Read South Giziga Sir 47 Bible Online

Sir 47 - South Giziga bible

Sir 47

¹Mijiviɗ Nataŋ ati buy Davit A dirba Samiyele, i Nataŋ micifi mijiviɗ hirak ti Davit mazum buyo

²A gwahaka Davite gwah pal awuzla Israyeleye kaɓa mahuroko mungul ngi hur kwacay gwat magam di mikuli ngi nguɓaˀay.

³a gi dungur ti moboro kaɓa zuŋ ˀaw, yo a gi ti luˀufo, kaɓa zuŋ tumuŋ.

⁴Ti naŋ misi ti zuŋ aruŋ na, a kiɗ mbur suburo le, a ɓula mesem ngi Israyele le. Ti naŋ mukucuwura vẽvẽluh ti ɗugur a ra na, a kiɗa Goliyat ma huhum vu na le vagay takwa?

⁵Naŋ kine, Davit a zila Bumbulvuŋ Buymisemuŋ Mimadiɗa le, joˀ Buymisemuŋ a vulaŋ gidaŋ da haŋ naŋ vay hazumo, ɓa ngi kiɗa Goliyat midiɗa gulumo, ɓa sukwi naŋ a lum gidaŋ.

⁶Vurˀe, a gakaŋ dudok, a ɓakaŋ: a kiɗ mesene naŋhay le durmuk kuruˀ, a hunumakaŋ le ar li gi sise da Bumbulvuŋ, a tuwuɗakaŋ lopon hirnga.

⁷Asi a ngizla mesene ngi ciki taŋhaya le pay, a susuyumo filistihey mazliram ti taŋ ta na le, hã dana, gidaŋ taŋ anta mata.

⁸Angi gwat ngi gi naŋ gar na, a hunuma Buymisemuŋ Mipal Buymisemuŋ Mimadiɗa, ti mingiɓi ngi ngi vula dudoko, a zli dimisey ti mevel purla ngi hunuma Buymisemuŋ, yo a wuɗ mbur migi naŋ.

⁹A pi mizli dimisey sek a mbuŋ li gi mikuli, joˀ a zlaka dimis mezlehey adiga ti gidaŋ.

¹⁰A ga ɓa muguzlumoy a gam kuy haɗa, a ɗiya taŋ ti jiviɗ naŋ ti jiviɗ naŋ, a wuɗ ɓa a hunumaka Bumbulvuŋ mipala ti zila slimiɗ naŋ, ɓa a cinam gwat ngi dunguroy ar hay ngi Bumbulvuŋ zle ti li biŋ biŋ.

¹¹Bumbulvuŋ a pula mungra ngi Daviteye le a sikaŋ gidaŋ naŋ hã ngi sete, a jumomˀay le ar zuma buyo, yo ar Israyele, a cifaŋ ar janga misi ti dudok. Salomoŋ

¹²A dirba Davite, i mangal naŋ misi sin muzuɓa li naŋ, Buymisemuŋ a cifaŋ setete tisi Daviti.

¹³Ar vi ngi Salomoŋ mazum buy na, li setette, Buymisemuŋ a ga ɓa taŋ ati midigwi naŋhay zuy zuy, ɓa Salomoŋ a ndira hay da Buymisemuŋ, yo a ɗiyaŋ mihĩˀĩ ngi sete.

¹⁴Kayya Salomoŋ! Ka zleˀe ti sin mijileŋ haɗi ti gawla ɗike, lesl avi ka haɗi kaɓa yam mifin fin a mizaw!

¹⁵Sin ɗike a tisla ruwuyo le kurzluˀ, ki naha li le ti ɓi ti mikucuwul ati ɓi mumbuza,

¹⁶Slimiɗ ɗik a ndil le seŋseŋ ar matura mikileŋ kileŋhey, yo mizli a wuɗukuw le asi ki mbur leleŋ.

¹⁷Duniya kurzluˀ gar, a ra ŋhiya dimis ɗikey, mikucuwul ati pulaˀavra ngi ɓi ka maɓa na.

¹⁸Ti slimiɗ ngi Bumbulvuŋ Buymisemuŋ, ti slimiɗ ngi Mbur mazilaka Buymisemuŋ ngi Israyel na, ki cikila ɓiri hirnga zikitiŋ kaɓa i ndifri, yo kicikila ɓiri bara zikitiŋ kaɓa i ɓiri misi ti zeweɗ ava ngi wi dalam cir cir zilaka ti mi franse plom.

¹⁹Amma ka ki vula vu ɗik da ngwasay, joˀ ki tiri beke taŋ.

²⁰Ka migakanah na, ki nduvuɗa dili le da vu ɗike, ki luma hiryi le da sukwi ɗike, ki slikiɗa huma ngi Buymisemuŋ ng’ar ziri ɗikeye, joˀ a wulkaka gilaw ɗik ka miga na.

²¹A ciraka zuma buy ɗike kpah wuzla cuw, joˀ buy mislikiɗa ɓi a sli awuzla Efrayimeye.

²²Amma Bumbulvuŋ a puyuk hirnga ti ircece naŋ ta, ko a pul mingiɓi naŋ a zizi loŋ ta, a pula dideˀ ngi mbur naŋ muwuna, a susuyumom ta, yo mbur muwuɗaŋ zleˀe na, a ngizla sukwi naŋ ta. Naŋ kine, mizli a ndiram le ti siifa ar sukwi ngi Zokopo, naŋ kanah ya, a vula muzuma hayay le da Davite, i naŋ vuna miya taŋ. Roboˀam

²³A dirba nah, Salomoŋ a mucu, a pul mbur mubo ti vaˀa le a dirba, i mibi hirnga mufuna mizli gar, lesl neˀ avaŋ anta. I Roboˀam, a skiɗa mevel le da mizli ti ɓi naŋ mujuwa ngi gi. Zeroboˀam mangal ngi Nebata, a ci ti Israyeleye le ar mungra, yo a buga jiviɗ ngi gi mungra le da Efrayimeye.

²⁴Akẽh na, a gam mungra le haɗa muduba, hã a ɓulaka taŋ ti ruwuy taŋ avra.

²⁵A pulaka vu taŋ mbak da gwat malammbaˀhay haɗi, hã Buymisemuŋ a kuta taŋ ti bonoy.