Read South Giziga Sir 44 Bible Online

Sir 44 - South Giziga bible

Sir 44

¹Wurenna, i sa ngilam wuy ti mizli madiɗahay, dideˀ ndrahaya, vur mijingaˀ vur mijingaˀ.

²Bumbulvuŋ a buga taŋ dudok naŋ le haɗi, a ga taŋ ɗongor le ngi sete. Mizli madiɗa misi zleˀehey

³Mizli a waka dide ndrahaya le daˀ ar zumabuy taŋ, slimiɗ taŋ a zil kaˀ, asi taŋ gidaŋ haɗa, mukuta vuhoy ada, asi taŋ ti lesl haɗi, minjika ɓi ngi Buymisemuŋhoy ada.

⁴Buyoy ada, asi taŋ misinaka vula kuti da mizli, lesl ngi dubuna sina ɓi ngi mizli ada avi taŋ, yo taŋ ti sin mijileŋ ngi dubuna gwat da mizli.

⁵A boko ti dimis nawayahay ngi zli ti ˀay purla, a tohom mingiɓi maɓaka ti kucuwuloy.

⁶Mizli misi zlilihey, misi zlili taŋ muvula taŋ gidaŋ le, a roko zuy zuy a hay taŋhay, ada asi taŋ.

⁷Mizli tayna gar na, mendele taŋhay a gaka taŋ dudok le, yo ti taŋ misi zleˀe ti siifa na, a hunumaka taŋ le.

⁸Slimiɗ ngi mekelemey a ra zil a dirba taŋ, hã a ra hunumaka taŋ aruŋ.

⁹Mekelemey kwana, gwat ɓa a sa sinaka taŋ avaŋ tumbuŋ na, anta, a susuymom leɗeɗ kaɓa a yaka taŋ zleˀe ta, taŋ kaɓa t’anta zleˀe ta, ziri taŋhay a dirba taŋ kwana kine ma. Dideˀ ngi Israyeley

¹⁰Amma mizli migam mezleheye t’ani, gwat mezlehey taŋ migaka taŋ na, mizli a puyukom taŋ hirnga ta.

¹¹Gwat ngi gi taŋ mezle na, a tuwuɗ le ng’avi dideˀ taŋhay, gwat ngi zuma hay taŋhaya, ziri taŋhay a zumaka le.

¹²Dideˀ taŋhay a sipaka ɓi ngi jumoˀaya le, ziri taŋhay mindiram ti siifa na aseˀeŋ.

¹³Dideˀ taŋhay a sa ndiram ngi sete, yo dudok taŋ anta sa kiɗ ta ndidaˀ wãˀ.

¹⁴A dikaka vagay taŋhaya ti zuy zuy, yo slimiɗ taŋhay a zilam ngi sete.

¹⁵Sukwi ngi mizli a sa kiɗaka slir ngi sin taŋ mijileŋ na, joˀ a sa tilam mi ti hunum taŋ ar kus madiɗaŋ. Henok

¹⁶Henok a cira hiri le da Bumbulvuŋ, dar a zuɓa ng’avaŋ. Mizli masa yaka taŋ nga mbuŋ na, a buga taŋ mbiɗa hiri ng’avi Buymisemuŋ. Nowe

¹⁷Buymisemuŋ a pura na, Nowe i mbur mikaslsla, mijeŋŋe, ti Buymisemuŋ muzuɓ himaˀ, a susuyumo gwatay na, i Nowe muɗuva virzi ngi duniya hirik amuŋ. Ti mekepel mingizla duniya leɗeɗ na, mizli mindiram ti siiffa a ruwuyo, mbele naŋ.

¹⁸Buymisemuŋ a jum ay ati naŋ ngi sete, ɓa ko gwat misi titiri loŋ masa zizi ti mekepel anta mata. Abraham

¹⁹Abraham i mbur madiɗaŋ, i dideˀ ngi sukwi ngi mizli kweslekwesle, ko mbur ngi wa dudok nga naŋ ati n’anta.

²⁰A ja ɓimujuwa ngi Buymisemuŋ Mimadiɗa le a hirnga, joˀ a jumomˀay ati naŋ. A buga jumoˀaya le avu dum vu naŋ, yo Buymisemuŋ mici a kwacay naŋ na, a luma naŋ teŋteŋ.

²¹Vurˀe, Buymisemuŋ a ɓaŋ di daˀ le ti hudum, sukwi ngi mizli, a sa lumam ɗuwula mi tisi dideˀ naŋhay, a sa sikaŋ kaɓa mereɓ a ruwuy, a sa cifa dideˀ naŋhay seŋseŋ a muŋ kaɓa wurzlaŋhay, yo ruwuy vay nga taŋ a sa ndih zle a mi mubuliy hã seŋseŋ a mi mubuliy mekelem, zle a mi mizaw madiɗaŋ hã seŋseŋ asi diˀisi. Izak

²²Buymisemuŋ a vula gwat misi purla da Izaka, tisi cine naŋ Abraham tuwa. Zakop Ɗuwula mi ngi mizli gar waɗ jumoˀaya,

²³a pula taŋ asi haŋ ngi Zakop. Buymisemuŋ a ɗuwulaŋ mi gisiŋ, a vulaŋ ruwuy taˀ ɓa a zumaŋ, a sla mbirzlaŋ mbirzlaŋ, a wunuka da sukwi Israyeley mukuruˀ nga cuwoyo.