Read South Giziga Sir 31 Bible Online

Sir 31 - South Giziga bible

Sir 31

¹Gi zlili naŋ tuwaˀa Zlili a tika hinje da mburo, yo a ra tikaŋ gidaŋ ma, naŋ mandir ar li lik tuwa na, hinje a gaŋ ta.

²Lik matukuw hinjje na, anta puluw ki musuwun fẽh ta, a ɓula hinje kileŋ kaɓa jiji madiɗaŋ.

³Mbur misi zlili, a gir vu le ngi cikila zlili, yo da naŋ mira musuk vu na, i ngi kiɗa may ngi gwata.

⁴Mbur misi murga a gir vu le, asi hiri avaŋ, da naŋ mira musuk vu na, gir ngi gwat a gaŋ.

⁵Mbur muro ti may ngi ɓiri hirnga na, a ndir jeŋŋe gu ta, mbur muro ti may dala na, dala vuna a zizaŋ.

⁶Mizli haɗi a hiryaka vu taŋ le asi may ngi ɓiri hirnga, joˀ a zizam kahana.

⁷Mizli misi may ɓiri hirnga a ra ga taŋ vekeɗ vekeɗ na, a tiri le avi taŋ, kaɓa i kwar ngi ji taŋ, yo mizli gilawaya, a pulaka vu taŋ le, a ra ja taŋ cek.

⁸Mbur misi zlili misi ɓi ngi mbiɗaŋ hirnga anta ava ta, yo a gi zlili manja may gwat na, a mumul.

⁹Mbur ɓa i ngilakaŋ wuy vuna, i waka? asi a gi gwat mupuɗaw le awuzla mizli naŋhaya.

¹⁰Mbur misi may ɓiri hirnga majaŋ ta, mangir cakar kine ada kwa? da ada na, i ɓi ngi jijih di. Da pas naŋ a bo le ɓa ngi ngila ɓimujuwa na, mbur mangila ta ada kwa? pas ngi gi malambaˀa bo le na, mbur maga ta ada kwa?

¹¹Mbur mangila ta na, zlili naŋ a sa ru nga mbuŋ, yo gwat mezlehey naŋ miga taŋ na, a sa ɓaka ɓi naŋ awuzla zuguduw. Ar li zuma ɗaf

¹²Da ki ra zumam ɗaf ngi muguzlum na, ki ra ngil di wuy ˀay ngar ngar, ki ɓi: «Kay! Ɗaf mezle ni,» na, ki ɓi ta!

¹³Wuluk keŋ ɗi, pura hiri ti may gwat na, i gwat mezle ta, gwat malambaˀ mufuna hiri vuna ada ma kwa? naŋ mandir ar li ɓulo tuwuy na vurˀe.

¹⁴Ar li zuma ɗafa, gwat misi mbur mekelem a wuɗo zuɓa ya na, ki ru ti haŋ ng’ava ta, vur kum ma ra zliraka haŋ ngroˀ ar sikiɗe.

¹⁵Gwat misi zliv a cira hiri da midigwi ɗike na, ka pur tahaŋ ɗike, yo wuluk kuy kuy ɗagay, ɓa ki sa gaŋ gwata.

¹⁶Gwat muɗuvukuw di a mbuŋ ɗik na, ka zum i nah si, yo ki zuma gwata moˀore moˀore ta.

¹⁷Mapula ɗafa dumbuŋ i ka na, i sirik mezleŋ, da ko ki mbi ta kwana, anja ki buga vu ɗike ta, vur naŋ maja mevel da mizli mekelemeye.

¹⁸Da kum ar sikiɗ purla, mizli haɗi na, anja maca haŋ ng’ar ɗafa dumbuŋ i ka ta.

¹⁹Mbur migila ti kuti na, gwat ngi zum neˀkini, naŋ muk ti naŋ si! Da naŋ mihin le tup na, gwat magaŋ ngaˀ anta.

²⁰Mbur mazum ɗafa dey dey na, a hinje buɗusl kuy kuy, a slikiɗ prik prik, ti vu naŋ zuy zuyo ma. Mbur mazum haɗa na, naŋ ar bonoy, ti duvuɗo a hinje ta, didaka bar bar ngi vunuh, joˀ kwacay a jaŋ.

²¹Da a gi le avi ka i tikaˀay ɓa sey ki zum haɗa na, slikiɗi, a ra vunuh, naɓa a guw zuwen.

²²Cina ɗi mangal ɗu, ki hirsa mingiɓi ɗu ta, nga mbuŋ, ki sa sla wala ngi ɓi ɗo. Ar gwat ngi gi ɗik gar na, ga weˀe, naɓa ko jiji masa juw vu anta.

²³Da mbur a ra tiɓi vu kuy kuy a hay naŋ na, mizli gar a ngilam di wuy, maga sedewo ngi vul naŋ ti gula ti hazum na i nah.

²⁴Mbur maɗumo gwat naŋ kesl kesl na, mizli gar a ɓaka ɓi naŋ ar walahaya njuh njuh, maga sedewo naŋ, naŋ i misi gizak na kwana, i nah ya. Mbaazla

²⁵Ki gi kaɓa ka gidaŋ haɗi avi mbaazla ta, asi mbaazla a zizi mizli le haɗa si.

²⁶Mabuga sifriŋ mezle i vu, mabuga kpak ngi muhuhumo vuhoy cuw makiɗam vu kwana, i mbaazla ya.

²⁷Avi mizli titirahaya, mbaazla naŋ kaɓa siifa, amma sey ki sa weˀe. Da mbaazla a kic le avi mburo na, naŋ tuwaˀa! Angi ɗuva virzi naŋ na, Buymisemuŋ a ga ɓa mizli a mumulom di.

²⁸Da ki sa mbaazla weˀe, yo dey dey ngi kiɗa may naŋ na, mbaazla a guw mumul mumul, yo mevele wirwir.

²⁹Si mufineˀ gidaŋ na, a hirya mevel ngi mburo, a so ti jigina mi waɗ zlira didaka.

³⁰Wi ti mbaazla, a slikiɗa mevel da mbur gilawa fõh fõh, hã a gi malambaˀa, a tikaŋ gidaŋ, yo a saŋ ti ɓi mutuwaˀa.

³¹Ar li zuma ɗaf ngi muguzlum misi ti mbaazla aseˀe na, ki mbiɗa hirnga da midigwi ɗike ta, yo da a ra pusuk vu na, ki paŋ mesem ta. Ki ɓaŋ ɓi ngi ji mevel ta, ki cufuɗa gwat ɗik misi avaŋ hep hep ta ma.