Read South Giziga Sir 30 Bible Online

Sir 30 - South Giziga bible

Sir 30

¹Sirka ziri Mbur mawuɗ mangal naŋ na, a kuta gweˀ gweˀ ti laway, ɓa a sa lum cira hiri tumbuŋ tivaŋ.

²Mbur magila mangal naŋ ti jiviɗ naŋ na, a sa luma migir nah, a sa jijih awuzla mizli misinakaŋ le.

³Mbur madubun gwat da mangal naŋ na, mesene naŋhay a sa gam di suloŋ. Naŋ a sa mumul haɗa asi ɓi ngi mangala a mbuŋ ngama naŋhaya.

⁴Da ko cine a muc le kwana, naŋ kaɓa a muc ta, asi a pul mbur mibi naŋ le.

⁵Ar siifa naŋ, naŋ mapura mangal naŋ na, a mumul, yo ti naŋ masa muc na kwana, n’anta sa lika ta.

⁶Asi a pul mbur le masa pula bol naŋ avi mesene naŋhaya, yo a sa ga gwat ngi sina ngamahaya.

⁷Mbur mahirya mangal naŋ na, sey a gaŋ slra naŋhaya gar, naŋ micin ˀay ngi mangal naŋ le ŋwew na, a muɗaŋ didak gbir.

⁸Pilis manja sirike, a jiɗam a duba naŋ ti tuwaˀa, mangal migal gal surnoˀ na, a ɓus ta.

⁹Pula hiri babara da mangala ɗi, a sa guw gwat malambaˀ gurjik, gi dungur ti mangala ɗi, a sa guw gwat ngi ndurɓo hiri.

¹⁰Da ki wuɗ si bonoy ati mangala ta na, ki singiraŋ sleŋ sleŋ ta, naɓa a sa guw gwat ngi ji jofo.

¹¹Naŋ misi i zuŋ aruŋ na, ki pulaŋ hiri babara ta.

¹²Naŋ misi i zuŋ aruŋ na, tuko sar naŋ, vur naŋ masa kuw, a cinuw mi mata.

¹³Sirika mangal ɗike, dubunaŋ gwat ngi gi, naɓa n’anta sa puw mesem ti gwat ngi gi naŋ ta. Jam ngi vu

¹⁴Zuwen mbur misi murga misi ti vu naŋ zuy zuy, gboŋ gboŋ, a funa mbur misi zlili misi ti jiji le.

¹⁵Mbur misi ti vu naŋ gboŋ gboŋ na, a funa ɓiri hirnga ngi duniya keɗeɗe le, mbur mukufaˀ kufaˀ ti vu naŋ na, a funa mbur misi ti zlili mihaɗa le.

¹⁶Ko zlili wanaka na, anta wam weˀ le ati zuy ngi vu ta, ko wuya wana, anta funa mumul ngir mevel ngi mburo ta.

¹⁷Bonoy titiri, wuya ar vigiɗi, yo zuwen mucu, angi jiji mambuɗuw bajaviya.

¹⁸Gwat ngi zum mundum madaka da misi jiji misi mi ndum ta na, naŋ kaɓa mahizigam ɗaf da kuli.

¹⁹Ɗaf mahizigaka da kuli na, a pulaŋ gir ngi mike? Na kuli vuna, anta zum gwat ta, anta ziˀĩ gwat ta mayse? Vur mbur, Bumbulvuŋ magaŋ bonoy ti jiji na, naŋ kanah ya.

²⁰A ra pura ɗafa ti hiri naŋ, joˀ a musuwun for, kaɓa mbur munguɗo miji zuŋ diyli mungbuˀo le gumbuˀu. Pula ndurɓo hiri

²¹Ki pula vu ɗik mbak mbak da ndurɓo hiri ta, ki ga bonoy da vu ɗik tehhe ti lik ta.

²²Mbur misi mevel naŋ a hin le na, a zik ar siifa haɗa, gwat maguw mumul vuna, a ju hutuŋ subur.

²³Mbiɗa wuluko, tuso didaka, ɓula ndurɓo hiri kileŋ avi ka, asi ndurɓo hiri a zizi mizli le haɗi si, yo ka mapulaŋ vu na, anta puluw gir ta.

²⁴Suloŋ ati ji mevele, a mukuw hin ngi siifa degweleˀ, yo like kwana, a guw gal daf kutumo si.

²⁵Mbur misi mevel naŋ a hin le na, me ndum, a ki slimiɗ kuy kuy ar gwat naŋ mazuma.