Read South Giziga Sir 36 Bible Online

Sir 36 - South Giziga bible

Sir 36

¹Dira dibiɗ ngi mizli ngi Buymisemuŋhoy Buymisemuŋ, kumani miwa si gazlavay kuzluˀ gar, pura ndra ircece.

²Anja sukwi ngi mizli gar a zluwunam ti ka.

³Guco mi da sukwi mulakay na, ti gidaŋ ɗiki, ɓa a sinaka migidaŋ haɗa i ka.

⁴Ti ka miga slra ɗik a hay ndra na, ki buga taŋ di le ka pal , naŋ kanah, ga slra ɗik mabuga ndra madiɗa ɗik na, a hay taŋ ya.

⁵Buymisemuŋ, Bumbulvuŋ mekelem mbak ka le na, ndr’i sinam ta. Anja mizli a sinukuw kanah ya.

⁶Mahiri ngi gwat mabigi gwat, ka miga taŋ na ma, ma hiri ngi gi gwat mezle ɗikeye.

⁷Hunuma vu ɗike, buga gidaŋ ɗike.

⁸Puɗuko mevel ɗik mufõh fõh na, po himaˀ ɗiki.

⁹Susuyumo mizli mazliram ti ndra ta, ngizla mesene ndrahaya.

¹⁰Ga ɓa pas a cuh kutum, wuluka hin ka muɗuva na keŋ, ɓa mizli a slufaka ɓi ngi gwat madiɗahay ka miga taŋ na.

¹¹Zlizlira is ngi mizli mikilamay na, ti vu ngi pula cuwal, ɓa mizli magaka bonoy da mizli ɗikey na, a zizam.

¹²Waha hirnga ngi buy mesene ndrahay maɓam: «Mbur mindil ndra ada kwa?»na.

¹³Jumo hirnga ngi sukwi ngi Zakopo gar.

¹⁶Vulataŋ ruwuy taŋ ka muvula taŋ di zleˀe na muŋ.

¹⁷Aw Bumbulvuŋ, pura ircece da sukwi mazilaka ti slimiɗ ɗik na, waɗ da Israyel ka migi di kaɓa mangal ɗik modogom na.

¹⁸Ga mezle da walahay ɗik dili misi li ɗik a ra na, i Zeruzalem li musuka vu ɗiki.

¹⁹Naha walahay Siyoŋ ti mizli maɓam ɓi ngi gwat mezle ɗikey yo naha hay ɗik misi ti dudoko.

²⁰Ga sedewo ngi gwat ka miga ar ɗuva virzi naŋ, gwat mijiviɗay mitilam di mi ti slimiɗ ɗik na, ga muduba.

²¹Vula migir ngi mizli makutukukuw na, ɓa mizli a sinaka, mijiviɗ ɗikeye, i mizli mikaslslahay.

²²Aw Bumbulvuŋ, ka mapura mizli ɗikey ti hiri mezle na, tuɓa diradibiɗ ngi gawla ɗikeye, naɓa mizli ngisi ruwuyoy gar, ɓa a sinaka ki Bumbulvuŋ, Buymisemuŋ ngi sete. Sina gwat mezle mufineˀ mekelemeye

²³Kwacay a tuɓa gwat mbur mazuma gar, amma gwat ngi zum vuna, mundum fineˀ cala ada.

²⁴Irne a sina ndum ngi useˀ ngi ɓuh le, naŋ kanah ya, mbur misi lesle, a mevel naŋ, a sina mingiɓi, i slire le.

²⁵Mbur misi mevel malambaˀa, a gi gwat ngi ji mevel, amma mbur misina ɓi le, a gaŋ gwat nah weˀe avu gwat ngi gi naŋ. Wina ngwasa

²⁶Ngwasa, anta wini zil ngi zuɓo ti wini ta, amma zir diyli mekelemeye, ki ŋhiya taŋ fineˀ numuŋhoyo.

²⁷Ngwas mukuyo, zil naŋ a singira sleŋ sleŋ, a funa gwat zil naŋ mawuɗo le gar.

²⁸Yo da a sina ɓi ɓi le ti ˀay mezle, naŋ teˀ teˀ na, naɓa zil naŋ, mbur misi ar wuya mindil n’anta.

²⁹Mbur mazuɓ ngwas na, a ɗuv di virzi ngi zlili, i mijini naŋ mibam vu ati naŋ, yo i ɓamtal majahaŋ jah.

³⁰Li manja mohol na, i li mimbak da muhuloy a vaka gwataya. Ar hay manja ngwasa ya kwana, zile, a liˀi kiŋ kiŋ lambaˀ, a ndir ar li niˀic.

³¹Muhul misi wer, matuwuɗ ar walahay aka aka na, mbur mapulaŋ mevel naŋ i waka? Avi mbur manja hay, misi duvuɗ a ji di le akẽh, a hin wãˀ wãˀ na, naŋ kanah ya.