Read South Giziga Sir 43 Bible Online

Sir 43 - South Giziga bible

Sir 43

¹Muŋ ati pasa Kayya! Gwat mukuy haɗi mufuna birngiŋ ada kwa ma! da ki ra pura dudok naŋ na, ki ndir ngirkik!

²Pas mira bo na, naɓa a ra ɓi: gwat mezle ngi pur mindila slra ngi Buymisemuŋ Mimadiɗa ada kwa ma!

³Da pas a gi le deŋ na, a muˀulo ruwuyo, mbur maɓusa wura vu naŋ na gu i waka?

⁴Mbur gudi a furo vu asi ɓiri, ɓa a kiɗa ti vu naŋ, na pas mawura muwãhay na, a funa vu ngi gudi ti huɗiɗi, makaw makir jak. A pulo himiɗ miwikwik mawur vu, yo a pulo sar naŋ magi hiri dirzliw na.

⁵Bumbulvuŋ migi naŋ na, naŋ madiɗaŋ, yo a ra bugaŋ jiviɗ ɓa a pa mi ngi kil naŋ kutum. Kiya

⁶Kiya kwana, hin naŋ i misla le kaslsla, a bigi hin ngi gwatay mayam ati hin macuhu.

⁷Kiya a bigi hin ngi muguzlumoy, i gwat masusuyum neˀ neˀ tay mi.

⁸Maslufaka hin ngi kiya na, ti naŋ vuna, da a mbiɗi le a ra pusluɗ na, i kuy ngi jalaɓi kwa ma, i naŋ mapusluɗa wurzlaŋhay misi a muŋ, a wucuɗa birngiŋ ngi muŋ. Wurzlaŋhay

⁹Wurzlaŋhay mawucuɗam a muŋ na, maga muŋ kuy i nah, i gwat ngi wuya mawucuɗ a ciki Bumbulvuŋ a muŋ.

¹⁰Bumbulvuŋ Mipal a ɓi daˀ si na, wurzlaŋhay taŋ ar li taŋ ar li taŋ, ko mbur mapula li nga n’anta ndidaˀ wãˀ. Kwalay mogodonok

¹¹Pura kwalay mogodonoko keɗ keɗ na, ga sise da mbur migi naŋ. a wucuɗ kuyu gwat ta.

¹²A ka dodor mawucuɗ ɓaˀ ɓaˀ gudurak, i haŋ ngi Buymisemuŋ Mimadiɗa mumurɗoŋ.

¹³Buymisemuŋ miɓi le daˀ si na, slaslalay a pawa, a pulo wucuɗ ngi vuŋ masa sla kiita naŋ kutumo si.

¹⁴Vurˀe, mi ngi yamay a wunam biɗiŋ biɗiŋ, gazlavay a ru sikikiki a muŋ, kaɓa ɗiyuw maslikiɗi.

¹⁵Gidaŋ ngi Buymisemuŋ a tuso gazlavaya, joˀ a po slaslalay kurtototo.

¹⁷ˀAy naŋ misi ka tuwuy ngi vuŋ tuwa, a jijika ruwuyo ngbir ngbir, Muŋwahay mupuraka Buymisemuŋ le keɗ na, a jijikam deŋ. Da a wuɗ le na, a go himiɗ vir vir tir vay ruwuyo waɗ burkataŋ tir vay muŋ ati musure. A po slaslalaya kweɗek kweɗek, kaɓa ɗiyuwoy mapam sar, a po finiˀ finiˀ kaɓa ja ray a ruwuy.

¹⁸Naŋ babara kuy teˀ, ndir hiri ngal ngal, da slaslalay a ra po na, a ciruw hiri teˀ.

¹⁹A susuyum a ruwuyo kaɓa mandaŋ a dirba nah, a ji yoŋ yoŋ kaɓa hadaw.

²⁰Himiɗ miyaɓyaɓa, a so tir vay muŋ, yam a ji, a tiri slaslalay a hirnga yama. Slaslalay a gi a hirnga yamay gar, joˀ a sirta taŋ ngbulum ngbulum kaɓa libiti.

²¹A zluma muwãhaya, a wura li mikiɗak kirɗakaya, a zuma gwat motokozohoyo kaɓa vu.

²²Gwat tayna gar na, mulbuɗ a so ti slalak naŋ kutumo si, wulngar magi a dirba pas muŋcoˀŋcoˀ na, a so ti mumul.

²³Buymisemuŋ mutoho ɓi naŋ toh toh na, a tika ˀay le da vigiɗ mijileŋ jileŋheye, a puso maturahay ɗingir ɗingir ar taŋ.

²⁴Muzuɓa mulak ti palalam ngi yamaya, a ra ɓam ɓi ngi mendere, ɓi naŋ a ra zuma ndra hirnga.

²⁵Gwat Buymisemuŋ miga taŋ mipal kine ada adiga, taŋ kuy haɗi, gwat misãmihey ti sukwi wal wal gar waɗ sukwi ngi gwat madiɗa ngisi yamay.

²⁶Mislin naŋ maslin di gar na, a ru kasl kasl, mingiɓbi naŋ maɓa, a ɗiya gwat gar.

²⁷Da i wuɗam le na, i ɓam ɓihey haɗi amma n’anta kiɗ mi tay le ta. i sa kiɗaka mi naŋ na: Gwat gar naŋ asi haŋ Buymisemuŋ.

²⁸I sa lumoko gidaŋ ngi hunum naŋ ama ska? asi naŋ madiɗa, a funa gwat naŋ miga taŋ na le gar.

²⁹Bumbulvuŋ a gi zluwun da mbur, naŋ madiɗa haɗi wãˀ, gidaŋ nga naŋ i gidaŋ mezle miwãˀ.

³⁰Ɓa ki sa hunumaka Bumbulvuŋ na, gakaŋ ɗongor hã ki giram, amma naŋ a sa ndir i madiɗa, fineˀ kum maɓaka vuna ma. Da ki ra gakaŋ ɗongor na, gakaŋ di mbar vu wãˀ, da ki pulaka vu le yoɓohho na, naɓa kum anta sa gakaŋ di hã tay mi naŋ gu ta.

³¹Mupura Buymisemuŋ daˀ i wa, ɓa a slufa naŋ gu, kahana kahanaka? Mahunumaŋ gu ɓa a ndil seŋseŋ kasl a mevel naŋ i waka?

³²Ndra mapuram na, i cah ngi slra naŋhay tewle, gwatay ada haɗi, madiɗahay fineˀ ndra mapuraka taŋ vuna ma.

³³Na zle, miga gwat gar i Bumbulvuŋ yo mizli misipi jiviɗ naŋhay gisiŋ gisiŋ, a vula taŋ sin mijileŋ le.