Read South Giziga Sir 38 Bible Online

Sir 38 - South Giziga bible

Sir 38

¹Gwat ngi gi da goftor ati jiji Ɗuva hirnga da slra ngi doftoro, asi migaŋ naŋ vuna, i Bumbulvuŋ vuna ya.

²Ma mbulo mbur na, i Buymisemuŋ Mimadiɗa. joˀ buyo kwana, a vulaŋ gwat ngatara da doftoro.

³Doftoro, a jijih asi sin naŋ ngi gi gwata gu, joˀ mizli madiɗahay a ŋhiyakaŋ.

⁴Slalakay gar na, a boko tivi ruwuy, mbur misi lesle, anta hirsa taŋ ta.

⁵Ɓa mizli a sinaka gidaŋ ngi Buymisemuŋ na, Moyis a ɗumburo yama ti dum ɓuluˀ ta kwa?

⁶Buymisemuŋ a vula sin ngi gi gwata le da mizli, ɓa mizli a gakaŋ dudok, asi gwat mezlehey naŋ miga taŋ na.

⁷Doftor mavula slalak da mizli, a taˀa vu ngi ji na, ti sin nana vuna.

⁸Mbur midi slalak, a lahaɗa slalakaya, ɓa slra ngi di slalaka, a kiɗ mi tay le ta, mizli muroko ti vu taŋ zuy zuy asi ruwuy na, mbele naŋ.

⁹Mangal ɗu, daka ti jiji na, ki gi di vagas ta, amma dir dibiɗ da Bumbulvuŋ ɓa a mbuluw.

¹⁰Pula gi malambaˀa, gi gwat misi ti jiviɗ naŋ, yo buna mevel ɗik avi mungrahay gar.

¹¹Da gidaŋ ɗik ada na, gi mikuli ti urdi, waɗ ti hapa, mal gujaˀ gujaˀ avaŋ ngi wuluk keŋ.

¹²A dirba nah, ki pula li da doftor, asi migaŋ i Bumbulvuŋ vuna ya. Ki pula doftor a cuh kileŋ avi ka ta, asi k’ada ti may naŋ.

¹³Pas naŋ a sa bawa, ɓa ki mbul na, sey asi haŋ taŋ.

¹⁴Asi taŋ vuna kwana, ɓa ngi mbulo misi jiji, yo ɓa a vula taŋ slalak ngi laha siifa ngi mburo na, ada a diram dibiɗ da Bumbulvuŋ vuna ya.

¹⁵Mbur magi mungra a mbuŋ Buymisemuŋ na, anja a diɗ asi haŋ ngi doftor! Gwat ngi gi ar li vagay

¹⁶Mangal ɗu, tuwa mbur mumuc le, mbiɗa tuwuyo pulaˀ pulaˀ, kaɓa gwat majuw haɗa haɗa. Ga gwat magaka da vagay ngi mburo, yo ki gi ma raɓa ti li ngi zivi naŋ ta.

¹⁷Tuwuy kaɗam kaɗam, irslik irslik, ga gwat ngi vagaya tiɗeˀe kaɓa magakaŋ, ar hin pal malla cuw, vur mizli macikislam ɓi, a dirba nah, tisla mevel avi gir ɗike.

¹⁸Asi lik na, a kiɗ vu vagay, yo bonoy ngir mevel ngi mburo, a tikaŋ gidaŋ kupuyah.

¹⁹Da ar bonoyo, ki ndir ar li lik, joˀ ki pura, ka ɓaka misi murga na, a nisukuw ti nisi.

²⁰Ki pula mevel ɗike mbak da lik ta, ɓulaŋ, yo wuluk nga mbuŋ.

²¹Mbur mumuc le, a bo ta na, ki puyuk di hirnga ta, ko gwat ka magi pet avi muco anta, a guw di malambaˀ daka jaka.

²²Wuluk keŋ ɗi, muc nana vuna, a ra kutuku ka vuna ya jaka: yi muc le ngi dambu, dana kwana i ka ya.

