Read South Giziga Sir 48 Bible Online

Sir 48 - South Giziga bible

Sir 48

¹Eli Akẽh na, mijiviɗ Eli a bo ya, naŋ ka vu, mingiɓi naŋ a wur vu ka daliivu.

²A so ti may a ruwuy Israyele, naŋ miwirwir vur Buymisemuŋ tuwa na, a ngizla mizli, a sa ndiram njiraˀkini.

³Bumbulvuŋ a pulaŋ jiviɗ, a tika vuŋ, yo a po sar ti vu baɗ ti muŋ is makire ma.

⁴Kayya Eli! Ki lum dudok le haɗi, ti gwat migam daˀ tahay ka miga taŋ na! Mbur mibam vu ati ka, ɓa a jijih na, i waka?

⁵Ki bo ti mbur mumuca le tir vigiɗe, ki tuɓo di le tir li ngi mizli mumucahaya, ti mingiɓi ngi Buymisemuŋ Mimadiɗa.

⁶Ka, ki pahaŋ le da buy madiɗahaya ng’ar mucu, yo ki ru ti mizli madiɗahay mutup tup ti jiji, hã seŋseŋ ar mucu.

⁷Ka, Buymisemuŋ a mbuɗuw hirnga le a muwã Sinaya, yo a guw kiita ngi kuti ti bonoy le a muwã Horepe.

⁸Ka, ki ci buyoy le ngi sa ci ar li ngi mizli mekelemey, yo ki ci mijiviɗey le ngi sa ci ar li ɗiki.

⁹Ka, musure ngi vu a kil ti ka le, ka joˀ ar mota ngi vurum, ar deɗe ngi pilise, i vu maɗiɗaŋ.

¹⁰Ka, ki muwuna, i mutoho le ar Ɓimutoho, i ka masa tisla mevel da Buymisemuŋ daf dumbuŋ, vur naŋ masa vunoho himaˀ ng’ar mizli, i ka masa jumoˀay ngi cine ati mangala, joˀ ki mo ti sukwi ngi Zokopoyo ng’ar li taŋ muŋ.

¹¹Mizli mupurukuw, mumucam ti wuɗa Buymisemuŋ na, a mumulom! Na ndra vuna kwana, i sa nditram ti siifa gisiŋ ya. Elize

¹²A dirba musure ngi vu mikil ti Eli tuwa na, ˀUf misi zle ar Eli tuwa, a ra naha Elize ndeŋ ndeŋ. Ar siifa naŋ na, ko buy magaŋ zluwun gu anta, yo ko mbur matikaŋˀay gu anta.

¹³Gwat mutuwaˀ haɗa anta ava ta, ko naŋ mumuc le kwana, dum vu naŋ a ra njik ɓi ngi Buymisemuŋ aruŋ na si.

¹⁴Ar siifa naŋ na, a gi gwat migam daˀ tahay le, a dirba naŋ mumuc le kwana, a gi gwat ngi zuma hirngahay le.

¹⁵Gar ti nah kwana, ko mizli a mbuɗam mevel ta na si, ko a pulaka gi mungra taŋ ta, hã a jaka taŋ ti ruwuy taŋ nga ruwuy mulak, a zliɗam hirnga mber mber ngasi ruwuy gar. I mizli neˀkini mindiram, waɗ buy purla ng’ir sukwi Davit tewle.

¹⁶Buy Zudahay cah, a gam gwat ngi cira hiri da Buymisemuŋ, amma mekelemeye, a gam mungra ti vendeke jak. Buy Ezekiyas ati mijjiviɗ Ezayi

¹⁷Buy Ezekiyas a guno walahay naŋ berne ti mohol, a ɗiya jiviɗ ngi yama, a ra bi seŋseŋ ar walahay. A li mandazlay muwã ti ɓiri, a tiri taŋ futuŋ ngi yamay.

¹⁸Ti Ezekiyas mazum buy na, Senakerip a jigin mi avaŋ, a slino Raɓsakes, Raɓsakes a ru, a zla walahay Siyoŋ ngi kiɗa vu, naŋ mahuhum tuwa na, a hiris vu.

¹⁹Akẽh na, mizli Zeruzalemey a jijikam ti haŋhaya gar, joˀ vu gar a ja taŋ kaɓa kwacay maja ngwas ngi yi.

²⁰A zilaka Bumbulvuŋ Mupura ircece, haŋ paˀ paˀ ng’avaŋ, dar Buymisemuŋ mipal , a tuɓa taŋ di kutumo si, a laha taŋ tisi Ezayi.

²¹Buymisemuŋ a kiɗa Asirihey ar li pi sar taŋ, joˀ modro naŋ a ngizla taŋ kuɗup

²²Asi Ezekiyas a gi di i gwat Bumbulvuŋ mawuɗu, a cici kaŋ kaŋ ngi sipa jiviɗe, i jiviɗ mijiviɗ Ezayi miɓa daˀ le da cine naŋ Davite, Ezayi i mijiviɗ madiɗaŋ, migisiŋ gisiŋ ar pur ti kleŋ.

²³Ti di nah na, mijiviɗ Ezayi, a ma pasa nga duba nga dirba, ɓa buy a zik haɗi.

²⁴A pura kiɗa mi ngi duniya le gizit, mbele gidaŋ ngi ˀUfu, joˀ a tikina mizli masam bonoy a Siyoŋ ɓa a taˀaka tuwuyo.

²⁵A til mi ti gwat masa gi tumbuŋ hã seŋseŋ avi kiɗa mi ngi duniya, waɗ gwat muɗum ɗumoyo, a til taŋ mi daf dumbuŋ angi taŋ masa gama.