Read South Giziga Sir 34 Bible Online

Sir 34 - South Giziga bible

Sir 34

¹Musuwun ti duvuɗu Makutuk gwat jigiɗimme na, i mbur gilaw, yo musuwun ti duvuɗo, aka mi ngi mizli manja lesleye.

²Mbur maki slimiɗ ar musuwun na, naŋ kaɓa mbur maji susuɗuk malla magidiɗ himiɗi.

³Ka mapur ar musuwun na, i gwat zuwun lambaˀ, i gwat migisiŋ ta, naŋ kaɓa ka mapur hiri ar dorogal.

⁴Gwat manja dili, a bo tir gwat misi dili gu kwa? Yo ɓi mikaslsla, a bo tir slire gu kwa?

⁵Ɓi ngi mupura kuli, ɓi ɓi ngi mbuŋ, musuwun, cek na, i gwat mupuɗaway ta, ngwas kwacay majaŋ ngi yi na, gwat tayna ada soko ar wuluk naŋ ya.

⁶Ko ki ji lesl asi ɓi nah ta, a sin ta, sey Mimadiɗa muguw di ɓa a ɓuw ɓi kwani.

⁷Asi musuwun ti duvuɗ na, a zizi mizli le haɗi si, yo mizli maɗuvaka wuluk taŋ taˀ aseˀe na, a diɗam le.

⁸Ɓimujuwa mikaslsla, anta bigi ar ɓi ngi slireye ta, yo mbur miteŋteŋ na, sin mijileŋ mabo ti balam naŋ i mikaslsla wãˀ. Zuɓa mulaka kuy

⁹Mbur muzuɓ mulak le haɗi na, a sin gwat le haɗi. yo mbur misirik ti gi gwata le na, a ɓi ɓi ngi gwat naŋ misina le.

¹⁰Mbur misi bonoy daˀ ta na, a sin ɓi t’aruŋ.

¹¹Amma mbur muzuɓ mulak le haɗi na, ɓi a kwacay naŋ ndus ndusu.

¹²Ya muzuɓ mulak haɗa na, i pur gwatay le haɗi, yo gwatay ya misla wala taŋ na, a ɓam gara ta.

¹³I lih breˀ breˀ avi muco is mbeˀ mbeˀe amma i lih mbele ya misin ɓi. zluwun ti Bumbulvuŋ

¹⁴Muzluwun ti Bumbulvuŋhoyo, a sa zikam haɗi ar siifa.

¹⁵Asi a ɗuvaka wuluko le taˀ asi mbur malaha taŋ gu.

¹⁶Mbur mazluwun ti Bumbulvuŋ na, gwat magaŋ zluwun anta neˀ ta, anta zluwun giɗiwire ta ndidaˀ wãˀ, asi a ɗuva wuluko le taˀ angi Bumbulvuŋ.

¹⁷Mbur misi membezleŋ ngi vu naŋ a zluwun ti Buymisemuŋ na, a mumul!

¹⁸A sa jih jah ti waka? Masa jinaŋ i waka?

¹⁹Buymisemuŋ aro hiri taˀ avi mizli mawuɗakaŋ. I mbaray migidaŋ, i micika vu mizlak gidaŋ gidaŋ, a ɗumo mburo avi himiɗ muculoko, a ga susuɗuk da mbur ti pas deŋ, a laha mburo avi ɓi mutuwaˀa, yo a jaha mburo jah vur naŋ madiɗi.

²⁰A tuso didak da mburo, a vula cira hiri da mburo, a vulaŋ jam ngi vu, siifa waɗ a ɗuwulaŋ mi. Dilik mikaslsla a mbuŋ Buymisemuŋ

²¹Gi mikuli ti gwat ka miluma ti liiriɓ ɗik ta na, ki singir ar Buymisemuŋ ti singir.

²²Yo gwat ngi vul ngi mizli mangilaka ɓimujuwa naŋ na, n’anta a tuɓa ta.

²³Mifineˀ Gwat gara, anta tuɓa gwat ngi vul ngi mizirɗa mi naŋhaya ta, yo anta pula mungra ngi mburo, asi a gi mikuli le ti ginewey mbeˀ mbeˀ ta ma.

²⁴Gi mikuli ti liiriɓ ngi mbur misi murga na, naŋ kaɓa mbur masli ˀay ngi mangal mur cine naŋ.

²⁵Ɗafa, avi mbur misi murga, i siifa naŋ, mbur matika taŋ ɓa a zumam ta na, i mikiɗa hirngaŋ.

²⁶Tuɓa gwat mbur cil ɗik mangir ti naŋ na, kite ki kiɗaŋ hutuŋ le.

²⁷Yo da ki wurka migir ngi mbur migi slra ta na, kite ki pi pumbus le.

²⁸Naŋ kine, da mbur a ra slup slaapa na, mekelemey a ra pusukoko di ti dirba, na taŋ cuw taŋ a giram vu ngata ra ta kwa?

²⁹Mbur mekelem a ra ɗuwul mi na, mbur numuŋ a ra nis vu, na Buymisemuŋ a sa cin di i ngi wa taˀ purla asi taŋ ka?

³⁰Mbur mija haŋ le avi vagay ngi mbur, muzuɓa dili naŋ le, yo a ra ma hiri ngi ja haŋ ava ma na, zuɓa dili naŋ avra na, a pulaŋ gir ngi mike?

³¹Naŋ kanah ya, mbur magi dalyam ngi puya mungra naŋhay, a dirba nah na, a ra ga gwat naŋ maga zleˀe muŋ ma na, a gi di gwat misi purla. Mbur masa jik slimiɗ ngi cina diradibiɗ naŋ ada kwa? A ga dalyam vuna ngi mike?