Read South Giziga Sir 39 Bible Online

Sir 39 - South Giziga bible

Sir 39

¹Mbur mirdam hirdam ar Ɓimujuwa na, nga naŋ, i dubuna sin mijileŋ ngi mizli micawwahay gar, yo li pula vu nga naŋ, i ngi wuluk ar ɓi ngi mijiviɗey.

²A wi vu ti ɓi mizli maslufaka vur mizli ngi zila slimiɗeye, yo a ci kpis ngi dubuna ɓi maɓaka ti kucuwulo.

³A dubuna ɓi muɗum ngir mi ngi wuya, a ndir na, ar li wulka ɓi masli wala ta ngir ɓi miɓa ti kucuwuloy.

⁴Naŋ mudubun tuwa na, a gi gawla ngi mizli madiɗahaya gu, joˀ a buga vu naŋ awuzla buyoy ɓa a sinakaŋ. A zuɓ mulak nga wuzla sukwi ngi mizli mikileŋhey, asi a sina ɓi mezle ati malambaˀ ngi mizli le.

⁵A hurdum hirdam ngi bi ti li nga ciki Bumbulvuŋ migaŋ deŋ titiri na, joˀ a dir dibiɗ a mbuŋ Buymisemuŋ Mimadiɗa. A wuna mi nga naŋ sey ngi diradibiɗi, yo a tumbuloŋ vur mungra naŋhay.

⁶Da Bumbulvuŋ, Buymisemuŋ Madiɗa a ngum le na, a sa vulaŋ wuluk ngi lesl haɗi. Dar naŋ vuna kwana, a sa njika ɓi ngi sin mijileŋ nah ya, yo a sa hunuma Bumbulvuŋ ar diradibiɗ naŋ.

⁷A sa gi kiita mijeŋŋe waɗ sin ngi gi gwata, joˀ a sa wuluk ar ɓi miyaŋ ngi Buymisemuŋ.

⁸Dubun naŋ mudubuna na, a sa bugakaɗaŋ kaɗaŋ, yo a sa jijih nga naŋ ti ɓimujuwa ngi jumoˀay ngi Bumbulvuŋ.

⁹Mizli haɗi a sa ŋhiyaka wuluk nah, ko t’anta sa puyukom di hirnga ta ndidaˀ wãˀ. Wuluk naŋ a sa ndir keŋŋe a hirnga, a susuyum ta wãˀ, yo slimiɗ naŋ a sa ndir nga mbuŋ vur dideˀ vur dideˀ.

¹⁰Sukwi ngi mizli a sa ɓaka ɓi ngi sin naŋ mijileŋ, joˀ a sa ngilam di wuy ar kus madiɗaŋ.

¹¹Da a zik le haɗi ar siifa na, slimiɗ naŋ a sa zil, fineˀ ngi mizli mekelemey durmuku, da ko a muc le tekeɗe kwana, muk ti naŋ si. Gwat Buymisemuŋ maga gar na, a ga mezleŋ

¹²A dirba ya muwuluk cingiŋŋe na, i wuɗo ɓi ma, wuluko, aro teŋteŋ a kwacaya, kaɓa kiya minih le puɗuwar wãˀ.

¹³Ziri ɗu miteŋteŋhey, da kira cinikiy mi na, ki sa gilam kaɓa mufuyuk magil kaˀ a mi yam.

¹⁴Kum kaɓa urdi mazlum, mapula zĩˀĩ mundum. yo ki ra hilam mufuyuk kaɓa matayay. Zuɓaka ˀay a muŋ, zlam dimis ti ˀay purla, yo gaka sise da Bumbulvuŋ ar gwat ngi gi naŋ gar.

¹⁵Buymisemuŋ naŋ madiɗaŋ, tilaka mi nah, hunumakaŋ awuzla mizli, ti dimis waɗ ti garaya, joˀ ki sa gakaŋ sise ti mingiɓi ani:

¹⁶Gwat Bumbulvuŋ miga gar na, i mezlehey, yo ɓi naŋ miɓa daˀ le gar na, a gi le ar pas naŋ ar pas naŋ.

