Read South Giziga Sir 50 Bible Online

Sir 50 - South Giziga bible

Sir 50

¹Simoŋ, masay madiɗa Simoŋ, mangal ngi Oniyasa, i masay madiɗa, ti naŋ misi ti siifa na, a ɗiya hay le da Bumbulvuŋ, yo miɗiya hay ngi Bumbulvuŋ gidaŋ gidaŋ na, i naŋ vuna.

²Miɓi ɓa a ɗuvaka virzi ngi hay misi gil naŋ nga muŋ makaw cuw, muɗuvaka a hur hay ngi Bumbulvuŋ na, i naŋ.

³Ti naŋ misi ti siifa, miɓi ɓa a lam futuŋ ngi yamay, futuŋ misi sliprik naŋ kaɓa mubuliy na, i naŋ.

⁴Wuluk nga naŋ mitaˀ na, anja mizli naŋhay a zizam ta, a guno walahaya ti mohol, vur mizli matuɓaka buyo.

⁵Ti naŋ mubo ti duba zana minjar, naŋ maguno hay Bumbulvuŋ na, kay, naŋ ti dudok haɗi!

⁶Simoŋ, naŋ kaɓa bangay ngi wuna li misi awuzla gazlavay, kaɓa kiya mitiri le ngwasa.

⁷Naŋ kaɓa pas mawucuɗa hay ngi Bumbulvuŋ Buymisemuŋ Mimadiɗa, kaɓa kwalay mogodonok maciɗik awuzla gazlavay misi ti dudok.

⁸Naŋ kaɓa mufuyuk ngi widisey ti viya, kaɓa matayay mikaˀ kaˀ a mi yam, kaɓa giziŋ mutukuzo ngi Libaŋ ti hinpas.

⁹Naŋ kaɓa mukuturɓuy mazlum ar gwat ngi zlum naŋ, kaɓa tutuŋ ngi ɓiri hirnga, migakaŋ wuya le ti ɗugur mupuɗaw puɗaway gar.

¹⁰Naŋ kaɓa tutumbur mira yi ahaŋ, kaɓa widis sipre magil cir cir nga muŋ.

¹¹Naŋ mika jibe ngi masay madiɗa le, naŋ miɗiya vu le ti gwat ngi wuya naŋhay gar, naŋ mira jiɗ ng’ar li gi mikuli da Buymisemuŋ muduba na, a naha hur hay ngi Bumbulvuŋ ndeŋ ndeŋ ti dudoko.

¹²Naŋ miro deŋ tahaŋ naŋ gweˀ a ciki li gi mikuli, a ra tuɓa mi nga taŋ tisi haŋ ngi mbur migi mikuli na, sukum naŋhay a roko kucuwuluk a hirnga naŋ kaɓa loppol, ngicik kaɓa miter ngi Libaŋhay, yom a hirnga naŋ kaɓa dum ngi babazlahay.

¹³Ziri ngi Aroŋhoy gar, ti zana taŋ ngi dudokoy, taŋ ti gwat ngi sedege da Bumbulvuŋ kaw kaw a haŋ taŋhaya, taŋ dedeŋ a mbuŋ kus madiɗa ngi Israyeleye.

¹⁴Simoŋ a ra kiɗa mi ngi gi mikuli ar li gi naŋ, a ra pa gwat ngi sedegehey da Mimadiɗa, Buy misi Gidaŋ wãˀa ng’a raŋ.

¹⁵A sika haŋ, a zuɓa sikiɗ ngi mbaazla, a po mbazla, yam ngi gudubun tuwa, a pusla si virzi ngi li gi mikuli ti naŋ. zĩˀĩ naŋ a tisla mevel da Mimadiɗa, Buy miwa si gazlavay kurzluˀo.

¹⁶Akẽh so na, ziri ngi Aroŋhoy a widam cərəwcərəw, a fam zara muvuɗa ti ɓiri, joˀ gwatay a hurumom ti gidaŋ ngi so ti wuluk keŋ ar Buymisemuŋ Mimadiɗa.

¹⁷Dar mizli gar a hurukom huruk huruk a ruwuy, gar arleˀe rip, kutumo si, joˀ a hunumaka Bumbulvuŋ Buymisemuŋ Mimadiɗa, misi Gidaŋ wãˀa.

¹⁸Yo mizli dimisey a ra hunumakaŋ ti dimis ngirzliŋŋe, a cin kuyu gwatta.

¹⁹Joˀ mizli a tumbuloko Bumbulvuŋ Buymisemuŋ Mimadiɗa, a diram dibiɗ a mbuŋ naŋ, mupura ircece, hã mezegwel ngi Bumbulvuŋ ati slra ngi Bumbulvuŋ a kiɗam mi tay wãˀ.

²⁰Akẽh so na, Simoŋ a po sar tir li gi mikuli, a hila haŋ a muŋ yom, ng’ar Israyeley mukos koso, ɓa a vula taŋ ɗuwula mi ngi Bumbulvuŋ tahaŋ naŋ, yo ɓa a lum dudok ti zila slimiɗ naŋ.

²¹Dar mizli a hurukom rip a ruwuy, sar mucuw naŋ ma ni, ɓa ngi luma ɗuwula mi ngi Buymisemuŋ Mimadiɗa. Dira dibiɗ ngi ɗuwula mi

²²Wurenna so na, gaka sise da Buymisemuŋ miwa si gazlavay kurzluˀo, naŋ a gi gwat mezlehey ɓaˀ li, i naŋ migila ndra zle a kwacay mumuŋ ndrahay, yo a gi ti ndra weˀe ti pura ircece naŋ.

²³Anja a vula ndra mumul a mevel ndrahaya, yo anja i ndiram ar siifa ndra zuy zuy, kaɓa ndra misi zlezle a ruwuy Israyel.

²⁴Anja pura ircece naŋ a ndir ngi wãˀ ar ndra, yo anja a laha ndra ar hin ngi siifa ndra gar. Sukwi ngi mizli makir, mihirsahay

²⁵Sukwi ngi mizli ada cuw, ya mahirsa taŋ, amma mimakir taŋ i sukwi ta ɓula:

²⁶I mizli misi a muwã Seyir, Filistihey waɗ mizli mibihirrngahay misi a Sikem na. Ben Sirak ati ɗerewol naŋ mutoho

²⁷Yesu mangal ngi Sirak, dideˀ meciɗek ngi Elazar ngi Zeruzaleme, dubun ngi lesl ati sina gwata, a toho le ar ɗerewol hana, sin naŋ mijileŋ misi ar mevel naŋ, a budugo di kaɓa vuŋ magi.

²⁸Mbur mamawa mbak le ta ng’ar ɓi hana na, a mumul! Mbur mawi taŋ vu a mevel naŋ na, a sa lum sin mijileŋ.

²⁹Asi da a ra gi taŋ slra na, a sa lum gidaŋ ar gwat gar, asi sipa jiviɗ nga naŋ i ngi zluwun ti Bumbulvuŋ.