Read South Giziga Sir 37 Bible Online

Sir 37 - South Giziga bible

Sir 37

¹Ngama mezle ati malambaˀa Mbur gar a ɓuw: «Yi ngama ɗik aya!» na mekelemeye i ngama ngi slimiɗ naŋ si.

²Da cil ɗik misi i ngama ɗiki, a tiri mesene ɗik le na, akka! i mbulo mi misi kaɓa ngi mucu.

³Kayya! Wuluk ndra malambaˀ na, a gaka ngi mike? n’ani a ra ndaha li ti tikina vu naŋ na.

⁴Mbur mekeleme, da cala naŋ ar wuya na, i ngama naŋ, amma da naŋ ar bonoy na, a mbiɗi hirik ng’a ra muŋ.

⁵Ngama misi kanah, da a ra lum zum avi ka na, kum ar bonoyo zlaɓa, amma da a mbiɗi le ngi kiɗa vu na, a ɗum ɗum a duba mbaray.

⁶Ki puyuk hirnga ti ngama ɗike ta, ko ki gi zlili le kwana, n’ada keŋŋe a mevel ɗike. Zuwen kuti wanaka?

⁷Mbur makutuw gar na, a pura kuti naŋ i mezleŋ, amma mekelemeye, a kutuw ngi luma lum naŋ.

⁸Ji lesl avi mbur muvula kuti, anja ki sina gwat naŋ mawuɗo sin le, bista, a kutuw na, ngi ɗiya jiviɗ nga naŋ. Ji lesl vur naŋ mazumuw ti caca.

⁹A ɓuw: «Gwat ngi gi ɗike naŋ kuy», joˀ a cici zar kileŋ, a puruw da masa gi avi ka i mike na.

¹⁰Mbur maziziruw na, ki ngil wuy ava ta, yo gwat ka mujuwa a mevel ɗik ngi gi na, ki ɓa da misi suloŋ ɗike ta.

¹¹Ki ngil wuy ngi ra kuta ngwasa avi gis naŋ ta, ki ngil wuy ngi ra gi vurum avi mbur muzluwuno ta, ki ngil wuy ngi hiɗika gwata, avi migi terere ta, ki ngil wuy ngi hiɗika gwat ɗik avra, avi mihiɗika gwat ta. Ki ngil wuy ti mezle ngi mburo, avi misi may gwat ta, ki ngil wuy ti gi mezle avi mbur mihimaˀ ta, ki ngil wuy ti slra ko wanaka gar, avi mbur masafaya ta, ki ngila wuy ngi slra makiɗ mi, avi mbur matiɓi dala vur vi ta, ki ngila wuy ngi slra madiɗa ngi ra gi, avi gawla ngi hay mbur ta. ko ki gumbaˀa mizli tayna neˀ le ngi cufuɗa kuti ta.

¹²Amma ndir ɓaˀ avi mbur miteŋteŋ ka misina le a ra sipa ɓimuɗuvahaya, asi gwat naŋ mawuɗ a mevel naŋ na, i misi purla ati ngi ɗike. mbur misi, da ki zluɓ le kwana, ki sam bonoy cuwa na.

¹³Anja ki sina cici gidaŋ gidaŋ ar gwat ka mujuwa a mevel ɗike, asi mbur miteŋteŋ avi ka mufineˀ n’anta.

¹⁴Mevel ngi mburo a vurkaŋ, fineˀ mijiɗa lihey tarnaˀ midedeŋ ar li miɗingire.

¹⁵Amma madiɗa naŋ na, cufuɗa Buymisemuŋ Mimadiɗa, ɓa a ru ti ka ng’ar ɓi mikaslsla. Anja sin mijileŋ a pul gir da mizli mekelemey mbak ka vuna le

¹⁶Ɓa ki sa zli slra na, ngilaka wuy naŋ ɗagay, ka mawuɗ gi gwat gar na, wuluk kuy kuy.

¹⁷Dimbasl ngi wuluk na, a bo tir mevel ngi mbur.

¹⁸A puso gwatay ada mufaɗ: gi mezleŋ ati gi malambaˀ, siifa ati mucu, amma mabo di ng’avra ndrehhe i mi ngi irne ngi mbur.

¹⁹Mbur misin gwat le na, a dubun gwat da mizli haɗi, amma a sina cika vu vur hirnga naŋ ta.

²⁰Mbur mekeleme, a sina me teˀe, amma mizli a hirsakaŋ, ko gwat ngi zum kwa a lum ta.

²¹A gi kanah, asi a luma gi mezle ngi Bumbulvuŋ ta, yo asi sin mijileŋ anta neˀ le ava ta.

²²Mbur mekeleme, sin mijileŋ nga naŋ, i ngi luma gwat da hirnga naŋ tewle, yo gwat naŋ maluma ti lesl naŋ na, i ngi pula gir da naŋ tehhe.

²³Mbur misi sin mijileŋ na, a dubuna gwat da mizli naŋhaya, yo gwat mizli naŋhay malumam ava na, i gwat migisiŋhey.

²⁴Mbur misi sin mijileŋ na, i muɗuwula mi le haɗa, mizli gar mapuraka na, naŋ ar mumul.

²⁵Zik ngi vi ngi mbur na, i hin slaf slafa, amma zik ngi vi ngi Israyele anta sluf ta.

²⁶Mbur misi sin mijileŋ misi awuzla mizli naŋhay na, mizli a sa pulakaŋ mevel taŋ, joˀ slimiɗ naŋ a sa ndir ngi sete. Zuma gwat weˀe

²⁷Mangal ɗu, ar siifa ɗike, pura vu ɗik tahaŋ ɗike, pura gwat maru ati vu ɗik ta na, ki ga ta.

²⁸Asi gwat gar na, a ru ati vu ngi mbur gar ta, yo gwat gar na, naŋ kuy avi mbur gar ta.

²⁹Gwat mundum gar na, ki zuma hom hom ta, yo ki va gwat ngi zumo ti vi ta.

³⁰Asi zum muhom homo, a vul jiji, yo zum mufineˀ gidaŋ, a ji kwacay.

³¹Mizli haɗi a mucam le, asi zum mufineˀ gidaŋ vuna, amma mbur maji lesl avi gwat ngi zumo, a zik haɗi ar siif a.