¹⁷Anta ngi ɓi: «Hana i mike? A gi vur mike? na» I cin ta. Asi gwat gar na, a sa luma zila mi naŋ ar pas nga naŋ nga naŋ. Buymisemuŋ miɓi le daˀ si na, yam a cici kiŋ, a ɓi daˀ si na, yamay a cikilam ng’ar futuŋhoy puɗak puɗak.

¹⁸A ɓi daˀ si na, gwatay a gam kasl kasl asi mevel naŋ, mbur ɓa a tikaŋ angi slra naŋ ngi lah vu na, anta ko loŋ ta.

¹⁹Gwat mizli titirahay magaka gara, n’ada cikislaɓ a mbuŋ naŋ yo mbur a ɗum a mbuŋ naŋ gu ta.

²⁰Zle avi zli virzi naŋ hã avi kiɗa mi naŋ na, a ra singila gwataya, ko gwat mazumaŋ hirnga anta loŋ ta.

²¹Anta ngi ɓi: «Hana i mike? A gi vur mike? na» I cin ta, asi gwat naŋ miga gar na, naŋ ti slra naŋ ti slra naŋ.

²²Ɗuwula mi nga naŋ a zuɓ kaɓa mekepel a mizaw, kaɓa yam mupuɗak puɗak maci avi ruwuy.

²³Naŋ kanah ya, himaˀ naŋ masa zuɓa, a sa ndila sukwi mekelemeye, kaɓa naŋ mumbuɗa li mahire, a tiri di papala misi melemeɗ na.

²⁴Jiviɗ naŋ mabuga da mizli mipalaya , naŋ cirre, amma avi mizirɗa mi naŋhaya, gwat ngi gi ngaˀa, a tiki ta.

²⁵Zle angi ɗuva virzi naŋ vuna si na, Bumbulvuŋ a ga gwat mezleheye vur mizli mezlehey, yo a ga gwat malambaˀhaya vur mizli malambaˀhay.

²⁶Gwat mudumbuŋ ɓa mbur a ngir di ar siifa naŋ na, i yam, vu, ɓiri, mandaŋ, hapa mukuɗ kuɗ ngi alkamari, ɗuwa, mam, mbaazla ngi gudubun, mal waɗ zana.

²⁷Gwat tayna gar na, taŋ mezle avi mizli migisiŋ gisiŋ ngi Buymisemuŋhoyo, amma a mbiɗi malambaˀ pirvik avi migi mungrahaya.

²⁸Birkataŋ miga hĩˀĩ ngi kuta mizli ada, yo taŋ muroko ar mevel na, mendere a gi ti gidaŋ jaka. Ar hin ngi kiita so na, a njuyoko himaˀ taŋ, joˀ a tislaka mevel da mbur migi taŋ na.

²⁹Vu, slaslalay, may waɗ mucu, a gaka taŋ hĩˀĩ ngi kuta mizli.

³⁰Slin ngi gwat miji vuhoy, uruc, kwecesle waɗ maslalam ngi pula cuwala, a ra ngizla mizirɗa miheye.

³¹Sey a mbiɗam pirvik ngi cina mi da ɓi naŋ mi ɓa daˀ le na. A ruwuyo, gwat migi le neˀ na, taŋ dedeŋ, pas naŋ misa bo le na, anta sa ngilaka mingiɓi naŋ mata.

³²Yi sina ɓi nah le zle ar ɗuva virzi naŋ vuna si, i wuluka wuluk wuluk na, joˀ i toho ti tuhu na vurˀe.

³³Gwat Bumbulvuŋ miga gar i mezleŋhey, da gir mujuw le gar na, a vuluw gwat ka mawuɗo.

³⁴Anta ngi ɓi: «Hana gaɗay gaɗay le» na, i cin ta, asi da hin naŋ misa ndila le na, i sa sinaka gwatay gar, taŋ i mezlehey.

³⁵Wurenna so na, hunumaka Bumbulvuŋ ti dimisi gakaŋ sise ti mevel pula, ti ˀay ngar ngar.