Read South Giziga Sir 49 Bible Online

Sir 49 - South Giziga bible

Sir 49

¹Zoziyas Wuluk angi Zoziyas na, i wuluk milahaɗ lahaɗa, kaɓa urdi midi naŋhay milahaɗaka le. Zila slimiɗ ngi Zoziyas na, avi mi ngi mbur gar, naŋ ndum ka mam, kaɓa gwat ngi dunguroy mahurmom ar muguzlum ngi zuma ɗaf madiɗa jom ti mbaazla.

²A sipa jiviɗe le kuy kuy, a mbiɗa mevel ngi mizli le, yo a susuyumo dilik a mbuŋ kuliheye le ma.

³A mbiɗi hiri le ng’avu Bumbulvuŋ ti mevel purla, ar hin mazirɗaka mi ngi ɓimujuwa na, a cica ɓi ngi pura ircece jãwjãw. Buy ngi dirba wãˀ ngi zudehey, yo mijiviɗ Zeremi.

⁴Buyoy gar a gam mungra le haɗi, a pulaka Ɓimujuwa ngi Mifineˀ Ga ra le. sey Davit, Ezekiyas waɗ Zoziyas tewle migam ta. Slimiɗ ngi buy Zudehey mususuyum ar slufa ɓi

⁵Buymisemuŋ a vula gidaŋ taŋ da mizli mekelemey, yo a vula dudok taŋ da sukwi mulakay.

⁶Mesenehey a sa ɗuvaka vu da walahay misi hay ngi Buymisemuŋ a ra, hay naŋ muwunaŋ, dar cikiviɗ naŋhay a tiram ɓuh, kaɓa Ziremi mitil di mi tuwa.

⁷Asi mizli tayna, a gaka bonoy da Zeremi haɗi. Na Buymisemuŋ a vula slra ngi mijiviɗ da Zeremi diga naŋ misi a kwacay mumuŋ, ɓa a muɗa gwataya ti dimbasla, a waha gwataya, yo a ziza taŋ, amma ɓa a ndira gwata, yo a hirva gwata ma. Ezekiyel

⁸Ezekiyel i mbur mupura gwat misi ti dudok ti kleŋ na, Buymisemuŋ a bugaŋ di ar mota ngi vurum ngi kerubeŋhey.

⁹Buymisemuŋ a wuluk le keŋ ar mesene naŋhay misi asi vuŋ madiɗa na, ɓa a ga mezle da mizli masipaka jiviɗ naŋ kasl kasla. Mijiviɗ mukuruˀ nga cuwoy

¹⁰Vur ɓi ngi mijviɗey mukuruˀ nga cuw na, ko da tesl taŋhay a roko ar zivi aruŋ tekeɗe kwana, anja Buymisemuŋ a ga ɓa mizli mekelemey a slam ar li taŋ. Asi mijiviɗ tayna, a vulaka gidaŋ le da Zakopo, a lahakaŋ le, asi a roko ti wuluk taŋ taˀ ndrehhe angi Buymisemuŋ. Zorobabel ati Yesuwa

¹¹I hunumaka Zorobabele mbri mbrike? Naŋ kaɓa gwat ngi ɗuva haŋ ar ɗerewol, a ro kaw asi haŋ hazum ngi Buymisemuŋ.

¹²Vur Yesuwa mangal ngi Yosadaka, i misi purla. Hirak ar vi taŋ na, a ndiraka hay le da Bumbulvuŋ, yo a ndiram viŋ le da Bumbulvuŋ, hĩˀĩ ngi gaŋ dudok a ra ngi sete. Nehemi

¹³Gwat Nehemi miga taŋ ngi wuluk ar taŋ na ya kwana, taŋ haɗi, mohol maguno walahay ndra, naŋ mimbizli na, mislikiɗa i naŋ, mica miviŋhey ati gwat ngi kilik taŋhay gar i naŋ, yo i naŋ mislikiɗa ndra hay ndra ngi hineye ma. Mizli madiɗa mudumbuŋhoy

¹⁴Asi gwatay Bumbulvuŋ miga taŋ a ruwuy aka gar na, ko mbur ngi wi ati Henok anta. Naŋ vuna kwana, a zuɓaka le faw ti ruwuyo ya.

¹⁵Ko mbur misi ka Zozef kwana, anta ya, a cifi buy ngi sukum naŋhay le, a jaha mizli naŋhaya le jah jah. A ɗuvaka hirnga le da tesl naŋhaya kuy kuy.

¹⁶Sem ati sete, taŋ ti dudok haɗi awuzla mizli, amma misi a hirnga gwatay, Bumbulvuŋ miga taŋ gar na, i Adamu ɓula.