Read South Giziga Sir 51 Bible Online

Sir 51 - South Giziga bible

Sir 51

¹ƁESDE NAŊ Dira dibiɗ ngi Yesu, mangal ngi Sirak Bumbulvuŋ Buy madiɗaŋ, i wuɗo guw sise, yo i hunumuw Buymisemuŋ milih ɗu, i guw sise ti zila slimiɗ ɗiki.

²Asi ki micika vu ar ya waɗ mikila widi ɗu, ki tuɓo dum vu ɗu le avi muco, ki tuɓo ya le avi kwar ngi mukupa ɓihey mingikiy di na, ki tuɓo ya le avi miji slireye. Ki tuɓo ya le avi mizli mazliram ti ya tahaya.

³Ki kilo widi ɗu le, ki lihiy le avi mizli tayna, asi ka mapur ircece haɗi, yo slimiɗ ɗik a ra zil, ki tuɓo ya le avi mizli mujuwam vu le wãˀ ngi kiɗ ɗu, ki tuɓo ya le tisi haŋ ngi mizli mawuɗam muc ɗu, ki tuɓo ya le avi bonoyoy haɗi migam avi ya.

⁴Ki tuɓo ya le ti wuzla vu mawuɗo siˀitiy na, yo ti wuzla vu misi i ya mubula ta.

⁵Ki ga le, ɓa yi loho tir li mijileŋ ngi mizli mumucahaya, ki lihiy le avi irne malambaˀ ati ɓi ngi slireye,

⁶ki tuɓo ya le tivu luvut ngi mingiɓi mikasl ta. Siifa ɗu naŋ gweˀ avi mucu, ya sar taˀ pal tir vigiɗi.

⁷Mesene ɗuwoy a ra gunikiy tika tika gar, ko mbur ngi kulo widi ɗu anta! i ra njih hiri ar mbur masa jihiy jah ma na, ko i lum ta.

⁸Dar i wuluk keŋ ar pura ircece ɗike so Bumbulvuŋ ɗu, i wuluk keŋ, ki mbur magi mezle diga zlezle hã ngi sete, mizli magiram kutuk ɗik ta na, ki ra laha taŋ, yo ki ra laha taŋ tisi haŋ ngi misi moˀoreheye.

⁹Joˀ i tuluw mi ti tumbulo zle a ruwuy aka, yi zuluw ɓa ki lihiy avu mucu.

¹⁰Yi tiluw mi: «Bumbulvuŋ, ki Cine ɗu, ar hin ngi bonoyo, ki puliy fuk ta, ya manja mijina is, awuzla muhuhumo vuhoy.

¹¹I sa hunumuw mbak le ta, i sa hunumu ti dimis ngi guw sise.» Akẽh na, ka Buymisemuŋ ki cina diradibiɗ ɗo.

¹²Ki lihiy le avi hiryi, ki tuɓo ya le avi hin ngi bonoyo. Ya mawuɗ i guw sise, i hunumuw na vurˀe, i sa ga sise da Bumbulvuŋ. Supa sin mijileŋ

¹³Ti ya misi ti gawla, i gi dakare t’aruŋ na, i sipi sin mijileŋ le njah wãˀ ar diradibiɗ ɗo.

¹⁴I dir dibiɗ le a mbuŋ hay ngi Bumbulvuŋ, ngi luma sin mijileŋ, yo i sa sipa hã muc ɗu pam.

¹⁵Tisin mijileŋ magil, naŋ manih muduba na, a tiri i mumul ngir mevel ɗu. Joˀ yi sipa jiviɗ mijeŋŋe, i zla sipa sar naŋ zle ti ya misi ti zuŋ.

¹⁶I jika slimiɗe ti jik ta si na, i luma sin mijileŋ le, yi pura avi ya na, i lum dubun mukuy kuy le.

¹⁷Ya migi haɗi na, mbele sin mijileŋ vuna, i sa ga dudok da mbur muvuliy di na.

¹⁸Asi yi juwa le a mevel ɗu ɓa i gi di slra, ya kafaˀ kafaˀ ar gi mezle, ko y’anta sa lika ta ndidaˀ.

¹⁹Yi cik vu le ngi luma sin mijileŋ, i ji lesl le kuy kuy ngi gi slra ti ɓimujuwa. I hila haŋhaya le nga muŋ, joˀ i wulka ya migi jalaɓi ti sin mijileŋ na.

²⁰I ndir ti hiri guk avi sin mijileŋ, yi ndir manja dili , joˀ i luma so. Ya muluma lum si na, i lum di lesl kutumo si, ko sin mijileŋ anta sa puliy ta ndidaˀ wãˀ.

²¹May naŋ a jiy le haɗi wãˀa, ya muluma gwat mezle na vurˀe.

²²Ar deɗe ngi migir ɗu na, Bumbulvuŋ a vuliy sina mi, joˀ i gaŋ dudok ti sin mijileŋ so.

²³Kum mizli mudubunam tahay na, soko ng’avi ya, cifam jojoˀ ɓa i dubunukum sin mijileŋ.

²⁴Ki ndiram hã ki zikam manja lum naŋ vurmike? dambalaka may naŋ a ra kuɗukum ngbaŋ.

²⁵I til di mi njah: «Soko lumam sin mijileŋ manja dala.

²⁶Caka galalaŋ naŋ asi ˀay, ɓa membezleŋ ngi vu kumoy a lumam dubun naŋ. Ki sa lumaka gweˀ a ciki kum vuna si.

²⁷Puraka ti hiri kumo, ko i sin bonoy haɗi ngi luma gwat ngi kiɗa may ɗu ta.

²⁸Tuɓaka dubun ɗu, zliɗam zlili haɗi vurˀe, naɓa ki sa lumam ɓiri hirnga haɗi ti nah ya.

²⁹Anja membezleŋ ngi vu kum a mumul asi Bumbulvuŋ a ra purukum ircece, anja mesem a gukum ngi hunuma ta.

³⁰Ɓa hin muslukum di, a sa ndilo tikeˀe na, ki gaka slra kumo le, dar a sa vulukum migir kumo ar hin naŋ jeŋŋe. Dimis B, mutoho micikiɗeffe ti haŋ a ruwuy Ker, naŋ angi 51.12 a Gaka sise da Bumbulvuŋ, asi naŋ mezleŋ, a wuɗ vu ngi sete. b Hunumaka Bumbulvuŋ ngi hunumo, asi a wuɗ vu ngi sete. c Hunumaka mijigin ngi Israyele, asi a wuɗ vu ngi sete. d Hunumaka migi duniya, asi a wuɗ vu ngi sete. e Hunumaka milaha Israyele, asi a wuɗ vu ngi sete. f hunumaka mukuso Israyeley mizliɗam hirnga, asi a wuɗ vu ngi sete. g Hunumaka mbur mindiraŋ walahay ati hay naŋ, asi a wuɗ vu ngi sete. h Hunumaka mbur mupus durum a hay Davit na, asi a wuɗ vu ngi sete. i Hunumaka mbur muwuna mangal ngi Sadok ngi gi mikuli na, asi a wuɗ vu ngi sete. j Hunumaka mbaray ngi Abrahama, asi a wuɗ vu ngi sete. k Hunumaka muwã ngi Izaka, asi a wuɗ vu ngi sete. l Hunumaka misi gidaŋ ngi Zakopo, asi a wuɗ vu ngi sete. m Hunumaka mbur(...)