Read South Giziga Sir 42 Bible Online

Sir 42 - South Giziga bible

Sir 42

¹Ɓi ka micina le, ki ma hiri naŋ ta, yo ki njika ɓi miyaŋŋa ta, a gi mesem. Vurˀe, ki sa sina mesem migisiŋ gisiŋ, joˀ mizli gar a sa purukuw kuy. Gwat ngi gi mesem ti taŋ ta Gwatay ani, ki gi taŋ mesem ta, ki ga taŋ waˀ waˀ ɓa a ci ti ka ar mungra ta:

²Ki gi mesem ti ɓimujuwa ati jumoˀay ngi Buymisemuŋ Mimadiɗa ta, ki gi mesem ngi ga kiita da mbur mizirɗa mi ngi Buymisemuŋ ta,

³ko ki gi mesem ngi jumo zlili ɗik ati ngama ɗik malla mbur kum mazuɓam mulak cuwa ta, gwat ngi zuma haya, ko ki gi mesem ngi wunka ati mizli ta,

⁴ko ki gi mesem ngi wi gwat ti kilo mikaslsla waɗ gwat ngi wi dudok ngi gwat mikaslsla ta, ko ki gi mesem ngi lum haɗa malla neˀ kini ta,

⁵ko ki gi mesem ngi luma riba ar gwat terere ɗike ta, ko ki gi mesem ngi cici kaŋ kaŋ ngi kuta ziri ɗikeye ta, ko ki gi mesem ngi kiɗa gawla ɗike hã ti pumbuso ta.

⁶Da ngwas ɗike, i muwusa hiri na, wi vu ti gwat ɗikeye, yo da mizli a hay ɗike haɗa na, zlira gwat ɗikey a viŋ.

⁷Daka mira pi gwat ɗik sek na, slufa slaf le, wa dudok naŋ weˀ le. Gwat ngi ɗik avi mbur malla ngi mbur avi ka na, toho taŋ cek ti tuhu.

⁸Mbur gilaw, molooɗi malla midigila magilakaŋ ɓi ngi sulome na, ko ki gi mesem ngi kutaŋ ti bonoyo ta. Da ki ra gakanah na, ki sa buga, ki dubun le kuy kuy so, dar mizli gar a sa ŋhiyukuw. Cine malika zuŋ naŋ mongoso

⁹Zuŋ mongoso na, avi cine i gwat muɗum magaŋ ngaˀ ngi hinje, i lik madiɗa matika hinje. Naŋ migi diyli le na, cine a ra lik vur naŋ matuwuɗa vi ngi zile, da naŋ muzuɓ zil le mana, a ra lik zil naŋ masa hirsaŋ.

¹⁰Da naŋ ngbuˀo kine ruŋ na, cine a ra lika masa hiryakaŋ, yo vur naŋ masa gi hur ti hay. Da a roko zlaɓ ati zil naŋ kwana, a ra lika naŋ masa wuɗ zil mekelem, malla ta a sa yi ta kwani.

¹¹Da zuŋ ɗike, anta ja vu naŋ gu ta na, jigina kuy kuy, dakanah ta na, a sa gu gwat ɓa mesene ɗikey a singiram ar ka, mizli a kiɗam ti ka slir ar walahay, yo mizli a kusom hirnga tiŋ tiŋ vur ka, joˀ ki sa ndir hurɗuk ti mesem ar kus madiɗa. Jigina vu ɗik avi ngwasay

¹²Ko waka gar, ki pura kuy naŋ hirnga puyuk ta, yo ki cifi awuzla ngwasaya ta ma,

¹³asi ngwasaya, a boko ti ɓi ngi moˀore nga taŋ ngwasay na, kaɓa digirgboh magi avi zana.

¹⁴Zuwen moˀore ngi mbur mizile, a funa gi mezle ngi ngwasa le, ngwas a puw mesem, a njukuw ɓa mizli a zukuw. CIKILA HIRNGA NGI DUBUN MUZLUM NAŊ JOMMO Miga gwatay gar i madiɗaŋ

¹⁵Wurenna, i wuɗo ma hiri ngi slra ngi Bumbulvuŋhoyo, ya mupura ti hiri ɗu na, i wuɗo ɓa ɓi nah. Bumbulvuŋ a ga gwataya ti mingiɓi:

¹⁶Pas mawucuɗ na ar gwat gar, naŋ kine gwat Bumbulvuŋ miga gar na, n’ada ti dudok naŋ.

¹⁷Ko modro ngi Bumbulvuŋhoy kwana, a ndilaka ngi slufa gwat mezle naŋhaya ta, gwatay Bumbulvuŋ Misi Gidaŋ wãˀ miɗiya taŋ gidaŋ gidaŋ na, ɓa duniya a lum gidaŋ ti dudok naŋ.

¹⁸Bumbulvuŋ a pur seŋseŋ ar vigiɗ mijileŋ, seŋseŋ ar mevel ngi mbur, a sina gwat muɗum ngi ra le, asi sin, naŋ avi Buymisemuŋ Mimadiɗa, a ro hiri taˀ avi gwatay magam vur hine vur hine.

¹⁹A ra tilmi ti gwatay migam zlezle ati masa gam tumbuŋ, yo a ra bo ti gwat muɗumo jileŋ jileŋheye.

²⁰Wuluk ngi mbur ɓa a sina ta na, anta, ɓi ngi mbur ɓa a sina ta na, anta loŋ ta.

²¹Slra madiɗahay naŋ miga taŋ ti sin naŋ mijileŋ na, a ɗiya taŋ le ti sala ti sala, asi n’ada diga zlezle, a ndir hã ngi sete. Gwat mingic avaŋ anta, gwat migi ɓesde avaŋ anta, yo n’anta ti may ɓa a kutakaŋ neˀ ta ma.

²²Gwat naŋ miga taŋ gar na, i roko ti may naŋ, hã avi gwat mivezze meciɗek miwãˀ naŋ.

²³Gwat tayna gar na, a roko ti siifa, a ndiram ngi sete, ɓa a cinam mi ar gwat mbur muro ti may naŋ gar.

²⁴Gwatay gar na, taŋ zlaɓ cuw zlaɓ cuw, gwat gar a jam haŋ ati cala, gwat ɓa Buymisemuŋ a ga kasl ta na, anta.

²⁵Gwat gar na, naŋ puɗaw mbele cala. Dudok ngi Buymisemuŋ na, mbur mambi di ngi pur ada kwa?