Read South Giziga Sir 29 Bible Online

Sir 29 - South Giziga bible

Sir 29

¹Didiɗa gwat a so ti ɓi Mbur mavul duvus da mbur cil naŋ na, a puraŋ di i ircece, yo mbur majina midigwi naŋ na, a sipi di ɓimuɗuva ngi Bumbulvuŋhoy.

²Da mbur cilɗike, a ro ti gir na, vulaŋ duvuso, yo gwat ka mididiɗa le na, ma da buy naŋ ar hin naŋ kaslsla.

³ki zirɗa mi ɗike ta, ɓa mizli a puruku ka mbur mezleŋ, naɓa gwat ka muro ti may naŋ na, ar pas gar na, ki sa lum.

⁴Mizli haɗi a puraka duvuso kaɓa i zlili mezleŋ, joˀ a sika bonoy da mizli mijinakataŋ ti duvus tuwa.

⁵Mbur mawuɗ didiɗa duvus na, a gi luɓ luɓu, a ɓa ɓi ngi zlili naŋ ˀay ɓaˀ a ruwuy. Amma da a mbiɗi le ngi wuruk naŋ so na, a gam di zitititi. A sa wurkaka ti zila ma ravaŋ, yo a zaka hin misi wurenna.

⁶Da mbur a wurka duvuso le gu, mbur muvulaŋ di a lum le reta naŋ na, a sa purakaɓa a bi ti jiŋ ti bi. Da kine ta na, zlili ngi vaˀa, a tuɓaka le ma, a lum mbur magi di mesene le ngata ra ma. Wuruk naŋ, i nis waɗ zi var var tewle, yo ɓa a ɗuvaŋ hirnga jak ma na, a hirsaŋ ti hiris.

⁷Mizli haɗi mangumam vula duvus da mbur ta na, anta i moˀore ta, amma a zluwunam zlili taŋ matiki ngata ra lambaˀ. Vula gwat da misi murgahay zuwen

⁸Vurˀe, ɓusa mbur misi murga, ki pulaŋ juguɗum hã a zik ar li kutuko gwat ka masa vulaŋ di ta.

⁹Jina misi murga vur ɓimuɗuva ngi Bumbulvuŋ, yo ani gwat a kicaŋ le, ki ɓulaŋ haŋ njoŋ ta.

¹⁰Zuwen ka mihirya dala ɗike ngi vul da sukum ɗik malla da ngama ɗiki, a funaka mapula a zĩˀĩ bac asi ɗuguro le.

¹¹Gi ti zlili ɗike, kaɓa Buymisemuŋ Mimadiɗa miɓa daˀ le na, naɓa ki sa luma migir naŋ fineˀ ɓiri hirnga.

¹²Wi vu ti gwat ngi vul da misi murgahay a dirgwaɗ ɗiki, masa luhuw avi menderehey gar i nah.

¹³A sa cik vu a hirnga ɗike vur mesene ɗiki, fineˀ mbaray migbim gbime, fineˀ ziwit miɓiɓire. Zuɓa ɓi ngi duvus ngi cil ɗiki

¹⁴Mbur mezle na, a zuɓa ɓi ngi duvus ngi mbur mbur cil naŋ, amma mbur manja meseme, a pula mbur cil naŋ mbaka,

¹⁵Ki puyuk hirnga ti mbur muzuɓa ɓi ngi duvus ɗike ta: asi a vula hirnga naŋ le ar deɗe ɗike.

¹⁶Mbur migi mungra, a gi ti zlili ngi mbur muzuɓa ɓi ngi duvus naŋ lambaˀ lambaˀ.

¹⁷Mbur manja sina gi sise miyaka caka, a pula mbur milahaŋ le mbak ar ɓi.

¹⁸Zuɓa ɓi ngi duvus ngi mbur na, a zizi mizli mikaslslahay le haɗi, a wusa taŋ gunjuɗ gunjuɗ kaɓa diɓel ngi yam ar mubuliy. Ŋha mizli madiɗahay, a slikiɗam nga ruwuy mulak tak’ay. joˀ a ram aka aka awuzla sukwi mulakaya.

¹⁹Mbur malambaˀ a ra wus vu ngi zuɓa ɓi duvus ngi mburo, a wuɗ ɓa a lum anga na, a ram di ng’ar kiita.

²⁰Jina mbur mbur cil ɗiki weˀe avi gidaŋ ɗiki, amma wi vu vur ka vuna maci ar kwar ɓula. Ki pula vu ɗike mbak mbak vur mbur ta

²¹Gwat ngi ngir ar siifa i yam, ɗafa, zana, waɗ hay ɓa ki ga gwat ɗikey yaŋ a ra.

²²Zuwen ka mandir ti murga ɗik ar hay ngi ɗiki, a funa ka mambi ti gwat ngi zum mezle a hay mizli le.

²³Da ko gwat ada haɗi malla neˀkini kwa na, muk ti ka si. k’anta ki sa cin a zuluku ‹mbur musuruɗ aka suruɗ aka› mata.

²⁴Ci musuruɗ aka suruɗ aka na, i cifi ti bonoy. Yo ki wuna me ŋwew ta, asi ki mbur ngi hay ta.

²⁵Mazuɓa ɗaf ngi zum waɗ yam ngi si da mburo i ka ngbaŋ, amma ko mbur maguw sise anta, yo ma na, ki ra cin mi malambaˀ nga hirnga naŋ ma:

²⁶«Sawa mbur ngiavra, ɗiya taasa ngi ki ɗafaya, da a pur gwat le neˀ avi ka na, a ɓuw‹so di i zuma.›

²⁷Bi, mbur ngiavra! I ra lum mulak mupuɗaw, sukum ɗu ada so nga hay ɗu, i wuɗ haya!»

²⁸Magam ti mbur musuruɗ aka suruɗ aka, waɗ zi mivar var ngi mbur naŋ mididiɗ gwat ava na, avi mbur misi lesle, i gwat mutuwaˀa.