Read South Giziga Sir 6 Bible Online

Sir 6 - South Giziga bible

Sir 6

¹Ki gi mesene ti ngama ɗike ta, asi da slimiɗ ɗik a ra zil ti malambaˀ na, a puw mesem, a suruw mi sor, gwat masa gi avi migi mingra maɓi tika kuy tika kuyo, i nah so.

²Ki pula vu ɗik da gwat ngisi mevel ɗik a ɗuɗuw ta, da kine na, naɓa gidaŋ ɗik a sa wuɗuk meɗ meɗ kaɓa mapuwam gusoŋ.

³Ki sa ndir sok ka dum moˀolo, manja yi, manja kalaf avaŋ.

⁴May gwat malambaˀa, a ru ti mburo nga zizi, a ga ɓa mburo, mesene naŋhay a singiram a ra. Ngama mikaslsla ati malambaˀ

⁵Mbur maɓi mi mideɗeke, a lum ngama haɗi, mbur maɓi ti ˀay mezle, a jum kuy kuy ati mizli.

⁶Anja mizli a jukuw haŋ tika tika, amma tiɓi kuti ngi mbur purla, awuzla mizli durmuko!

⁷Da ki wuɗ ji ngama na, sina kwacay ngi mburo kpeˀ ɗagay, ki slurup di slirap kutum ta.

⁸Mbur mekeleme, ar hin ɓa lum tivi ka na, a ji ti ka ngama, amma da ka ar bonoy na, a sinuw mata.

⁹Ngama matiri mesene ɗik ada, ɓi ngi mesem maɓukuw taŋ ar tiri na, a ra njika taŋ.

¹⁰Ngama mekeleme, ki zumam ar sikiɗ purla, amma da ka ar bonoy na, a sinuw mata.

¹¹Ar pas mezle na, kum zlazlaɓ ka denguryek ati ngwas naŋ, a wa gawla ɗikeye hirnga kaˀ a muŋ.

¹²Amma da bonoy lumuw le na, a mbiɗi pirvik ng’ar ka, dar a ɗum ti ka.

¹³Kirih kileŋ avi mesene ɗikeye, yo ji lesl avi ngama ɗikeye.

¹⁴Ngama ɗik migisiŋ gisiŋ, a ɗumuw ar hay kuli, [1] mbur muluma le na, a lum zlili le.

¹⁵Ngama miteŋteŋ, cikili naŋ a zli ta, a funa zlili ka mawa weˀ ti wi le.

¹⁶Ngama miteŋteŋ, i slalak ngi vula siifa, masa lumam i mizli muzluwun ti Bumbulvuŋhoy.

¹⁷Muzluwun ti Bumbulvuŋhoy a sinaka ji ngama le, asi gwat ngi gi taŋ na, ngama taŋ a sa ga kanah ya. Dubuna sin mijileŋ

¹⁸Mangal ɗu, zla dubuna gwata zle ti zuŋ, hã ki sa gi gal na, ki luma sin mijileŋ le.

¹⁹Kirih ng’avi sin mijileŋ yi naŋ mundum haɗa na, kutuko tehhe, kaɓa mbur mazla guruw, a zligi. Asi huv naŋ a sa guru neˀ ɓula, amma ki sa zum yi naŋ gweˀe.

²⁰Avi mizli manja sina gwataya, sin mijileŋ i gwat mutuwaˀa, mbur manja lesle, anta sa hurdum di hirdam ta.

²¹Avi manja lesleye, naŋ kaɓa ɗugur mududok, ngi pura gidaŋ taŋ, amma a sa pulaka bitik kutuumo si.

²²Asi sin mijileŋ na, slimiɗ naŋ a ndila le, misi ti naŋ i mizli neˀkini si.

²³Mangal ɗu, cin ɗi, tuɓa wuluk ɗo, ki pula mi ngi kuti ya mavuluw di na ta.

²⁴Ca saraya ng’ar dambula ngi sin mijileŋ, ca galalaŋ naŋ asi ˀay.

²⁵Girdiˀ girdeˀ ɓa ki zuɓa ar pepesle, anja zeweɗ mujuwu ti naŋ na, a guru ta.

²⁶Kirih ng’avi sin mijileŋ ti membezleŋ ngi vu ɗik wãˀ, yo sipa jiviɗ naŋ ti gidaŋ ɗik wãˀ.

²⁷Supa sar naŋ, wunjulaŋ, a sa buguw vu, daka misa ja le ndap asi haŋ na, ki pula ta.

²⁸Asi ar kiɗa mi naŋ na, ki sa lum musuka vu avaŋ. bonoy ka miga ar li sipi naŋ na, a sa tiri mumul.

²⁹Dambula naŋ migizl avi sar ɗik tuwa, a sa tiri avi ka, i gwat majiginuw kuy kuy wãˀ, yo galalaŋ naŋ misi asi ˀay ɗik tuwa, a sa tiri zana ngi vuluw dudok.

³⁰Jijir naŋ muvuluw di na, a sa tiri gwat ngi wuya ngi ɓiri hirnga, zeweɗ naŋ, i lopon gagaza mindezze ngi tuwuɗa hirngaŋ.

³¹Ki saka taŋ a vu vu kaɓa zana ngi vula dudok, ki sa tuwuɗa vah vah ar kwacay ngi jiɗa meceŋceleŋ.

³²Da ki wuɗ sina gwata le na mangal ɗu, ki sa sina, yo da ki vula vu ɗike le taˀ wãˀ na, ki sa tiri gaw naŋ.

³³Da ki wuɗ cin naŋ le na, ki sa dubuna, da ki ra jik slimiɗ na, ki sa lum sin mijileŋ.

³⁴Ci awuzla mizli madiɗahay, vula vu ɗik taˀ da sin mijileŋ taŋ madubunaka da mizli na.

³⁵Mingiɓi ngi Buymisemuŋ gar na, cina ti mevel purla, ɓi ti kucuwul misi sin mijileŋ anga gar na, ki pul loŋ ta.

³⁶Da ki pur mbur misi lesl le na, kil kutum ng’avaŋ, yaˀa sar ndeves ndeves nga mamay naŋ.

³⁷Wulka ɓi Bumbulvuŋ miɓa daˀ le na kuy kuy, ga gwat ɓimuɗuva naŋhay mawuɗo. Naŋ vuna a sa vuluw gidaŋ a mevele, yo a sa vuluw sin mijileŋ ka mawuɗ tuwa.