Read South Giziga Sir 3 Bible Online

Sir 3 - South Giziga bible

Sir 3

¹Ɓi ngi ziri vur miyi taŋhay Ziri ɗuwoy, cinaka kuti ngi cine kumo, gam kanah, ɓa ki laham avi mendereheye:

²Asi Bumbulvuŋ a ga dudok da cine ngi ziri asi ziri naŋhay, a pula li lum ngi mumuŋ taŋ kwana, asi haŋ taŋ ya.

³Mbur maɗuva hirnga da cine na, a ra buna mungra naŋ,

⁴mbur maga dudok da mumuŋ na, a ra cikil zlili.

⁵Mbur maɗuva hirnga da cine na, ziri nga naŋhay a sa gakaŋ gwat ngi mumul, da a ra dir dibiɗ na, Buymisemuŋ a tuɓaŋ di.

⁶Mbur maga dudok da cine na, Bumbulvuŋ a sa jaŋ hutuŋ subur, mbur macina mi da Bumbulvuŋ na, mumuŋ naŋ a pul vu.

⁷A ga gwat miyi naŋhay mawuɗama, kaɓa buy ngi hay i naŋ.

⁸Ɗuva hirnga da bunuko ti mi waɗ ti gwat ngi gi ma, ɓa ɗuwula mi naŋ a dumuw.

⁹Asi ɗuwula mi ngi cine, a vula gidaŋ da hay ngi ziri, amma nis ngi mumuŋ, a buduguro si virzi ngi haya.

¹⁰Ki jijih asi busukum ngi dangwal ngi bunuk a diɗ le ta, busukum ngi dangwal naŋ midiɗ na, i ngi guw dudok daka ta,

¹¹asi dudok ngi mburo, a bo baɗ avi maɗuvaka hirnga da cine, da mumuŋ a ra gi gwat ngi mesem na, a vula futuru da ziri.

¹²Mangal ɗu, ki slimiɗ ar bunuk migi midigila le, yo ki gaŋ bonoy ar siifa naŋ ta.

¹³Da ko lesle anta kwana, puraŋ ircece si, vur ka, ka gboŋ gboŋ si na, ki zaŋ ta.

¹⁴Gwat ka mavula da bunuk na, Buymisemuŋ anta puyuko ta. Gwat ka mavula, a sa ɗiyuw vendeke ngi malambaˀ ɗikeye

¹⁵Ar hin ngi bonoy mulumuw le na, Bumbulvuŋ a sa wuluk keŋ ar ka, mungra ɗikey a sa susuyumom kaɓa slaslalay ar pasa.

¹⁶Mbur mapula cine fuk na, a zi di Buymisemuŋ, mbur maga gwat ngi ji mevel da mumuŋ na, Bumbulvuŋ a nisaŋ. Lum ngi mbur mahuhum vu ta

¹⁷Mangal ɗu, da ka mira gi gwat gar na, ki huhum ta, naɓa a sa wuɗuku fineˀ mbur mezle a mbuŋ Buymisemuŋ.

¹⁸Da ki mbur micawwa jak na, hin hirnga cawwa ya, naɓa ki sa lum leleŋ a mbuŋ Bumbulvuŋ.

²⁰Asi gidaŋ ngi Bumbulvuŋ naŋ madiɗa haɗa, yo mizli muluɓ luɓoy a ra vulakaŋ dudok.

²¹Gwat ka mupura le naŋ tuwaˀ haɗa avi ka na, ki sipa ta, gwat mididal hirnga ɗike na, ki ki slimiɗ a ra ta.

²²Wuluk ar ɓimuɗuvahay muvulukuw taŋ na, ko ki ki slimiɗ ar gwat miyaŋŋa ta.

²³Ki diɗ vu kpis ar slra mufunuw le ta, gwat mubugukuw di na, a funa ngi mbur titira masla wala naŋ go le.

²⁴Asi mizli haɗi a zizam asi wuluk taŋ midar ta na, wuluk taŋ malambaˀ na, a hirya taŋ lesle le. Mbur mukuwa ati mbur misi lesle

²⁶Mbur misi mevel gidaŋ na, a sa kiɗ mi ti malambaˀ, Mbur masipi mendere na, mendere a sa zizaŋ hutuŋ.

²⁷Mbur misi mevel gidaŋ na, bonoy a sa kiɗaŋ ɓurusl, mbur migi mungra, a sa cikila mungra ɗip ɗip nga hirnga naŋ.

²⁸Malambaˀ ngi mbur mahuhum vu na, slalak naŋ anta, asi widis ngi wuluk malambaˀa, a dira dimbasla le ar naŋ si.

²⁹Mbur misi lesle, a wuluka mi ngi kucuwulo a mevel naŋ, mbur misi ti sin mijileŋ, a wuɗ slimiɗe jakka. Jina vu kaɓa sukumoy ar wala taŋ

³⁰Yam a muca vu matiɓi giw giwe, gwat ngi vul da misi murgahay kwana, a puya mungra.

³¹Mbur magi gwat mezle na, a ɗiyi di li ngi mbuŋ, da a bujungusl le kwana, a lum li ji haŋ.