Read South Giziga Sir 32 Bible Online

Sir 32 - South Giziga bible

Sir 32

¹Gwat ngi gi ar li zuma ɗaf ngi muguzlum Da a wunukuw le ngi buy ɓi ngi muguzlum na, ki gi kaɓa ki funa mizli le ta, gi kaɓa kum i misi purla ati taŋ vuna si, ga taŋ gwat taŋ mawuɗama wãˀ kwaɗay, a dirba nah, ki sa cifi joˀo.

²Da ki kiɗa mi ngi slra ɗike le wãˀ so na, a ra cifi joˀ ar li ɗike, taŋ mulumam gwat taŋ mawuɗam tuwa na, ki sa cir hiri, joˀ a sa tuwuɗukuw hirnga vur ka miga gwat ti jiviɗ naŋ na,

³Da mbur micawwa wãˀ ngisi taŋ i ka na, zla mingiɓi, asi ki ndila le. Ɓa ɓi ngi gwat ka misina le keslsle si: amma ki tika dunguro ta.

⁴Da mizli a ra cinam gwat ngi ɗuguroy mahurmom na, ki sipi ɓi kwiliŋ kwiliŋ ta, i li naŋ ngi bo ti sin ɗik mijileŋ ta.

⁵Gwat ngi gi dunguroy mahurmom, mizli a ra zumam ɗaf ngi muguzlum, a ra sam mbaazla na, naŋ kaɓa ɗugur mupuɗaw migam di wuya avi dangwa ngi ɓiri hirnga.

⁶Cina ˀay ngi gwat ngi dunguroy mahurmom, mizli kwana a ra sam mbaazla mundum na, naŋ kaɓa gwat ngi ɗuva haŋ migaka ti ɗugur meɗelek meɗelek avi ɓiri hirnga.

⁷Da ki zuŋ ngisi taŋ, da a tuɓaŋ le ngi ɓi na, ɓi, da a cufuɗuku le na, ɓi sar cuw tewle, a tuwuɗa ta.

⁸Da ki ra ɓi na, ɓi neˀkini si, ɓi daˀdaˀ si na, mingiɓi a ra suweˀ. Gi kaɓa ki sina ɓi nah le, yo mana, ki sina cifi teˀteˀe le ma

⁹A wuzla mizli madiɗahaya, ki ga dudok da hirnga ɗike ta. A wuzla midigilahaya, ki ɓi manja wuluk ta.

¹⁰Vuŋ masa ndisl na, naɓa wucuɗ a dufaŋ hiri le si, mbur masa gi teˀ teˀ na, naɓa gi mezle a dufaŋ hiri le si ya.

¹¹Da ler naŋ a gi le na, slikiɗi, ki zum vu ta, kil nga hay ɗiki, ki mur a jiviɗe ta.

¹²Adiga na, ki pusuk vu, ki gi kaɓa ka mawuɗu, amma ki ɓi ɓi tuzloˀ tuzloˀ, ɓa ki ci ar mungra ta.

¹³Vur gwat tayna gar na, ga sise da Mbur migi ɗik, maguw mezle haɗa haɗa na. CIKILA HIRNGA NGI DUBUN MUMUFAƊ NAŊ JOMMO Zluwun ti Buymisemuŋ

¹⁴Mbur mazluwun ti Bumbulvuŋ na, naɓa a ra dubun gwata, mizli mazlaka sipi naŋ zle ti miprik na, a lumaka paryak ar li babaraŋ.

¹⁵Mbur mawunjula ɓimujuwa na, a sa luma gwat naŋ mawuɗo hã a mbi, amma avi miɓi mi cuw cuwo, a sa tiri i gwat ngi hizigiɗ naŋ.

¹⁶Mizli mazluwunam ti Bumbulvuŋ na, a sa sinaka gwat mijeŋŋe, yo gwat ngi gi taŋ mezle na, a sa pur njahha.

¹⁷Mbur migi mungra anta ngum a mbiɗakaŋ hirnga ta, a ngil mi, ɓa a ga gwataka naŋ mawuɗ na si.

¹⁸Mbur misi lesle, anta puyuk hirnga ngi wuluko ta ndidaˀ, mizirɗa mi ati muhuhumo vu, gwat maga taŋ zluwun anta ndidaˀ wãˀ.

¹⁹Ko ki gi gwat neˀ manja wuluko ta, naɓa k’anta sa zil ma ravaŋ ar gwat ngi gi ɗike ta.

²⁰Jiviɗ misi gwat maguw ngaˀa ada ra na, ki zuɓa ta, vur ka ma ra dunuko sar avi ɗugur.

²¹Ar jiviɗ mezle, ki pula vu mbak mbak ta

²²Ko avi ziri ɗikey kwana, ji lesl.

²³Ar gwat ngi gi ɗik gar na, gi teŋteŋ vur ka tehhe, nana vuna, i sipa ɓimuɗuva vuna ya.

²⁴Mbur majaha vu naŋ jah ti ɓimujuwa na, a hurdum le hirdam ngi ja ɓimuɗuva a hirngaŋ, mbur mapula vu naŋ da Bumbulvuŋ na, ko anta sa hiryi gwat, ɓa a saŋ bonoy ta wãˀ.