Read South Giziga Sir 45 Bible Online

Sir 45 - South Giziga bible

Sir 45

¹Buymisemuŋ a wuɗ Moyise le, mizli kwana a wuɗam le ma, da a ra wulkam a ra na, sey ti gi sise da Buymisemuŋ.

²A vulaŋ dudok misi purla ati ngi modro naŋhay, a tiri di mbur madiɗa ngi ga zluwun da mesene ngi Israyeley.

³Da Moyis mitil mi le ti ɓi ngi cekene na, Buymisemuŋ a ga kutumo si, a tiri di mbur mududok a mbuŋ buyoy, a vula ɓimuɗuvahay da mizli naŋhaya, asi haŋ naŋ, joˀ a bugaŋ gwat ngir dudok naŋ gizit.

⁴A vulaŋ slra asi naŋ teŋteŋ, yo i mbur miteˀteˀe, a muɗaŋ ceɗ awuzla mizli titirahay gar.

⁵A ga ɓa Moyis a cina ˀay nga naŋ, a caŋ ar musure ngi gazlavay. A vulaŋ ɓimuɗuvahaya, hiri taˀ taˀ, i ɓimujuwa mavul siifa ati lesle, ɓa a dubuna jumoˀay da Zakopo waɗ ɓimicicahay da Israyele. Aroŋ

⁶Buymisemuŋ a tiri ti Aroŋ mbur madiɗaŋ, i mbur mipal kaɓa Moyis, sukum naŋ ngir sukwi ngi Levi vuna ma.

⁷A cifaŋ ti jumoˀay mimbak le ta, a vulaŋ slra ngi gi mikuli ngi mizli naŋhay, a vulaŋ cira hiri ti gwat ngi wuyahay, a kaŋ jibe hirnga silmir.

⁸A ɗiyaŋ gwat ngi wuya mezlehey ɗiyeˀ ɗiyeˀ denjek, a tuwuɗaŋ hirnga ti lopon mabigi gidaŋ naŋ, zana ngi gabaga mislirkeɗ tisi zanahaya, zana misilmir waɗ jampa.

⁹A guno ti gwat ka yi ngi hunduruk, waɗ motonduloŋ memeɗe ngi ɓiri hirngahay, gunno donjok, Aroŋ mira ɗuva sar gar na, a hurumom kuŋyoh, kuŋyoh, a hurum kahana ar hay Bumbulvuŋ, ɓa a buga da mizli naŋhaya, Buymisemuŋ n’ada.

¹⁰Aroŋ naŋ ti zana ngi mezegwel, mija ti ɓiri hirnga, gabaga muwit wit waɗ gabaga gagaza, i misina gwatay miɗiyaka taŋ, waɗ jiiba law a didaka, ti Urim ati Tumim a ra.

¹¹Gabaga mindezze, i misina gwatay miɗiyaka taŋ, a gakaŋ wuya ti ɗugur mupuɗaw puɗaway, miciɗa ceɗ ceɗ kaɓa gwat ngi ɗuva haŋ ar ɗerewol, gwat mutoho nguɗ nguɗ avaŋ ngi wulka sukwi Israyel mukuru nga cuwo, a ɗiyaka li ji haŋ naŋ ti ɓiri hirnga, i misina ciɗa ɗuguroy miciɗaka taŋ.

¹²Lopol ngi ɓiri hirnga kulaˀ a hirnga mutuwuɗa tuwa, gwat mutoho nguɗ nguɗ avaŋ, a ɓi: «I muvula le da Bumbulvuŋ». I gwat mabigi ɗuva hirnga, gwat mezle miɗiya ti jiviɗ naŋ, gwat ngi pur ngrimme, a gakaŋ wuya le kuy kuy decek.

¹³Dumbuŋ angi Aroŋ na, ko a puram zana mezle kanah daˀ ta, ko mbur lambaˀ aka ta, sey ziri ngi Aroŋhoy ati dideˀ taŋhay makaka hã ngi sete.

