Read South Giziga Sir 41 Bible Online

Sir 41 - South Giziga bible

Sir 41

¹Mucu Kayya mucu, avi mbur mapul vu awuzla zlili naŋ, avi mbur malik ta, gwat naŋhay a ra ram kuy kuy, ngaɓa naŋ avi mbur miwirwir aruŋ, muro ti may gwat na, a gaŋ kuy ngi zila slimiɗ ɗike ta.

²Yawwa mucu, avi mbur misi murga manja gidaŋ na, ki so kuy, avi mbur migi gal le wãˀ, lik a giraŋ le kupuyah, avi mbur misi may sliŋ, ɗuva wuluk taˀ anta va mata na, ki so kuy.

³Mangal ɗu, da muc a juwa le ngi so ng’avi ka na, ki zluwun ta, inga wuluk ar mizli mudumbuŋhoy ar ka, waɗ ar mizli masa yaka taŋ a dirba ɗiki.

⁴Muco, i gwat Bumbulvuŋ mujuwa a mevel naŋ vur gwat misi titirihey gar. Gwat Buymisemuŋ Mimadiɗa muwuɗ le ɓa a gi ma na, ki ngilam mi a ra vur mike? Da ko ki zik a ruwuyo, vi kuruˀ, vi skat malla durmuk kwana, anta sa ngilam mi ti ɓi ngi siifa ɗik ar li ngi mizli mumucahaya ta. Gwat makutuko mizirɗa mihey

⁵Ziri ngi mizli migi mungrahaya, a tiram le migi gwat mukuytahay wãˀ, a ndiram nga taŋ a hay mizli mizirɗa mi ngi Buymisemuŋhoy.

⁶Ziri ngi migi mungrahaya, gwat taŋ malumaka, a ra zizi. Mesem a ra sipa dideˀ taŋhaya mbak le ta.

⁷Cine maziriɗa mi ngi Buymisemuŋ na, ziri naŋhay a sa mbiɗakaŋ hirnga, asi a ra so ti gwat ngi mesem nga hirnga taŋ.

⁸Mizli mizirɗa mi ngi Buymisemuŋhoy, i bonoy avu kum, asi ki pulaka ɓimujuwa ngi Buymisemuŋ Mimadiɗa le.

⁹A yukum na, ti yi minisa le, yo ki sa mucam na, ti muc minisa le ma.

¹⁰Gwat mubo tivi ruwuy gar na, a sa mi nga ruwuy, naŋ kine, mizirɗa miheye, a bam tir nise nga zizi. Zil slimiɗ tir mezleŋ

¹¹Mizli ada gam vagay vur dum vu ngi mbur mumuc le, amma zila slimiɗ tir mungra, naŋ kuy ta, a sa kiɗi.

¹²Gi welele ti zila slimiɗe, asi a sa ndir a dirba ɗike, a zik fineˀ ɓiri hirnga zikitiŋ zikitiŋ durmuku.

¹³Zik ngi vi ngi mbur misi ar wuya, hin naŋ i sla le, amma mbur mezle, slimiɗ naŋ a zil ngi sete. Gwat magi mesem i gwat mike

¹⁴Ziri ɗuwoy, jaka dubuno kuy kuy, ti zuy zuy. Sin mijileŋ muɗum na, i zlili miyaŋ mapur ta, na taŋ cuw taŋ a pulam gir ngi mike? Slra taŋ anta.

¹⁵Mbur matiɗi kalaf ar gilaw naŋ na, a funa mbur matiɗi kalaf ar sin naŋ mijileŋ le.

¹⁶Gwat mapukum mesem gisiŋ na, i wuɗ i ɓukum di, asi gwat ngi mesem gar na, i ngi ɓi avi mi ta, asi mike na, mbur gar a pura gwata, i misi purla ta.

¹⁷Gi sulome a mbuŋ bunuk ati munuk na, i gwat ngi mesem, gi slir a mbuŋ buy ati mbur madiɗa na, i gwat ngi mesem.

¹⁸Gi lambaˀ a mbuŋ migi kiitahay ati mizli ngi ngumnahay, ngila ɓimujuwa a mbuŋ kus madiɗa ngi mizli, njika cil ɗik ati ngama ɗiki.

¹⁹Hul a mbuŋ midigwi ɗikey. Ngila ɓi mikaslsla ngi Buymisemuŋ ati jumoˀay naŋ na, a gi mesem, suko gwat ngi zumo, a gi mesem, tuɓa gwat malla vula gwat ti hirsa vu, a gi mesem.

²⁰Da mbur mira juw haŋ, ki tuɓa ta na, a gi mesem, pura ngwas sulome cum cum na, a gi mesem.

²¹Ɓula mbur ngi ruwuy purla ati ka, a gi mesem, ngica gwat ngi mbur malla avi gwat muvulakaŋ di, a gi mesem, pura ngwas ngi mbur cum cummo, a gi mesem.

²²Ki gufo ngwas migi slra ɗike ta, ki gumbaˀa li hin naŋ ta. Ki za ngama ɗikeye pet pet ta, da ki vula taŋ gwat le na, ki ŋfoˀo taŋ ci ci ta.