Read South Giziga Sir 46 Bible Online

Sir 46 - South Giziga bible

Sir 46

¹Zozuwe ati Kalep Zozuwe mangal ngi Nuno, i gambara ngi vurum. I naŋ mici ar li ngi Moyise, ngi gi slra ngi mijiviɗe, slimiɗ naŋ a jam haŋ le kasl ati slra nah, asi a tiri mbur madiɗa le, ngi laha mizli muwuna ngi Bumbulvuŋhoy. A tika ˀay le da mesenehey mislikiɗam nga zlira dibiɗ ati naŋ, joˀ a wuɗuka ruwuyo da Israyeleye.

²Naŋ muzuɓa haŋ le, a ra duduɓa maslalam ng’ar walahay ngi mizli na, kay, naŋ ti dudok haɗi!

³A juwa ɓi le, a mbiɗa ta na, miga daˀ dumbuŋ a ra i waka? Naŋ kine, maga vurum ngi Bumbulvuŋ i naŋ.

⁴Micica pasa deŋ, a kirih ta na, i naŋ vuna takwa? Ŋha hiipas purla, a tiri hiipas hiipas makaw cuw.

⁵Da mesene naŋhay a ndaham le a hirnga naŋ tika tika gar na, a zila Buymisemuŋ Mimadiɗa, Buy ngi gidaŋ wãˀa, dar Bumbulvuŋ Mimadiɗa a cinaŋ di, joˀ a hiziga taŋ tik tik, ti slaslalay, ti gidaŋ misi ɓi naŋ a ɓi ta.

⁶Zozuwe a ɗuv dibiɗ taˀ ng’ar mesenetaŋhaya, a ngizla mizli mazliram ti taŋ tahay ar muzugudum ngi Bet-Horoŋ. A gakanah, ɓa sukwi ngi mizli a sinaka gwat ngi vurumoy Zozuwe misi ti naŋ, asi taŋ magam na, i vurum ati Bumbulvuŋ, asi a ra ru ɓaˀ asi Buy misi gidaŋ wãˀa.

⁷Zle ti hin ngi Moyis kwana, a gi teŋteŋ le, waɗ Kalep mangal ngi Yefune ma: a cicam le kaŋ kaŋ ar kus madiɗa, a tikaka mizli ɓa a gam mungra ta, a tikaka dirɗa vu malambaˀ na le ma.

⁸Yo ma na, i taŋ cuw taŋ milaham awuzla soje misi sa ray mudurmuk merkeɗe, ɓa ngi ci ti mizli nga ruwuy muvulaka taŋ di, ruwuy misi ɗuwa ati mam a ra ɓulom.

⁹joˀ Bumbulvuŋ a vula wirwir da Kalepe, a ndir ti wirwir naŋ, hã avi midigila naŋ, Buymisemuŋ a ga ɓa a tuɓa ruwuy vay muwãhaya, dar dideˀ naŋhay a gam di ruwuy nga taŋ.

¹⁰Mizli Israyeley a sinaka sipa Bumbulvuŋ naŋ kuy na vurˀe. Migi kiitahay

¹¹Migi kiitahay kwana, mbur gar avi slimiɗ naŋ mazil mazil, mizli gar misi mevel taŋ a mbiɗi ng’avu kulihey ta, yo a mbiɗam duba avi Bumbulvuŋ ta na, anja i wulkam ar taŋ, i gaka taŋ sise!

¹²Da ko tesl taŋhay a roko ar vigiɗ tekeɗe kwana, anja mizli mekelemey a slam ar li taŋ, ɓa slimiɗ ngi mizli mupuɗaw tayna, a zilam tisi ziri taŋhay! Samuyel

¹³Samuyele, Bumbulvuŋ naŋ, a ra wuɗaŋ, i mijiviɗ ngi Bumbulvuŋ, a ɗuv zumabuy taˀa, a ci buyoy awuzla mizli naŋhaya, a kuro taŋ mal ngi vula slra.

¹⁴A ga kiita da mizli ti ɓimujuwa ngi Bumbulvuŋ, joˀ Bumbulvuŋ a jiniˀis tisi ziri ngi Zakopoy.

¹⁵Naŋ miteŋteŋ tuwa na, a buga le njah, naŋ i mijiviɗ mikaslsla ngi Bumbulvuŋ, ar mingiɓi naŋ na, a sinaka le i mbur misi kleŋ migisiŋ naŋ.

¹⁶Da mesene naŋhay mindahakaŋ le tika tika gar na, a zila Bumbulvuŋ Buy misi gidaŋ wãˀa, a gaŋ mikuli ti zuŋ tumuŋ masi ɗuwa ruŋ.

¹⁷Akẽh na, Bumbulvuŋ a tuwuy ka vuŋ a muŋ, a hurum ti gidaŋ, joˀ ˀay naŋ a cinawa.

¹⁸A ngizla buy ngi ruwuy Tireye kap wãˀ, waɗ buy ngi Filistiheye ma.

¹⁹Ɓa Samiyel a sa pula duniya tikeˀe na, a ga sedewo naŋ a mbuŋ Bumbulvuŋ ati buyo, a ɓi: «Ko i tiɓi zlili ngi mbur daˀ ta, ko ta rak tekeɗe, i tiɓi ta.» ko mbur mulum ɓi ngi mbiɗaŋ hirnga, anta.

²⁰A dirba naŋ mupula duniya na kwana, a ra njik ɓi ngi Bumbulvuŋ na si, joˀ a ɓa ɓi ngi buy masa tiki. A tilo mi zle a hur zivi, a njik ɓi ngi puya mungra ngi mizli.