Read South Giziga Sir 4 Bible Online

Sir 4 - South Giziga bible

Sir 4

¹Mangal ɗu, gwat ɓa mbur misi murga a ngir ti naŋ na, vulaŋ, ki pula mbur misi murga tutuɗukko, hirnga puyuk ta.

²Mbur misi may majaŋ, ki pulaŋ a si bonoy ta, mbur migeˀ ircece, ki pulaŋ a ji mevel ta.

³Mbur muro ar mevele, ki slikiɗaŋ di ti gidaŋ ta, mbur makutuk ɓa ki vulaŋ gwat na, ki zik puyuk ta.

⁴Mbur misi ar bonoy, matumbuluw na, ki ɓula ta, ki mbiɗa duba da misi murga ta.

⁵Pura mbur misi murga, ki mbiɗaŋ duba ta, vur naŋ magi ti ka mbur ngi nisi.

⁶Da a nisuw le ti mevel naŋ wãˀ, fõh fõh na, naɓa Buymisemuŋ migi naŋ na, a sa tuɓaŋ diradibiɗ nah.

⁷Ga gwata ɓa mizli a wuɗukuw, hin hirnga a mbuŋ mbur madiɗa.

⁸Jika slimiɗe ng’avi misi murga maɓuw na, mbiɗaŋ di ti ˀay mezle, ti mingiɓi magaŋ vu zuyyo.

⁹Mbur maguzuvurakaŋ na, tuɓo di avu muguzuvur naŋhaya, da ki ra gi kiita na, ga cir cir.

¹⁰Gi ti mutuhu, kaɓa ki i cine, yo gi ti mumuŋ taŋ, kaɓa ki zil naŋ: naɓa ki sa tiri kaɓa mangal ngi Buymisemuŋ Mimadiɗa, joˀ Buymisemuŋ Mimadiɗaa, a sa wuɗuw fineˀ munuko. Sin mijileŋ ati gwat naŋ madubuna da mizli

¹¹Sin mijileŋ, a ga ɗongor da ziri naŋhaya, mizli masipam sin mijileŋ na, a ki slimiɗ kuy kuy ar taŋ.

¹²Wuɗa sin mijileŋ na, i wuɗa siifa, mbur mabi tili nga ji hirnga ti sin mijileŋ na, a sa mumul hã a mbi.

¹³Mbur mulum sin mijileŋ le na, a sa lum dudoko, angi li naŋ maru gar na, Bumbulvuŋ a ra ɗuwulaŋ mi.

¹⁴Da mbur a ra gi gawla ngi sin mijileŋ na, naɓa a dilik na ti dilik a mbuŋ Buymisemuŋ Mipala, mizli mawuɗam sin mijileŋ na, Bumbulvuŋ a wuɗ taŋ.

¹⁵Mbur macin mi da sin mijileŋ na, a ga kiita kasl kasla, mbur magumbuˀ ti sin mijileŋ na, a sa cifi setetete.

¹⁶Da a pulaŋ mevel naŋ le na, a sa zuma hay naŋ, a sa ndir ngi mumul da zir naŋhay nga mbuŋ.

¹⁷Sin mijileŋ a sa ru di slurkoɗ ɗagay, a sa gaŋ zluwun, a muɗaŋ didaka. a sa sirikaŋ ti ɓi ngi sipi naŋhay, sey da sin mijileŋ a pura na, a ndila le muduba far, a sa ci a kwacay naŋ ti ɓi naŋ miɓa daˀ le.

¹⁸A dirba nah, a sa so gurro ng’avaŋ, a vulaŋ mumul, dar a njikaŋ ɓi miyaŋŋa naŋhaya.

¹⁹Amma da a zizi le avi sin mijileŋ na, sin mijileŋ a sa pulaŋ, a sa pulaŋ mbak a zizi. Mesem migisiŋ ati migisiŋ ta

²⁰Singila gwatay macohomo, yo wi vu avi malambaˀa, anja kpak ɗik a guw mesem ta.

²¹Asi mesem mekeleme, a ci ti ka ng’ar mungra, mesem mekeleme kwana, a vuluw dudok waɗ gi mezle.

²²Ki cici siɓaŋ siɓaŋ vur vu ɗik tehhe ta, anja mesem a kuɗuw hã fineˀ gidaŋ ta.

²³Da mingiɓi ada na, sey ki ɓi.

²⁴A sa sinaka sin mijileŋ ar mingiɓi ɗiki, gwat ka mudubuna kwana, a sa lumaka ar mi ngi balam ɗiki.

²⁵Ki ngil mi ar ɓi mikaslsla ta, gwat ka misina ta na, anja a guw mesem.

²⁶Anja mesem a guw ngi njika mungra ɗikeye ta, mizaw maɓul na, ki tika gu ta.

²⁷Ki pula mbur gilaw a kuw a mbuŋ ta, ki pula mbur misi gidaŋ, a kuw mi ta.

²⁸Cik vu ti ɓi mikaslsla hã pam, naɓa Bumbulvuŋ Buymisemuŋ, a sa cik vu ar li ɗike.

²⁹Anja ki gi mi kwalĩ kwalĩ ta, amma da ki wuɗ gi gwat na, gi masafaya, yo puyuk hirnga.

³⁰Anja ki gi ka mobor avi mizli ngi hay ɗikeye ta, yo gi cunuˀ cunuˀ avi gawla ɗikeye.

³¹Anja haŋ ɗik a ndir baŋ ngi tuɓa gwat ti tiɓi si, yo a mbiɗi le ngi mi ti gwat da mbur so na, ki tiɗa na, a gi ta.