Read South Giziga Sir 33 Bible Online

Sir 33 - South Giziga bible

Sir 33

¹Mbur mazluwun ti Bumbulvuŋ na, gwat ngi mendere anta sa gi ava ta, amma a sa lih avi bonoy magi avaŋ gar.

²Mbur misi sin mijileŋ na, anta gi ti ɓimujuwaka sefel ta, amma mbur misi kwacay cuwo, ɓimujuwa, naŋ avaŋ kaɓa palalam ngi yam himiɗ makucuwuraŋ.

³Mbur misi lesle, a vula vu naŋ taˀ da ɓi ngi Bumbulvuŋ, avi naŋ na, ɓi mijuwa i ɓi ngi Buymisemuŋ gisiŋ. Mbur gilaw ati mbur masingir ar cil naŋ

⁴Da ki wuɓ ɓa mizli a cinaka ɓi ɗike na, dingila ɓi nah dingal dingal le, cikila ɓi ka misina kpeˀ ɗagay, a dirba nah, ki sa mbiɗa.

⁵Wuluk ngi mbur gilawa, a mbiɗi kaɓa sar ngi mota ngi vurum, yo gwat ngi gi naŋ kwana, a mbiɗi kaɓa ganday ngi ɓiri maja sar mota tika tika na.

⁶Mbur masingir ar mizli na, naŋ kaɓa pilis mawuɗ cifi, mbur mijiɗ le anga gar na, a huhum. Buymisemuŋ a wuɗ gwatay a gam wal wal

⁷Angi vi tiŋ na, pas a ra bawa angi hineye tiɗeˀe gar, a sa gi mbri, ɓa hin numuŋ naŋ puɗaw ar mekeleme na ka?

⁸Da kine, angi wuluk ngi Bumbulvuŋ na, a ga taŋ na wal wal, a ɗuva hin mekelemeye ngi gi gwatay wal wal ati muguzlumoy.

⁹Mekelemey awuzla taŋ, i hin madiɗahay, yo i hin mipalay , joˀ a pula mekelemeye mbak i hin muho gara ya.

¹⁰Na mizli titirahay gar na, a ga taŋ ti murɓuku, yo a ga Adamu ti ruwuy.

¹¹Dambalaka Bumbulvuŋ ti sin naŋ mijileŋ haɗa, a ga taŋ na wal wal, a pula taŋ a zuɓam jiviɗ miwal wal.

¹²A ɗuwula mi da numuŋhoyo, yo a tiri taŋ mizli madiɗahay, a vul slra le da mekelemeye ɓa taŋ gweˀ avi naŋ. Mekelemeye, a nisa taŋ, a mataŋ nga ruwuy, a putukuso taŋ tir li taŋhaya.

¹³Mbur mindira gwat mizuɓa hohoy le kaw a haŋ na, a ndir di gwat naŋ mawuɗu, mizli titirahaya taŋ asi haŋ ngi migi taŋ kanah ya, a vula taŋ gwataka naŋ muwuɗu.

¹⁴Gi mezle naŋ ɓaˀ a mbuŋ gi malammbaˀa, yo siifa kwana, naŋ ɓaˀ a mbuŋ muco ya. Naŋ kanah, migi mungra kwana, n’ada a mbuŋ mbur muzluwun ti Bumbulvuŋ ya.

¹⁵Inga singila gwatay, Buymisemuŋ Mimadiɗa miga taŋ na ɗi, taŋ cuw cuw, amma majam haŋ ati cala anta. Mbur mutoho ɗerewol hana, mawulka ɓi ngi slra naŋ

¹⁶Yi zla slra ɗu a dirba mizli wãˀ yakaɓa mbur mavur ti vur, ɓaˀ a dirba migi sifihey.

¹⁷Na yi mbur ngi dirba mata, mbele Bumbulvuŋ muɗuwuliy mi, i gam le rak rak ati migi sifihey vuna, yi naha lelek ɗu le ya.

¹⁸Puraka ɗi, ya migir vu na, vur ya pal ta, amma vur mizli maɗam dubuna gwatay gar aya. Ki cir tisi mizli ta

¹⁹Kum mizli madiɗa ngisi ruwuyoy, cinaka mingiɓi ɗu, yo kum mizli madiɗda ngi wuzla mizli, jikaka slimiɗe!

²⁰Ka misi ada ti siifa aruŋ na, ko mangal ɗik, ngwas ɗik, sukum ɗik malla ngama ɗike, ki pulaŋ a wuw ta. Ki vula zlili ɗike asi haŋ ngi mbur mekelem ta, vur ka masa wulka muŋ, joˀ ki cufuɗ ti cufuɗ avaŋ.

²¹Da k’ada ti siifa, ki ra musuwun aruŋ na, ko ki pula mbur a zuɓ hirnga ar ka ta.

²²Naŋ kine, a tuɓaŋ i ziri ɗikey macufuɗam gwat avi ka, a funaka misi ˀay ɓaˀ ngi gi gwat ziri ɗikey mawuɗama le.

²³Ar gwat ngi gi ɗik gar na, anja ka ɓaˀ a mbuŋ, yo ki pula a zilaka slimiɗ ɗike ti malambaˀ ta.

²⁴Da hin ngi kiɗa mi ɗik wãˀ a ndila le, yo ka mawuɗo muco, ki wuɗuka zlili ɗike so. Gi ti mbur beke

²⁵Murbuc, ganday waɗ gwat ngi jijire: i ngi zungu, Ɗafa, kuta vu waɗ slra kwana, i ngi mbur beke ya.

²⁶Ki pulaŋ a gi slraka naŋ mawuɗ ta, naɓa ki sa pul vu, da ki pulaŋ hiri babara le na, naɓa a sa pur jiviɗ ngi kil.

²⁷A sirikaka sla ti galalaŋ waɗ ɓogolo, beke malambaˀa kwana, ti bonoy waɗ solom.

²⁸Vula slra da mbur beke, ki pulaŋ joˀ lambaˀ ta.

²⁹Asi mbur mujoˀ lambaˀa, a dubun gwat malambaˀhay haɗi.

³⁰Vulaŋ slra, asi gwat naŋ i nah, yo da n’anta cin mi ta na, caŋ dambula gizl ar sar. Gar ti nah kwana, ko ki cufuɗ gwat ti gidaŋ avi mburo ta, yo gwat mijeŋ ta na, ki ga ta.

³¹Da k’ada ti beke ɗik a haya purla tewle na, gi di kaɓa i ka vuna si, asi ki luma ti tuwaˀa. da i naŋ pal naŋ na, gi di kaɓa sukum ɗiki asi k’ada ti may naŋ kaɓa i siifa ɗiki.

³²Da ki ra guzuvuraŋ, da a kil le na,

³³ki sa ja is naŋ mbri mbrike?