Read South Giziga Sir 28 Bible Online

Sir 28 - South Giziga bible

Sir 28

¹Mbur mapul cuwal na, Bumbulvuŋ a sa pul cuwal ti naŋ ya, a sa slufa mungra naŋhaya tiɗeˀe ko pal a ndir ta.

²Ka migi malambaˀ le da mbur cil ɗik na, gaŋ wereke, naɓa ka masa dir dibiɗ na, Bumbulvuŋ a sa puyu mungra ɗikeye.

³Da ki ro ti mevel fõh fõh ar mbur na, ki sa cufuɗa Bumbulvuŋ mbri mbri, ɓa a mbuluw ka?

⁴Da k’anta pura ircece da mbur mibi ka ta na, ki sa dir dibiɗ ɓa Bumbulvuŋ a puluw mungra ɗikeye mbri mbrike?

⁵Daka misi dum vu mamuco, ki ro ti mbur a kwacay na, masa ngum ngi puluw mungra mi ngi ɗikeye i waka?

⁶Wuluk ar gwat makutukuw ar kiɗa mi ngi siifa ɗik, pula gi mesene, wuluk ar mucu, ar dum vu masa zĩˀĩ, ja ɓimuɗuva ngi Bumbulvuŋhoy a hirnga.

⁷Wuluk keŋ ar ɓimuɗuvahay, yo mbur mbur cil ɗiki, ki jaŋ a kwacay ta. Wuluk keŋ ar jumoˀay ngi Buymisemuŋ Mimadiɗa, tuwuɗ zluwtaŋ ar malambaˀ magukuw di. Tiri

⁸Kil kileŋ avi ɓi ngi tiri, naɓa gi mungra, a sa gi zuwen avi ka, asi mbur muro ti mevel fõh fõh na, a bula vu ngi tiri ti gidaŋ

⁹Migi mungrahaya, a zliraka mizli ngamahaya ngi tiri, yo mizli muroko ti jumoˀay na, a wunkaka taŋ ˀay.

¹⁰Da a ra ɗiyaka vu haɗa haɗa na, vu a tiɓi haɗa haɗa ya. Da a ra suburoko tiri na, a gi tiri mukuyta wãˀ. Mbur a ji mevel weˀe asi gidaŋ naŋ, yo da zlili ava haɗa na, ji mevel nga naŋ kwana haɗa ya.

¹¹Tiri mugurjik na, a bul vu haɗa, slikiɗa himaˀ mugurjik na, pumbus a pi.

¹²Inga ˀufo vu muhuɗiɗi na ɗi, a bul, amma da ki tufaŋ di tazlay na, a mucu. gwat mucuw tayna, a boko ti balam misi purla. Mi motropo a suw ti ɓi

¹³Mbur masisik ˀay, maɓi mi cuw cuw na, i minisa le! mizli haɗa muroko ti jumoˀaya, a hirya taŋ le.

¹⁴Cikisla ɓi, a hiryi mizli le haɗi, mizli haɗa a pulaka ruwuy taŋhay aseˀe, a ram joˀ aka joˀ aka. Cikisla ɓi, a waha walahay muguno ti moholoyo, yo a waha hay ngi mizli madiɗahaya ma.

¹⁵Cikisla ɓi, a bi ti ngwas mikaslslahaya le a hay zile, cikisla ɓi, a tuɓa gwat taŋ muluma ti liiriɓ taŋ le.

¹⁶Mbur maki slimiɗ ar cikisla ɓi na, anta sa lum haŋ ngi musuka vu ta, anta sa lum li ngi pula vu mata.

¹⁷Sliɗ ti lawaya, li naŋ a ɓuruk ɓultoŋ ɓultoŋ, amma cikisla ɓi, a hirya mburo kacakaca.

¹⁸Mizli haɗa a mucam le ti kiɗ ti maslalama, amma a ndilaka mumucam asi cikisla ɓi na ta.

¹⁹Mbur milih le avi cikisla ɓi, mibi daˀ ng’ar himaˀ naŋ na ta na, a mumul! Mbur muzuɓa galalaŋ ngi cikisla ɓi daˀ ta, yo mujuwakaŋ daˀ ti celelu naŋ na ta na, a mumul!

²⁰Asi galalaŋ naŋ, i galalaŋ ngi ɓiri, yo celelu naŋ, i celelu ngi ɓiri gaza.

²¹Muc ti cikisla ɓi na, i muc migeˀ bonoy haɗi, zuwen mucu, a funa cifi ati micikisla ɓiheye le.

²²Cikisla ɓi, anta ga gwat da mbur miteŋteŋ neˀ le ta, yo mi irne taŋ, anta wura taŋ ka vu ta.

²³Mizli macam ng’ar cikisla ɓi na, i mizli mupulaka Buymisemuŋ le. Cikisla ɓi, a sa bul vu awuzla taŋ, a muc pam le mata wãˀ. Cikisla ɓi, a sa jiɗ ng’ar taŋ kaɓa mobor. A sa puwa taŋ meɗ meɗ kaɓa dirlengeŋ mapuw gwat.

²⁴Da ki ra cup zluɓ gunno a hirnga guva ɗike na, zlira mi ɗike ti faɓuru ya. Da ki ra jigina dala ɗik ati ɓiri hirnga ɗike na, jigina irne ɗik avi mingiɓi kanah ya.

²⁶Ji lesl, anja irne ɗik a hizigiɗuw ta, vur naŋ mahizigiɗuw ng’asi haŋ mbur mira jiɗuw.