¹⁴Mikuli naŋ maga ngi caˀ, is cuw ar hiipas gar na, a zluma taŋ zlam zlam wãˀa.

¹⁵Micaŋ ar slra i Moyis, a paŋ mal dili ngi mezegwel a hirnga. A gi le avi Aroŋ ati dideˀ naŋhaya, i jumoˀay ngi sete, sey da duniya mitiki le. A gakaŋ mikuli waɗ mezegwel ngi dilik a mbuŋ naŋ, yo a ɗuwulaka mi da mizli naŋhaya ti slimiɗ naŋ.

¹⁶Bumbulvuŋ a wuna Aroŋ awuzla mizli misi ti siifahay gar, ɓa a gaŋ mikuli mizlam zlam, a zlumaŋ mukuturɓuy waɗ urdi ngi wulukaŋ keŋ, yo ɓa a ga mezegwel ngi pula mungra ngi mizli.

¹⁷Buymisemuŋ a vula gidaŋ da Aroŋ ɓa a ɓa pulaˀ avra ngi ɓimuɗuva naŋhaya, ɓa a dubuna gwat ngi wuɗ cummo da Zakopo, yo ɓa a ga li njahha da Israyele ti ɓimujuwa naŋhay.

¹⁸A wuzla ɓuh mikirɗak kirɗaka, mizli mulakay a gam di suloŋ, a slikiɗam puyoˀ ng’ar Aroŋ, ti mevel fõh fõh. I ti Dataŋ ati Abiram waɗ mizli Korehey ndac.

¹⁹Bumbulvuŋ mupura taŋ na, a gaŋ kuyta wãˀ, joˀ a ngizla taŋ kuɗup ti himaˀ fõh fõh, a gi gwat migi daˀ ta ar taŋ, a zlizlira taŋ kap ti vu naŋ mubulaŋ.

²⁰A vula dudok da Aroŋ ava ma ni, a vulaŋ hirwuy taˀ, a vulaŋ micikiɗeffe ngi yi ngi gwatay ɓa a wunukakaŋ, yo a vulaŋ gwat ngi zumo hã a mbi ma.

²¹Asi gwat ngi zum ngi mijiviɗheye, i gwat taŋ magam di mikuli da Bumbulvuŋ vuna si, a vula le da Aroŋ ati ziri naŋhaya.

²²Na ma na, hirwuy nga naŋ anta wuzla ngi Israyeleye ta, yo gwat mi nga n’anta awuzla taŋ ta ma, asi ya Buymisemuŋ na, gwat mi ngi ɗik ati ruwuy ɗike, i ya vuna si. Pinas

²³Pinas mangal ngi Elazara, mbur mimakir naŋ misi ti dudoko, i naŋ, asi a cici le kaŋ kaŋ ngi zluwun ti Bumbulvuŋ, yo ti mizli naŋhay miŋhihiyam na, a cici le gidaŋ gidaŋ, a tum vu le ti mevel purla, joˀ Buymisemuŋ a pula malambaˀ ngi Israyeley mbele naŋ.

²⁴Vurˀe, Buymisemuŋ a jumˀay ati naŋ ɓa a lumam zuy, a cifaŋ i buy ngi hay naŋ ati ngi mizli naŋhay, ɓa slra ngi masay madiɗa a ndir da naŋ ati dideˀ naŋhay hã ngi sete.

²⁵Buymisemuŋ a jumˀay le ati Davit, mangal ngi Jese, ngir sukwi Zuda ma, a ɓaŋ: ‹Cine a pula zuma buyo da mangal naŋ, na mangal purla si ɓula.› Amma ngi Aroŋ, naŋ vur dideˀ naŋhay gar.

²⁶Anja Bumbulvuŋ a vulukum sin mijileŋ a mevele, ɓa ki gaka kiita da mizli naŋhaya kasl kasl, ɓa sukwi kum a kiɗ ta, yo ɓa dudok taŋ masa ndir da dideˀ taŋhay na, a zizi ta ma.