Read South Giziga Sir 40 Bible Online

Sir 40 - South Giziga bible

Sir 40

¹Bonoy titiri wuya ar vigiɗ Mbur titira gar na, diga naŋ mabo ti kwacay mumuŋ si na, Buymisemuŋ a vulaŋ lik mihaɗa le waɗ galalaŋ mududok, gilisl asi ˀaya, hã kulaˀ hirnga a ruwuy, ruwuy mumuŋ ngi duniya.

²Gwat maga taŋ zluwun, taŋ malikaka a mevel taŋ na, a roko di keŋŋe a hirnga: i hin ngi mucu.

³Zle avi buyoy mujoˀ joˀ ti dudok ar janga taŋhay, hã seŋseŋ avi mihina hirngahay mujojoˀ ar fucu a ruwuy.

⁴Zle avi miki zana ngi gabaga mindezze waɗ hirnga tuwaɗ tuwaɗ ri loppolo, hã seŋseŋ avi miki zana ngi gabaga muho gar na,

⁵a sinam di slikiɗa mevel, suloŋ, zlira vu, wus haɓar haɓar, zluwun ti mucu, ji mbur a kwacay waɗ wunukaˀay. Yo da a roko musukam vu tutup ar gitihin ti duvuɗo ma na, wuluk a bo mekelem mekelem.

⁶Da a musukom vu le njeffe si na, i bonoy misi purla ati ngi papas vuna ma, gwat taŋ mapuraka ar musuwuno, a ga taŋ welele, taŋ kaɓa sojehey mulohoko tir vurum.

⁷Hirak ar laha vu na, a puɗuk, lesl welele, asi naŋ muzluwun na, i ngata raŋ.

⁸Mendere ada kutuko gwat misi titirihey gar, zle avi gwat misãmihey hã avi mbur titira, amma asa gi avi mbur migi mungra ti vendeke, makaw tarnaˀa:

⁹i mucu, kiɗa hirngaŋ, wunukaˀay, vurum, gwat ngi mendere, may, waha li waɗ doflo.

¹⁰A gaka gwat tayna gar vur mbur maziriɗ mi, yo mekepel madiɗa migi ar duniya na, vur taŋ ma.

¹¹Gwat mubo tivi ruwuy na, a sa mi nga ruwuyo muŋ, yo gwat mubo tir mubuliy kwana, a sa mi ng’ar mubuliye ya. Gi gwat mijeŋ ta a sa kiɗ mi

¹²Kimi ngi mbur ti gwat ngi vul waɗ gwat mijeŋ ta gar na, a sa susuyumoko taŋ avra, amma gi teŋteŋ, a sa ndir hã ngi sete.

¹³Zlili mizli malumaka ti jiviɗ malambaˀ na, a sa hisikam kaɓa mekepel mahisiki, a sa cuh baɗ ti ndisl ti gidaŋ, kaɓa ndisl ngi vuɓ malasar.

¹⁴Da mbur mijeŋ ta, a wuna haŋ le baŋ na, a mumul, amma i ngila ɓimujuwahaya, a sa susuyumom leɗeɗ wãˀ.

¹⁵Ziri ngi mzili mizirɗa mi ngi Buymisemuŋhoyo, anta sa jam haɗa ta, mizli misi dili tayna, a diram dambasl gu ta, taŋ ar muwã ar muwã.

¹⁶Lavaɗ mapus a ˀaydidik ngi mizaw ko wanaka gar na, a muɗaka daf ar giziŋ mekelemeye.

¹⁷Amma gi mezle, naŋ kaɓa jarne muluma li le, yo gwat ka muvula da misi murgahay mana, anta sa puyukom di hirnga ta. Gwat mezle ati gwat mezle muwãˀ

¹⁸Mbur mazum asi mbur ta waɗ magi slra gu na, a ra pulam vu ar siifa taŋ, amma mbur mulum zlili le ma na, a mumul vu fineˀ ma.

¹⁹Slimiɗ ngi mbur a zil na, asi a yi ziri le haɗi malla a pi walahay le, amma ngwas giɗaɗo, slimiɗ naŋ a zil fineˀ mucuw tayna ma.

²⁰Mbaazla ati gwat ngi dunguro, a ga mburo mumul mumul a mevele, amma wuɗa sin mijileŋ na, a funa gwat mucuw tayna le ma.

²¹ˀAy ngi bozloro ati gujuvur a zliram le na, a cin kuy haɗi, amma mi mideɗeke, a funa gwat mucuw tayna le ma.

²²Gi sise ati kuy ngi mburo, a pur kuy avi hiri, amma gwat mulus le ar guva na, a funa gwat mucuw tayna le.

²³Ngama ati cala, a zliram ar pas taŋ muwuɗam le, amma ngi ngwas ati zil naŋ, a funa le ma.

²⁴Sukumoy ati mijini ɗikey, a boko to ka ar bonoyo, amma gwat ngi vul da misi murgahaya, a luhukuw fineˀ taŋ ma.

²⁵Da k’ada ti ɓiri hirnga waɗ dala na, ko ki zluwun ta, amma kuti mezle, mizli a ŋhiyaka fineˀ gwat tayna ma.

²⁶Da zlili ada waɗ gidaŋ ma na, ko ki zluwun ta, amma zluwun ti Bumbulvuŋ a funa le ma. Da ki ra zluwun ti Bumbulvuŋ na, ko gwat makucuw anta, mbur mazluwun ti Bumbulvuŋ, anta wuɗ mijina is mata.

²⁷Zluwun ti Bumbulvuŋ, naŋ kaɓa jarne muluma li le, a cik vu a hirnga ndra fineˀ gwat misi ti dudokoy gar. Ki gi kaɓa musuko gwat ta

²⁸Mangal ɗu, ki suk gwat ti suk ta. Suko gwat ti suk na, zuwen mucu.

²⁹Mbur mandir ti hiri taˀ nga ciki liwis ngi mizli na, siifa nga naŋ, anta sluf kaɓa mbur misi ti siifa ta. A ra jupa vu naŋ ti gwat ngi zum naŋ muluma ti gidaŋ naŋ ta, mbur muwuna slimiɗ le, mukutaka le na, anta ga gwat nah ta.

³⁰Avi mbur manja meseme, suko gwat a gaŋ kuyyo, amma a sa wuraŋ a kwacayaka vu.