tikeˀe na, naɓa bonoy a zumaŋ le fineˀ gidaŋ. Gi wereke, a funa ji mbur a kwacaya le

³⁰Ji mbur a kwacay waɗ ji mevele, i gwat ngi hirisi, mbur migi mungra a ra zum buy ar nah akẽh ya.