²³Da mbur a ci hirnga le ar vigiɗ na, musuk vu ɗiki, ki wuluk a ra mata, da naŋ mitiɗa hiri le tiɗeˀ si na, taˀa tuwuy vurˀe. Slra ngi liiriɓe, gir ada raŋ

²⁴Ɓa ngi luma sin mijileŋ haɗa na, sey da li pula vu ada avi ka haɗi. Mbur misi slra anta avaŋ haɗa ta na, a lum sin mijileŋ.

²⁵Mur muhuf mikaw ti gam ngi slahay na, a luma sin mijileŋ mbri mbrike? Maciraŋ hiri nga naŋ, i duduɓa ganday misi ɓiri yoŋ avi mi naŋ [4] tewle, siifa nga naŋ a kiɗ mi asi slahay tewle, yo a ɓi sey ɓi ngi ng’arihey tewle.

²⁶A pula mevel nga naŋ mbak ngi ki baray ar guva, li zik nga naŋ, i ngi vula murbuc da madiya slahay.

²⁷Misina ɗiya gwatay ati micira dumoyo, taŋ cek i misi purla, ti duvuɗ ti papas gar, a ndiram ar li gi slra na si. Kaɓa ani mbur mafutuɗ gwat ngi ɗuva haŋ ar ɗerewol na, a mbiɗa kuy naŋ mbak le ta. A pula mevel nga naŋ mbak ngi ɗiya fotohoy, yo li zik nga naŋ i slra naŋ tewle.

²⁸Mbur gudi micifi le a ciki zudi na, naŋ kanah ya, lesl nga naŋ aro ar ɓiri na si. Vu miwikwik na, a baŋ ti liiriɓ yererere, yo a ra cik di vu, hã n’ada a ciki vu muhuɗiɗi. hurum ngi tele, a ra dislaŋ slimiɗe, yo aro hiri taˀ avi gwat naŋ mavuɗa vuna, a pula mevel naŋ le mbak, ɓa a ga slra nah kuy kuy, yo li zik nga naŋ, ar li ɗiyi taŋ, ɓa a boko kuy kuy wãˀ.

²⁹Mbur mindira gwat mujoˀ ar slra naŋ na, naŋ kanah ya, a ra mbiɗi a ciki gwat naŋ mandira. lesle aro keŋŋe ar slra naŋ, a cici zlak ngi ndira gwatay haɗi.

³⁰A kulupa hohoyo ti sar, ɓa a gi junkoɗ junkoɗ, a ndira ndir naŋ ti haŋ. a pula mevel naŋ le mbak wãˀ ar li ga taŋ ɓerem, yo a zik nga naŋ ar li ɗiya li zluma gwat naŋhay.

³¹Mizli tayna gar na, a roko hiri njah, asi gwat taŋ magaka tahaŋ taŋ, yo mbur gar a sina slra naŋ le,

³²Mbele taŋ ta na, anja a ndiraka walahaya ta, a pam ar walahay ta, ko liˀi ar walahay kwa anta, amma da a mbiɗi le ngi ngila wuy muduba na, anta cufuɗaka taŋ ɓaˀ far le ta.

³³Ar cikil madiɗa na, anta lumaka li cifi ngi mbuŋ ta. anta sa cifam ar li ngi migi kiitahaya ta ma. Taŋ a sinaka jiviɗ ngi ɓimujuwa mitaˀ gara ta. K’anta ki luma taŋ ar li ɓi ɓi ti kucuwulo ta ma.

³⁴Amma gwat Buymisemuŋ miga taŋ na, a ra wam taŋ vu ngi sete, yo diradibiɗ nga taŋ, ɓa a gaka slra taŋ kuy kuy. Li lum ngi buy ngi ɓimujuwa Avi mbur mihirdam hirdam ngi wuluk ar ɓimujuwa ngi Buymisemuŋ Mimadiɗa na, naŋ pal.