Read South Giziga Sir 35 Bible Online

Sir 35 - South Giziga bible

Sir 35

¹Mbur mbur cil ɗiki waɗ dilik a mbuŋ Buymisemuŋ Ja ɓimujuwa a hirnga na, naŋ rak rak ati mikuli is mbeˀ mbeˀe.

²Da ki ro haŋ gidaŋ gidaŋ avi ɓimuɗuvahay na, naɓa ki ra gi mikuli ngi ngiɓiˀay

³Gi mezle da mbur na, naŋ kaɓa gi mikuli ti hapa mukuɗ kuɗu.

⁴Vula gwat da misi murgahay na, i mikuli ngi hunuma Buymisemuŋ

⁵Gwat macira hiri da Bumbulvuŋ na, i cici kileŋ avi mungra. Yo cici kileŋ avi ɓi mijeŋ ta na, i mikuli ngi puya mungra.

⁶Na dambalaka anta soko haŋ njoŋ kine ngavi Bumbulvuŋ ta.

⁷Ga mikuli tayna ceke, asi a ɓa ndra di daˀ le.

⁸Gwat ngi vul ngi mbur mijeŋŋe, i mikuli ngi mungul, misi zĩˀĩ naŋ matisl mevele, a ndil seŋseŋ avi Mimadiɗa.

⁹Buymisemuŋ a tuɓa mikuli ngi mbur mijeŋŋe, yo n’anta puyuk hirnga ti gwat naŋ mazluma ar li gi mikuli ta.

¹⁰Vul ti gula ti hazum ngi ga dudok da Bumbulvuŋ, yo da ki ra vul gwat micikiɗeffe ngi migam na, ki ngic ava ta

¹¹Da ki ra vul gwat ngi mikuli gar na, ga ti singir taˀ avi mi. yo vula mukuruˀ ngi gwat ɗike ti mumul.

¹²Vula gwat da Mifineˀ Gwat gara, weˀe avi naŋ muvu di, Vula ti gula ti hazum weˀe avi gwat ka mulumo.

¹³Asi Bumbulvuŋ a mi ti gwat ngi mburo, joˀ a sa muw di is tarnaˀ. Bumbulvuŋ i migi kiita mijeŋŋe

¹⁴Ki zli ɓi ngi hiɗika Buymisemuŋ ti hiɗik ta, naɓa n’anta sa tuɓa gwat ka mavulaŋ di vuna ta.

¹⁵Sedege ti gwat ka muluma ti jiviɗ naŋ ta na, ki njih hiri aseˀe ta, asi Bumbulvuŋ i migi kiita, anta pura mburo avi deŋ naŋ ta.

¹⁶Anta pula mbur misi murga teˀ ta, mbur maguzuvurakaŋ na, a tuɓa diradibiɗ naŋ.

¹⁷Anta pula mutuhu matumbulo ta ndidaˀ, ko wudika matuwuy a mbuŋ naŋ na, anta pulaŋ ta.

¹⁸N’anta pura tuwuy ngi wudiga maɓul avi kwala na takwa?

¹⁹Naŋ matuwuy ti slimiɗ ngi mbur migaŋ gwat vuna na, n’anta cina takwa?

²⁰Ko wa gar magi gawla ngi Bumbulvuŋ ti mevel mezle na, a sa tuɓaŋ kuy kuy, cufuɗ naŋ a sa ndil seŋseŋ a muŋ.

²¹Dira dibiɗ ngi mbur muluɓ luɓo, a ci seŋseŋ a muŋ, da a lum gwat naŋ mawuɗo ta na, a tikin ngi taˀa tuwuyo ta, anta taˀa ta, sey da Buymisemuŋ Mimadiɗa, a mbuɗaŋ di le far.

²²Sey da a ga mezle le, a ga kiita mijeŋŋe le da nbur miteŋteŋ Bumbulvuŋ anta sa zum vu ngi zila mi ta, anta sa ɓuso mizli magaka bonoy da mizli ta, a sa ngila duba ngi mizli manja irceceheye.

²³A sa pula bol naŋ avi sukwi ngi mizli, sey da naŋ mususuyumo sukwi ngi muhuhumo vuhoyo le cek, a tuɓa zuma buy taŋ mijeŋ ta na le.

²⁴Sey da naŋ muwurka mizli le weˀe avi gwat ngi gi taŋ, a wurka slra ngi mizli le weˀe avi wuluk taŋ.

²⁵Sey da naŋ muzuɓa ɓi ngi mizli naŋhaya le asi haŋ naŋ, yo naŋ mapur ircece tuwa na, a sa vula taŋ mumul.

²⁶Tapas hin ngi bonoyo, i tuɓakaŋ mulaka, asi naŋ muso ti pura ircece naŋ na, a sa sawa kaɓa gazlavay ngi vuŋ ti hin ngi kwalay